Süni intellekt tezliklə yuxuları lentə alacaq
İndiyə qədər aparılan araşdırmalar nəticəsində sübut olunmuşdur ki, yuxu bitdikdən, 50, 10 dəqiqə keçdikdən sonra isə 90 faizi yaddaşdan silinir. Ancaq çox yaxında süni intellektin köməkliyi ilə bu vəziyyət dəyişə bilər. Belə ki, elm adamları süni intellekt vasitəsilə yuxuları lentə ala biləcəklərini iddia edirlər.
Sözcü.com.tr veb saytının yaydığı informasiyaya görə, artıq süni intellekt vasitəsilə beyin skanlarını oxumaq və insanların yuxuda gördüklərinə bənzər görüntülər yaratmaq mümkündür. Bu texnologiya həmçinin, gələcəkdə müxtəlif heyvan növlərinin ətraf mühiti necə qəbul etdiyini öyrənmək və iflic olan insanların ünsiyyət qurmasına kömək etmək üçün müxtəlif sahələrdə də tətbiq edilə bilər.
Daha əvvəllər də laboratoriya şəraitində beyinin skan edilmiş görüntülərini yenidən qurmaq üçün süni intellektdən bir neçə dəfə istifadə edilmişdi. Osaka Universitetinin nevroloqu Yu Takagi izah edib ki, süni intellekt alqoritmi təsvirlər yarada bilmək üçün beyin fəaliyyəti ilə bağlı onun müxtəlif hissələrindən alınan məlumatlardan istifadə edir. Alqoritm beynin aktiv bölgələrinə qan axınındakı dəyişiklikləri aşkar edən funksional maqnit rezonans görüntüləri, beyin skanlarından əldə edilən məlumatları şərh edir.
Sistem sınaqlara cəlb edilmiş iştirakçıların beyin skanlarında uğurla testdən keçirilib. Tədqiqatçılar yeni texnologiyanın koqnitiv nevrologiya tədqiqatlarına yeni imkanlar açacağına, xəyali düşüncələri və yuxuları əngəlləmək üçün də istifadə oluna biləcəyinə ümid edirlər.
Klonlaşdırılmış robot qol
"Clone Robotics" şirkəti insan əlinə bənzəyən robot qol istehsal edib. Ancaq şirkət təkcə bununla kifayətlənmək fikrində deyil. Belə ki, şirkətin sözcüsü yaxın gələcəkdə insan klonunun istehsalını planlaşdırdıqlarını açıqlayıb.
İnsanın klonunu yaratmaq fikri hər zaman maraq doğuran məsələlərdən biri olsa da, hələ ki, elmi fantastik filmlərin mövzusu olaraq qalır. Lakin çox iddialı görünən "Clone Robotics" şirkəti insan qolunun süni surətini yaratmaqla bu xəyalı yaxın gələcəkdə reallaşdırmaq arzusundadır.
Şirkətin "Clone Hand" (klon əl) adlandırdığı robot qol eynilə insan qolu kimi əzələ və sümüklərdən ibarətdir. Süni mühitdə hazırlanmış qurğu əsl insan qolunun funksiyalarını yerinə yetirə bilir. 7 kiloqrama qədər yükdaşıma qabiliyyətinə malik olan robot qol süni əzələlər sayəsində əyilməyə qarşı 650 min dəfə davamlıdır. Əldə edilən məlumata görə, qurğu təxminən 2800 dollara başa gəlib.
Komandanın məqsədi klon qolu tamamilə hazır vəziyyətə gətirdikdən sonra gerçək bir insan klonu yaratmaqdır. Tədqiqatçıların fikrincə, süni insan üzvləri yaradaraq gələcəkdə əlil insanlara kömək edə bilərlər.
İnformasiyanı webtekno.com saytı yayıb.
Havadan elektrik enerjisi əldə etməyin yolu tapıldı
Avstraliyanın Monaş Universitetinin alimləri havadakı hidrogendən elektrik enerjisi istehsal edə bilən ferment tapdıqlarını açıqlayıblar. Belə ki, aparılan araşdırmalar zamanı məlum olub ki, “Huc” adlı ferment havadakı hidrogen molekullarını elektrik enerjisinə çevirə bilir.
Tədqiqatçılardan Rhys Qrinter verdiyi açıqlamada, fermentin laboratoriya şəraitində izolyasiya edilərək elektrik dövrəsinə yerləşdirildiyi zaman elektrik enerjisi istehsal edilə biləcəyini söyləyib. O, həmçinin bildirib ki, havadakı hidrogen nisbətinin aşağı olması səbəbindən istehsal edilən enerji hələlik yalnız kiçikhəcmli elektrik cihazlarını çalışdıra bilir. O, daha böyük ölçülü elektrik cihazlarına enerji istehsal etmək üçün isə xarici hidrogen qaynağına ehtiyac olduğunu vurğulayıb.
Qrinter həmçinin qeyd edib ki, onlar hələ tədqiqatın ilk mərhələsindədirlər, lakin fermentə daha çox miqdarda hidrogen əlavə etməklə daha çox elektrik enerjisi istehsal etmək mümkündür. Alim növbəti hədəflərinin elektrik enerjisinin istehsal gücünü artırmaq və tapdıqları fermentlə işləyə biləcək cihaz dizayn etmək olduğunu bildirib.
İnformasiya ensonhaber.com veb saytında yayımlanıb.
Yadplanetlilərin axtarışı üçün yeni layihə
Bir neçə müddət bundan öncə, Vaşinqtonda keçirilmiş Amerika Elmin İnkişafı Assosiasiyasının (AAAS) yığıncağında dünyanın bir neçə aparıcı institutunun alimləri yeni təşəbbüsün irəli sürüldüyünü elan ediblər. İşə salınmış təşəbbüs çərçivəsində Yer kürəsindəki həyatın formalaşması tədqiq olunacaq və eyni proseslərin kainatın digər yerlərində axtarılması reallaşdırılacaq. Sözügedən layihədə Kembric, Harvard və Çikaqo universitetlərinin təmsilçiləri iştirak edəcəklər. “Mən düşünürəm ki, həyat kainatın fizika qanunlarına yerləşdirilib”, - deyə isveçrəli astronom Didier Queloz qeyd edib.
Qeyd etmək lazımdır ki, Didier Queloz sözügedən layihənin rəhbəri seçilib. Həmçinin o, 1995-ci ildə ilk ekzoplanetin kəşf edilməsində iştirak etmiş astronomlardan biri olub. Məlumata əsasən, yeni layihənin iştirakçıları Mars və Yupiterə planlaşdırılan yeni planetlərarası missiyaların məlumatlarının analizlərini apararaq və James Webb kimi kosmik teleskoplardan istifadə edərək yadplanetli həyat növünün mövcud olma izlərini axtaracaqlar. Alimlərin yekun məqsədləri digər planetlərdə istənilən növ həyat formasının tapılmasıdır. Bakteriyalardan tutmuş inkişaf etmiş sivilizasiyalara qədər. Əlavə olaraq Yer kürəsində həyatın formalaşma prosesləri də tədqiq olunacaq.
Hazırladı:
Elenora HƏSƏNOVA,
"Respublika".