1996-cı ildə ümummilli lider Heydər Əliyev tərəfindən "Meliorasiya və irriqasiya haqqında" Azərbaycan Respublikası Qanununun imzalandığı 5 iyun tarixi sonralar möhtərəm Prezident cənab İlham Əliyevin 24 may 2007-ci il tarixli sərəncamı ilə "Meliorator günü" kimi qeyd edilmişdir. Meliorasiya işçilərinin şərəfli əməyinə yüksək qiymət verən ölkə Prezidenti cənab İlham Əliyev 5 iyunun Su Təsərrüfatı və Meliorasiya İşçiləri Günü peşə bayramı kimi daha geniş miqyasda qeyd olunması barədə 14 may 2014-cü il tarixli sərəncam imzaladı. Möhtərəm Prezidentimizin daimi diqqət və qayğısının bariz nümunəsi kimi, bu sənədin imzalanması su təsərrüfatı və meliorasiya işçiləri tərəfindən böyük sevinc və minnətdarlıq hissi ilə qarşılandı, onları öz çətin və şərəfli işlərinə daha da həvəsləndirdi.
Bu qabaqcıl və şərəfli peşə sahiblərindən olan təcrübəli, uzun müddət bu idarələrə rəhbərlik edənlərdən Samux, Goranboy və Göygöl Suvarma Sistemləri idarələrinin rəisləri ilə görüşdük. Onlar bu bayram günündə meliorasiya işçilərinin yüksək əhvali-ruhiyyədə olmasını bildirdilər.
Samux Rayon Suvarma Sistemləri İdarəsinin rəisi, "Tərəqqi" medallı, həyatını bu sahəyə sərf edən peşəkar meliorator Gülağa Bağırov: Bu gün ölkəmizdə bu sahəyə diqqət və qayğı möhtərəm Prezidentimiz cənab İlham Əliyev tərəfindən uğurla davam etdirilir, bir çox irimiqyaslı layihələr həyata keçirilir, infrastruktur yeniləşir.
Qabaqcıl aqrar rayonlardan olan Samuxda əhalinin ərzaq təminatını yüksəltmək üçün torpaqlara həyat verən suya tələbatın təşkili vacib məsələlərdəndir. Bu çətin və şərəfli vəzifəni müvəffəqiyyətlə icra edən Samux Suvarma Sistemləri İdarəsinin kollektivi gecə-gündüz sahələrdə olur, bol məhsul yetişdirilməsi üçün əzmlə çalışırlar.
Ərzaq təhlükəsizliyinin əsas sahəsi-taxılçılığın inkişaf etdirilməsi, torpağın sözün əsl mənasında, cana gətirilməsi kollektivin prioritet məsələlərindəndir. Məhz bu baxımdan, ərzaq təhlükəsizliyinin təminatını və Dövlət proqramları olan aqrar bölmənin dinamik və davamlı inkişafını təmin etmək üçün idarənin işçiləri, hətta, gecəni də sahələrdə keçirirlər. Müasir dövrdə digər sahələr kimi, bu qədər işlərin görülməsi üçün texnikanın köməyi əvəzedilməzdir.
Yuxarıda göstərilən bu işlərin görülməsi üçün suvarma kanalları, stansiyalar, nasos aqreqatları və qurğular saz vəziyyətdə saxlanılır və dinamik fəaliyyətdədir.Torpaqların səmərəli suvarılması üçün kanallarda əvvəlcədən lildən təmizləmə, sahilbərkitmə və selə qarşı torpaq işləri, kol-kosdan təmizləmə işləri görülmüşdür ki, bu gün suyun maneəsiz təchizatı göz qabağındadır. Eyni zamanda, yararsız boru kəmərləri təmir olunmuş, işlək vəziyyətə gətirilmişdir. Məhz bu baxımdan, görülən işlər öz effektini verərək, hətta çaylardan gələn sel sularından da itkisiz maksimum istifadə olunur. Onu xüsusilə demək yerinə düşərdi ki, Respublika Meliorasiya və Su Təsərrüfatı ASC rəhbərliyi bu işdə həmişə yaxından dəstək olur. Melioratorçular bu diqqət və qayğının müqabilində daha da əzmlə çalışır, mövcud su mənbələrindən daha səmərəli istifadə etməklə hər bir sahədə bol məhsulun yetişdirilməsini ən ümdə vəzifə hesab edirlər.
Sonda idarə rəhbəri bütün melioratorları bu əziz bayram münasibətilə təbrik edərək, bir daha əminliklə bildirdi ki, çiçəklənən dövlətimizin və onun başçısı cənab İlham Əliyevin diqqət və qayğısına cavab olaraq, qədirbilən Samux Suvarma Sistemləri İdarəsinin kollektivi qarşıya qoyulmuş mühüm vəzifələrin uğurla yerinə yetirilməsində və daha güclü, qüdrətli Azərbaycan naminə qüvvələrini bundan sonra da səfərbərliyə alacaq və böyük nailiyyətlərə imza atacaqdır.
Goranboy Suvarma Sistemləri İdarəsinin rəisi, "Tərəqqi" medallı İlqar Məhərrəmov öz peşəsinin bütün incəliklərini mənimsəmiş, işgüzarlığı və təvazökarlığı ilə rayon sakinlərinin dərin hörmətini qazanmışdır. İdarə rəisi qeyd etdi ki, ölkə iqtisadiyyatının bütün sahələri kimi, kənd təsərrüfatı da özünün keyfiyyətcə yeni yüksəliş mərhələsinə qədəm qoyub. Əkin dövriyyəsi genişlənib, məhsuldarlıq yüksəlib, sahəyə xidmət edən qurumlarla işgüzar, səmərəli əlaqələr formalaşıb. Bu baxımdan, meliorasiya və su təsərrüfatı işçilərinin əkinçilərə göstərdikləri köməyin əhəmiyyəti və miqyası ildən-ilə artmağa başlayıb. Elə bunun nəticəsidir ki, Azərbaycan Prezidenti cənab İlham Əliyev hər il iyun ayının 5-nin su təsərrüfatı və meliorasiya işçilərinin peşə bayramı günü kimi təsis edilməsi haqqında sərəncam imzalayıb. Melioratorlar bunu ölkə rəhbəri tərəfindən respublikada məhsul bolluğu yaratmaq kimi müqəddəs və şərəfli işlərində onların əməyinə verilən yüksək qiymət kimi dəyərləndirirlər.
Melioratorlar bütün qüvvələrini sərf edərək, xalqın tələbatını ödəmək üçün məqsədyönlü tədbirlər həyata keçirirlər. Bu isə ölkə əhalisinin daxili istehsal hesabına çörək və digər ərzaq məhsulları ilə etibarlı təminatına, yaşayış məntəqələrinin, əkin sahələrinin, hidrotexniki qurğuların və digər infrastruktur obyektlərin sel və daşqın sularının zərərli təsirlərindən mühafizəsinə geniş imkanlar yaradır. Sözün əsl mənasında, meliorasiya və su təsərrüfatı işçiləri o insanlardır ki, məhz onların əməyi ilə susuz ərazilər su ilə təmin olunur, şorlaşmış sahələr duzlardan təmizlənir, bataqlıqlar qurudulur. Bəndlər və dambalar tikilməklə çayların axınları tənzimlənir və ölkə əhalisinin ekoloji cəhətdən təmiz ərzaq məhsulları ilə etibarlı təminatı üçün əlverişli şərait yaradılır.
Məlumdur ki, dövlət başçısı ərzaq təhlükəsizliyinin əsas sahəsi - taxılçılığın inkişaf etdirilməsi üçün istifadə olunmayan torpaqların əkin dövriyyəsinə cəlb edilməsi barədə müvafiq orqanlara tapşırıqlar vermişdir. Məhz ərzaq təhlükəsizliyinin təminatını və Dövlət proqramları olan aqrar bölmənin dinamik və davamlı inkişafını təmin etmək üçün suvarma və meliorasiya işçiləri var qüvvələri ilə çalışırlar. Bu işlərin görülməsi üçün suvarma kanalları, stasionar stansiyaları, nasos aqreqatları və qurğular dinamik fəaliyyətdədir. Bununla kifayətlənməyərək yeni metodlardan istifadə edərək uzun müddət istifadə olunmayan su arxlarının yararlı vəziyyətə gətirilməsi üçün müvafiq tədbirlər görülür. Balansda olan texnikaların köməyi ilə ötürücü stansiyalar daim saz vəziyyətdə saxlanılır, sağ və sol sahil divarları bərkidilir, beton üzlüklər təmir olunur, lildən və alaq otlarından təmizlənir. Respublika Meliorasiya və Su Təsərrüfatı ASC rəhbərliyi bu işdə yaxından köməklik göstərir. Suvarma işçiləri bu diqqət və qayğının müqabilində daha da əzmlə çalışırlar.
Göygöl Suvarma Sistemləri İdarəsinin rəisi İsmayıl Əvəzov 5 iyun münasibətilə şərəfli peşə sahibləri olan, bütün su təsərrüfatı və meliorasiya işçilərini təbrik edərək qeyd etdi ki, 1993-cü ildə ümummilli lider Heydər Əliyevin xalqın təkidli xahişi ilə yenidən respublika rəhbərliyinə qayıdışı ilə meliorasiya və su təsərrüfatı sahəsi öz inkişafının yeni mərhələsinə qədəm qoydu. Bu vacib sahəyə diqqət və qayğı son dərəcədə artırıldı. Dağıdılmış mövcud meliorasiya potensialı bərpa olundu, yeni layihələr hazırlanaraq daha səmərəli metodlardan istifadə yolları müəyyənləşdirildi. Aqrar sahələrdə aparılan islahatlarla paralel meliorasiya və su təsərrüfatında da həmahəng məqsədyönlü islahatlar aparıldı. Bu gün ölkəmizdə bu sahəyə diqqət və qayğı ulu öndərin layiqli davamçısı, möhtərəm Prezidentimiz cənab İlham Əliyev tərəfindən uğurla davam etdirilir, bir çox irimiqyaslı layihələr həyata keçirilir. Yaz-tarla işlərinin gedişində mövcud su ehtiyatlarından israfçılığa yol vermədən, qənaətlə istifadənin təşkili məqsədilə tərəfimizdən müəyyən təkliflər hazırlanıb, müvafiq qaydada icra olunur ki, bu da öz səmərəsini verir.
Sonda idarə rəisi bütün melioratorları bu əziz bayram münasibətilə təbrik edərək, bir daha əminliklə bildirdi ki, çiçəklənən dövlətimizin və onun başçısı cənab İlham Əliyevin diqqət və qayğısına cavab olaraq, melioratorlar daha da əzmlə çalışacaq, mövcud su mənbələrindən daha səmərəli istifadə etməklə hər bir sahədə bol məhsulun yetişdirilməsinə nail olacaqlar.
Biz də 5 iyun günündə bu şərəfli missiyanı ləyaqətlə yerinə yetirən, su təsərrüfatı və meliorasiya sahəsində fəaliyyət göstərən bütün əməkçiləri peşə bayramları münasibətilə ürəkdən təbrik edir, əmin olduğumuzu bildiririk ki, fədakar melioratorlar bundan sonra da qarşılarında dayanan vəzifələrin tam məsuliyyətlə yerinə yetirilməsi üçün bütün imkan və bacarıqlarından istifadə edərək, ölkəmizin müstəqilliyinin möhkəmləndirilməsi və iqtisadiyyatımızın daha da inkişafı naminə əllərindən gələni əsirgəməyəcəklər.
Zabit XƏLİLOV,
"Respublika".
