Azərbaycan Dövlət Su Ehtiyatları Agentliyi qəsəbə və kəndlərin içməli su təminatının yaxşılaşdırılması, su itkilərinin azaldılması məqsədilə layihələrin icrasını davam etdirir. Azərbaycan Respublikasının Prezidenti İlham Əliyevin təsdiqlədiyi regionların sosial-iqtisadi inkişafı Dövlət Proqramına uyğun olaraq Hacıqabul rayonunun 7 kəndində mərkəzləşdirilmiş içməli su şəbəkəsi yaradılır.

Hacıqabul rayonunun kəndlərinin içməli su təchizatının yaxşılaşdırılması və su itkilərinin aradan qaldırılması məqsədilə icra olunan layihənin birinci mərhələsi üzrə işlər yekunlaşıb. Layihə rayonun 1-ci Paşalı, 2-ci Paşalı, Şorbaçı, Tağılı, Cəngən, Tava və Qubalı kəndlərini əhatə edir.

Daxili imkanlar hesabına icra olunan layihə çərçivəsində Oğuz-Qəbələ-Bakı magistral su xəttinin 163-cü kilometrliyindən kəndlərə yeni birləşmə verilib, 2,4 km magistral və 11 km paylayıcı su xətləri çəkilib. Yeni yaradılmış şəbəkələrdən 245 ünvana ev birləşməsi verilib və sayğaclar quraşdırılıb.

Kəndlərdə mərkəzləşdirilmiş  su şəbəkəsi istismara verildikdən sonra ümumi istifadə üçün bulaqlar ləğv edilib. Yeni şəbəkələrin yaradılması kənd sakinlərinin dayanıqlı  içməli su ilə təmin olunmasına imkan verəcək və su itkilərinin qarşısını alacaq. Eyni zamanda fərdi yaşayış evlərinə sayğacların quraşdırılması dəqiq uçotun qurulmasını təmin edəcək. Hacıqabul rayonunun 7 kəndində icra olunan içməli su layihəsindən ümumilikdə 7500-dək sakin faydalanacaq.

"Respublika".