“Neftçi” Azərbaycan çempionatlarında nadir təsadüf olunan göstəriciyə imza atıb.

"Respublika" Peşəkar Futbol Liqasının rəsmi saytına istinadən xəbər verir ki, Azərbaycan Premyer Liqasının XXXIII turunda “Qarabağ”dan 5 qol buraxan Bakı klubu XXXIV turda “Kəpəz”in qapısına eyni sayda qol vurub – 0:5 və 5:1.

Paytaxt təmsilçisi tarixində ilk dəfə 5 və ya daha çox buraxdığı görüşdən sonrakı qarşılaşmada belə məhsuldarlıq göstərib. 1992-ci ildən keçirilən ölkə çempionatlarında 7-ci dəfə belə hadisə yaşanıb.

Buna sonuncu dəfə AZAL klubu nail olub. Paytaxt təmsilçisi 2011-2012-ci illər mövsümündə “Neftçi”yə 1:7 hesabı ilə uduzandan sonra “Simurq”a qalib gəlib – 5:1.

“Neftçi” və AZAL-dan başqa, daha 3 komanda belə halla üzləşib. “Turan” üç dəfə bu cür oyunlar ardıcıllığı yaşayıb. Tovuzlular 1997-1998 (“Qarabağ” 1:5, “Kür-Nur” 5:1), 1998-1999 (“Bakı fəhləsi” 1:5, “Şahdağ” 8:0) və 2000-2001-ci illər (“Neftçi” 1:5, “Araz-Naxçıvan” 7:2) mövsümlərində iki fərqli matçı sıralayıb.

Sumqayıt “Xəzər”i 1999-2000 (“Şəfa” 0:5, “Neftqaz” 5:0), “Qarabağ” 2001-2002-ci illər (“Şəmkir” 1:5, “Şahdağ” 6:0) mövsümlərində 5 və ya daha çox qol buraxdığı görüşdən sonra məhsuldarlıq nümayiş etdirib.

“Qarabağ” isə Azərbaycan Premyer Liqasının 2023-2024-cü illər mövsümündə 91-ci qolunu vurub. Ağdam klubu bu rəqəmə XXXIV turun “Zirə” ilə matçındakı 1:0 hesablı səfər qələbəsi ilə çatıb.

Qurban Qurbanovun baş məşqçisi olduğu komanda bununla da tarixinin rekordunu təkrarlayıb. “Qarabağ”ın ən çox qol vurduğu mövsüm ötən çempionat olub. Ağdamlılar 2022-2023-cü illər mövsümündə 91 dəfə fərqləniblər. Həmin göstəricini təkrarlayan “Qarabağ” qarşıdakı iki turda rekordunu yeniləmək imkanına malikdir.

Qeyd edək ki, çempion son iki turda “Turan Tovuz”la evdə, “Araz-Naxçıvan”la səfərdə qarşılaşacaq.