Azərbaycan Respublikasının Prezidenti İlham Əliyevin təsdiqlədiyi regionların sosial-iqtisadi inkişafı Dövlət Proqramına uyğun olaraq, Ağstafa rayonunun sərhədyanı bölgədə yerləşən 3 kəndinin içməli su təchizatı yaxşılaşdırılır. Dövlət investisiyası hesabına həyata keçirilən layihə Köhnəqışlaq, Tatlı və Yaradullu kəndlərini əhatə edir. Bu kəndlərdə indiyə qədər mərkəzləşdirilmiş içməli su təchizatı sistemləri mövcud olmayıb.

Təsdiqlənmiş layihəyə uyğun olaraq Köhnəqışlaq kəndinin su təchizatı mövcud bulaqdan, Tatlı və Yaradullu kəndləri isə yeni qazılacaq subartezian quyularından veriləcək. Layihə çərçivəsində nasos stansiyaları və su anbarları, əhalinin ümumi istifadəsi üçün bulaqların inşası nəzərdə tutulub. Hazırda 5,9 kilometr magistral və 38 km şəbəkə su xətlərinin tikintisi yekunlaşmaq üzrədir, nasos stansiyaları və anbarların tikintisi isə davam etdirilir. Ağstafa rayonunun 3 kəndində əhalinin ümumi istifadəsi üçün 256 ədəd bulağın quraşdırılması nəzərdə tutulub.

Tikinti-quraşdırma işlərinin 2023-cü ilin yay aylarında başa çatdırılması nəzərdə tutulur. Layihənin icrası Ağstafa rayonunun 3 kəndində 4 min nəfərədək sakinin içməli su təchizatının yaxşılaşdırılmasına imkan yaradacaq. Qeyd edək ki, Ağstafa rayonu ilə yanaşı, hazırda Qazax, Tovuz və Neftçala rayonlarının da kənd və qəsəbələrində içməli su layihələri həyata keçirilir.

"Respublika".