Onlara ümumilikdə 36 min xidmət göstərilib

Prezident İlham Əliyevin tapşırığına əsasən, postmüharibə dövründə Əmək və Əhalinin Sosial Müdafiəsi Nazirliyi tərəfindən şəhid ailələri, qazilər, müharibə əlilləri, erməni terrorundan zərərçəkənlər, onların yaxınları ilə bağlı icra olunan sosial dəstək tədbirləri artıq 26 min şəxsi əhatə edib.

Bu barədə nazirliyin informasiya və kommunikasiya şöbəsindən verilən məlumata görə, tədbirlər çərçivəsində şəhid ailələri və müharibə əlillərindən ibarət 9100 nəfərə 18400 sosial ödəniş təyinatı həyata keçirilib. 7 mindən çox şəxsə sosial-psixoloji və reabilitasiyayönümlü 10 min xidmət göstərilib. 140 hərbçi yüksək texnologiyalı müasir protezlə, 1200-ə yaxın müharibə əlili 8800-dən çox reabilitasiya vasitəsilə təmin olunub.

Həmin kateqoriyalara aid şəxslərin məşğulluq məsələlərinin həlli sahəsində də müvafiq işlər aparılır. Onlardan 7100 şəxs özünüməşğulluq və digər aktiv məşğulluq tədbirlərinə cəlb olunub.

Əmək və Əhalinin Sosial Müdafiəsi Nazirliyi ilə sosial tərəfdaşlıq müstəvisində özəl sektorun sosial layihələrinin bir istiqaməti də tənha yaşlı və əlilliyi olan şəxslərə, aztəminatlı ailələrə yönəlib. Nazirliyin sosial tərəfdaşı “Paşa Holding” tərəfindən 2019-2021-ci illərdə mühüm dəstək tədbirləri həyata keçirilib. Şirkət əlilliyi olan şəxslərin BOCCİA İdman Federasiyasına da maliyyə dəstəyini göstərir.

Bu barədə nazirliyin ictimaiyyətlə əlaqələr və kommunikasiya şöbəsindən verilən məlumata görə, ali və orta ixtisas müəssisələrində ödənişli təhsil alan, görmə imkanı məhdud bir qrup tələbənin təhsil haqqını ödəyən “Paşa Holding” inklüziv teatr olan, fiziki məhdudiyyətli istedadlı insanların çalışdığı ƏSA teatrını da öz dəstəyi ilə təmin edib. Ötən il aztəminatlı ailələrə dəstək olaraq 7500 məktəbli forması təqdim edən şirkət bu il də 13 mindən çox aztəminatlı ailənin uşaqlarını məktəbli ləvazimatları ilə təmin edir. Hazırda çanta, məktəbli forması və digər zəruri məktəb ləvazimatları Nazirliyin tabeliyindəki Sosial Xidmətlər Agentliyinin əməkdaşları tərəfindən ailələrə çatdırılır. “İSR Holding” də bu işlərdə yaxından iştirak edir. Şirkət ötən il  5000 aztəminatlı şəxsə müxtəlif növ geyim əşyaları təqdim edib.           

Ötən il COVİD-19 pandemiyası ilə əlaqədar yaşı 65-dən yuxarı tənha vətəndaşların infeksiyadan qorunmaq üçün evdən bayıra çıxmadıqları dövrdə onlara evlərində sosial xidmətlərin operativ və səmərəli təşkilində “Azərmaş” ASC mühüm dəstək göstərib. Şirkətdən bunun üçün 100 avtomobil ayrıldı ki, bu da önəmli sosial tərəfdaşlıq nümunəsi oldu.

“Respublika”.