Azərbaycan Respublikasında regionların yüksəlişin təmini ölkədə uğurla həyata keçirilən davamlı sosial-iqtisadi inkişaf strategiyasının mühüm tərkib hissəsidir. Regionların inkişafı sahəsində qəbul edilmiş və uğurla həyata keçirilmiş Dövlət proqramlarında, habelə regionların sosial-iqtisadi inkişafına dair əlavə tədbirlərlə bağlı sərəncamlarda nəzərdə tutulmuş vəzifələrin icrası ölkədə qeyri-neft sektorunun davamlı inkişafına, regionlarda kommunal xidmətlərin və sosial infrastruktur təminatının keyfiyyətinin yüksəldilməsinə töhfə vermişdir.
Sahibkarlıq mühitinin daha da yaxşılaşdırılması, investisiya qoyuluşunun artması, yeni müəssisələrin istifadəyə verilməsi, iş yerlərinin açılmasına və nəticədə əhalinin məşğulluğunun artırılmasına, yoxsulluq səviyyəsinin azaldılmasına gətirib çıxarmışdır. Ümumiyyətlə, Azərbaycan Respublikasının Prezidenti cənab İlham Əliyevin müvafiq fərmanları ilə regionlarda başlanan tikinti-quruculuq, abadlıq işləri energetiklər şəhəri olan, bölgəyə nur verən Mingəçevirdə də uğurla həyata keçirilir. Belə ki, şəhərdə vətəndaşların istirahəti, firavanlığı, asudə vaxtının səmərəli keçməsi üçün yeni müasir park və istirahət məskənləri salınıb, yaşıllıq zolaqları genişləndirilib. Çoxmənzilli yaşayış binalarının bir çoxunda əsaslı təmir işləri yekunlaşıb, yeni-yeni nümunəvi məhəllələr yaradılıb, işıq, qaz, su xətlərində mövcud olan problemlərin həlli istiqamətində xeyli işlər görülüb. Bütün bunlar vətəndaşların rifah halının yaxşılaşdırılmasına, məmnunluq hissinin artırılmasına, istirahətlərinin səmərəliliyinə yönəldilib.
Mingəçevirdə həyata keçirilən quruculuq işləri çərçivəsində bu yaxınlarda daha bir istirahət məkanı istifadəyə verilib. Ş.İ.Xətai küçəsində, 14 nömrəli orta məktəbin qarşısında bir zamanlar boş sahə olan ərazidə yaradılan istirahət məkanı sakinlərin arzu və istəklərinə uyğun olaraq Mingəçevir Bələdiyyəsinin maliyyə dəstəyi ilə yaradılıb. 1 hektara yaxın ərazidə quruculuq işlərinə may ayının əvvəlindən başlanıb. Burada 2 yaraşıqlı söhbətgah yaradılıb, işıqlanma sistemi çəkilib, 9 oturacaq və 8 işıq dirəyi qoyulub. 650 kvadratmetr sahəyə plitələr döşənib, bordürlər düzülüb. Ərazidəki yaşıllıq zolaqlarına qazonlar səpilib, 150-yə yaxın ağac tingi və gül kolları, o cümlədən 8 dekorativ ağac əkilib.
Yeni istirahət məkanının açılış mərasiminə Mingəçevir Şəhər İcra Hakimiyyətinin başçısı İlham İsmayılov və aparatın məsul işçiləri, şəhər bələdiyyəsinin sədri Ramiz Əliyev və bələdiyyə üzvləri, ərazidə yaşayan sakinlər, şəhər ictimaiyyətinin nümayəndələri, ictimai təşkilatların təmsilçiləri, mətbuat işçiləri iştirak ediblər. Tədbiri açan Mingəçevir Şəhər İcra Hakimiyyətinin başçısı İlham İsmayılov qeyd edib ki, ölkə Prezidenti cənab İlham Əliyevin tapşırıqlarına əsasən mütəmadi olaraq sakinlərlə keçirilən görüşlərdə onların qaldırdığı problemləri, arzu və istəklərini həll etməyə çalışırıq. Bu istirahət məkanı sakinlərin istəyinə uyğun olaraq yaradılıb. Bundan sonra da şəhərimizin inkişafı və gözəlləşməsi üçün bütün imkanlardan istifadə olunacaqdır. Şəhər rəhbəri, həmçinin vurğulayıb ki, 2020-ci ilin payız aylarında 44 günlük Vətən savaşında ölkə Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə Milli Ordumuzun cəsur əsgər və zabitləri 30 ilə yaxın işğal altında qalan torpaqlarımızı azad edərək, dünya ölkələrinə dövlətimizin, xalqımızın gücünü, birliyini nümayiş etdirdilər. Bu gün, Dövlətimizin başçısının rəhbərliyi, qətiyyəti ilə həyata keçirilən daxili və xarici siyasət insanların rahat və firavan yaşayışına tuşlanıb və Azərbaycanın dünyada nüfuzunu daha da artırır. Torpaqlarımız azad edildikdən sonra Prezidentimiz dəfələrlə azad olunmuş ərazilərdə olub. Burada həyatın bərpa olunması üçün geniş quruculuq işləri sürətlə gedir. Uzun illər yurdumuzun müxtəlif bölgələrində məcburi köçkün kimi yaşayan insanların doğma ata yurdlarna qayıtması üçün lazım olan hər cür şəraitin yaradılması, yaşayış evlərinin, təhsil, tərbiyə, səhiyyə, mədəniyyət ocaqlarının tikilməsi, digər infrastruktur layihələrin reallaşması, iş yerlərinin yaradılması və s. mühüm addımlar atılır. Tezliklə onlar öz doğma, müqəddəs yurdlarına qovuşacaqlar.
Qeyd edək ki, ulu öndər Heydər Əliyevin anadan olmasının 100 illiyi münasibətilə Mingəçevir şəhərində keçirilən silsilə tədbirlər sırasında ağacəkmə kampaniyası da uğurla aparılıb. Belə ki, şəhərin Xaldan şosesi istiqamətində, Nəsimi parkında, Heydər Əliyev prospektində, şəhərin sağ və sol sahillərində, energetiklər yaşayış massivi ərazisindəki yaşıllıq zolaqlarında, parklarda, istirahət məkanlarında, məhəllələrdə bu qəbildən olan işlər müvəffəqiyyətlə davam edir. Yaşayış binalarının əsaslı və cari təmir olunmasında, nümunəvi məhəllələrin yaradılmasında, istirahət məskənlərinin salınmasında, şəhərin yaşıllaşdırma və sanitar təmizlik idarəsinin, mənzil-kommunal təsərrüfatı istehsalat birliyinin, mənzil təsərrüfatı və abadlaşdırma idarəsinin, eləcə də mənzil kommunal təsərrüfatı kombinatının kollektivləri fədakarcasına çalışırlar.
Yeri gəlmişkən xatırladaq ki, şəhərin 126, 127, 73 və 74-cü məhəllələrində də aparılan quruculuq işləri sakinlərin böyük razılığına səbəb olmuşdur. Məhəllələrdə əsaslı təmir işləri ilə yanaşı uşaqların əylənməsi və istirahəti üçün idman meydançaları yaradılıb, əyləncə qurğuları quraşdırılıb, gənclər üçün futbol, voleybol və basketbol meydanları hazırlanıb. Sakinlərin səmərəli istirahəti üçün gözoxşayan söhbətgahlar yaradılıb, diqqəti cəlb edən zövqlü oturacaqlar qoyulub, müasir işıqlanma sistemi quraşdırılıb. Yaşayış binalarının fasad hissələri suvanaraq, rənglənərək əsaslı təmirdən çıxarılıb. Binaların ümumi istifadə sahələri, dəhlizlər təmir edilib, pəncərə çərçivələri və seyf qapıları qoyulub, dam örtükləri yenilənib. Həmçinin məhəllələrdə yaşıllıq zolaqları salınıb, bordürlər qoyulub, plitələr döşənib. Bu qəbildən olan işlər şəhərin hər bir yerində uğurla davam etdirilir. Bütün görülən bu möhtəşəm işlər dövlət başçısı cənab İlham Əliyevin regionlara göstərdiyi diqqət və qayğının nəticəsidir.
Zabit XƏLİLOV,
"Respublika".
