Milli bayraqların yandırılması beynəlxalq hüquq normalarına ziddir və bütün dövlətlər tərəfindən birmənalı olaraq qınanılmalıdır. Bu hərəkət milli, etnik və mənəvi dəyərlərin aşağılanması və humanitar hüquqların kəskin şəkildə pozulması aktıdır. Beynəlxalq məkanda bu cür hadisələrə ciddi cinayət kimi baxılır və cəzalar tətbiq edilir. Lakin dünya güc mərkəzlərinin ikili standartları bu çərçivədən kənara çıxaraq ədalət müstəvisində etnik və milli dəyərlərə lazımi qiymət verməyərək cəmiyyətdə fikir ayrılıqlarına və aqressiyaya səbəb olurlar. Bayraq milli cəmiyyətin simvoludur və milli mənəviyyatı təmsil edir. Bu səbəbdən, milli bayraqların yandırılması milli mənəviyyatın aşağılanması kimi də dəyərləndirilməlidir.
Son zamanlar bəzi Avropa ölkələrində Quranın və türk bayraqlarının yandırılması aktı Danimarkada növbəti dəfə təkrarlanıb. Hər hansı bir cəmiyyətin suverenlik və müstəqillik rəmzi olan bayrağına və ya müqəddəs dəyərlərinə bu cür davranışlar yolverilməzdir. Bu cinayəti törədənlərin cəzalandırılması üçün tədbirlər görülməsi müasir və sivil davranışın zərurəti kimi qəbul edilməlidir.
Milli, etnik və mənəvi dəyərlərə ehtiramla yanaşmaq, bir xalqın ümummilli dəyərlərinə hörmət etmək qədim tarixdən bəri türk millətinə xas xüsusiyyətlərdən biridir. Xatırladaq ki, 9 sentyabr 1922-ci ildə Mustafa Kamal Atatürkün böyük bir heyətlə və ordunun müşayiəti ilə İzmirə daxil olması yunan əsgərlərinin İzmirdən tamamən təmizlənməsi demək idi. Atatürk İzmirin Karşıyaka bölgəsində inzibati bir binaya daxil olarkən girişdə yerə sərilmiş yunan bayraqlarını görəndə təəccüblənir və bunun nə demək olduğunu soruşur. Bildirirlər ki, yunan kralı bu evə girərkən hər gün ayaqqabılarını türk bayrağına silərmiş. Atatürk isə cavabında deyir: "O bir səhv edib və bu səhvi təkrar etməyəcəm. Bayraq bir millətin şərəfidir. O bayraq uğrunda minlərlə yunan əsgəri həyatını qurban verib. Bir dövlətin bayrağı nə olursa-olsun yerlərə sərilməz, təhqir olunmaz. O bayrağı qaldırın!". Heç şübhəsiz, bu gün hər bir dövlət və millət məhz Atatürkün timsalında digər önəmli şəxslərin bayrağa göstərdiyi ehtirama qoşulmalı, etnik və milli atributlara qarşı hörmətlə yanaşmalıdır.
İrəvanda keçirilən ağır atletika üzrə Avropa çempionatında bayrağımızın təhqir olunması xain erməni xislətini yenidən göstərmiş oldu. Dünya ictimaiyyətinin bütün təbəqələri bir daha gördü ki, revanşist hisslər ilə bəslənən haylar dünya mədəniyyətinin bir parçası ola bilməz. Ermənilər öz çərçivələrində bütün dünyaya "mədəniyyətlərini" göstərdilər. Əsrlər boyu beynəlxalq aləmi aldadaraq uydurma tarixi-mədəni irs yaradan Ermənistan özü-özünün "qatili" oldu. Xislətli, paxıl, əxlaq normalarından kənar və nifrət dolu bir erməni mədəniyyətini qarşımızda görürük. Dövlət və terror məfhumlarının adlarının yanaşı çəkilməsinin əsas səbəbi dövlət dairələri tərəfindən bu iyrənc əməli törədən irqçi şəxsin dəstəklənməsi və bu cinayəti törədən şəxsə "qəhrəman" kimi yanaşılmasıdır. Azərbaycan Xarici İşlər Nazirliyinin bəyanatında da qeyd edildiyi kimi, bayrağımızın yandırılması Ermənistanda Azərbaycana qarşı etnik zəmində kök salmış nifrətin təcəssümüdür. Ermənistan hökuməti tədbiri təşkil edən tərəf kimi hadisənin qarşısını vaxtında almalı və müvafiq təhlükəsizlik tədbirləri görməli idi. Bayrağımızı yandırmış şəxsin ilkin olaraq saxlanılması, sonradan alqışlarla azad edilməsi terror aktının planlı şəkildə baş verdiyini göstərir. Ermənistan nifrət zəminində bu cinayəti törətmiş şəxsi dərhal məsuliyyətə cəlb etməli olduğu halda, bu vəhşiliyi törədən şəxs "qəhrəman" kimi təqdim edilir. Reallıq budur ki, Azərbaycan bayrağının yandırılması əvvəlcədən planlaşdırılıb və açılış mərasiminin tərkib hissəsi olub.
Sülh quruculuğunda birtərəfli yanaşma heç vaxt uğura aparmır. Avropa İttifaqı Ermənistanın bu cür davranışını, təxribatçı əməllərini və azərbaycanlılara qarşı hörmətsizliyini qınamalıdır. Ermənistan öz nifrət dolu davranışını dəyişdirərək qonşu ölkənin suverenliyinə və bütövlüyünə hörmət göstərməlidir. Bu, beynəlxalq əhəmiyyətli bir tədbirin iştirakçısına ev sahibinin hörmətsizliyi, beynəlxalq konvensiyaların tələblərinin kobud şəkildə pozulması ilə yanaşı, ermənilərin nə qədər vəhşi olduqlarını, Azərbaycan xalqına, dövlətinə nifrət bəslədiklərini nümayiş etdirir. Erməni ictimaiyyətinin reaksiyası da göz önündədir. Hadisədən iki gün sonra erməni deputat Hovik Ağazaryan bayrağın yandırılmasına görə üzr istəyib: "Mən bütün beynəlxalq sivil ictimaiyyətdən üzr istəyirəm ki, mən bir vətəndaş və deputat kimi vəhşi və adamyeyən tayfaların təzahürlərini millətimdən tamamilə silmək üçün əlimdən gələni etməmişəm". Deputatın bu açıqlaması erməni ictimaiyyəti tərəfindən böyük tənqidlərlə, hətta təhqirlərlə qarşılanıb.
Bütün səylərə baxmayaraq, Ermənistan türkün səsini İrəvanda boğa bilmədi. Qardaş Türkiyənin uğuru bir daha sübut etdi ki, türk idealı və onun milli-mənəvi irsi alçaldıla bilməz. Barbar haylara ən gözəl cavab isə İrəvanda ağırlıqqaldırma üzrə Avropa çempionatında qızıl medal qazanmış türkiyəli atletlər Nuray Güngör, Cansu Bektaş, Yusuf Fehmi Genc və gümüş mükafatçı Qamze Altunun uğurları oldu. Cansu Bektaşın: "Azərbaycan xalqını çox sevirəm. İrəvanda qazandığım medalı Azərbaycana həsr etdim" ifadəsi eyni millətin biri-birinə həmrəyliyinin əyani nümunəsi olmaqla yanaşı, terror xislətli Ermənistana növbəti tarixi dərsdir.
Prezident cənab İlham Əliyev və birinci xanım Mehriban Əliyevanın Ağır atletika üzrə Avropa çempionatında qələbələrini Azərbaycana həsr etmiş Türkiyə idmançıları ilə görüşü bir daha onu göstərir ki, Türkiyə-Azərbaycan - iki qardaş ölkə bütün məsələlərdə bir yerdədir. Ölkə başçımız görüş çərçivəsində Azərbaycan türkiyəli idmançıları "Tərəqqi" medalı ilə təltif etmiş və Cansu Bektaş İrəvanda qazandığı qızıl medalı Prezident İlham Əliyevə hədiyyə olaraq vermişdir.
Bununla yanaşı, dövlət başçımızın öz nitqində bildirdiyi fikirlər təxribatçı dövlət kimi Ermənistanın acizliyini bir daha xatırlatmış oldu: "Bəli, bir də ki, o bayrağı yandırana hər hansı bir cəza da verilmədi, heç bir şey edilmədi, heç bir söz də deyilmədi, əksinə, onu alqışlarla salamladılar. İndi, bilirsiniz, bayraq yandırmaqla heç kim heç nə əldə etmir. 24 apreldə Azərbaycan və Türkiyə bayraqlarını Ermənistanın əsas meydanında yandırmışdılar. Amma bizim bayraqlarımıza onlar Ağrı dağda, mən dedim, Murov dağında, Şuşada yaxınlaşa bilərlərmi? Təbii ki, yox. Ona görə bu, onların acizliyini göstərir, gücsüzlüyünü göstərir".
Nurlan ABDALOV,
"Respublika".
