Cəlilabadda şəhidlərimizin Vətən müharibəsində adlarını hərb tariximizə qızıl hərflərlə yazdıran igid oğullarımızın xatirəsi əziz tutulur. Vətən uğrunda canından keçən oğul və qızlarımız, onların ailələri daim yad olunur. Şanlı Zəfər yürüşündə qəhrəmanlıq göstərərək öz canından keçmiş şəhid oğullarımızdan biri də Əliyev Camal Mehman oğludur.
Cəlilabad Rayon İcra Hakimiyyətinin başçısı Rafiq Cəlilov və Aparatın məsul əməkdaşları şəhidimizin ailəsinə baş çəkərək ailəsinə başsağlığı verərək onların qayğıları ilə maraqlandılar. Rafiq Cəlilov bildirdi ki, Prezident, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu düşməni diz çökdürərək torpaqlarımızı işğalçılardan təmizlədi və ərazi bütövlüyümüzü bərpa etdi. Ali Baş Komandanın iradəsi ilə dəmir yumruğa dönən möhtəşəm xalqımız bu Zəfəri ilə tarixə qızılı hərflərlə yeni səhifə yazdı. Bu dəmir yumruq xalqın gücünü, milli birliyini, vəhdətini, mübarizliyini bütün dünyaya bəyan etdi. Azərbaycan hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur.
Görüşdə Vətənimizin ərazi bütövlüyü uğrunda şəhid olmuş Camal Əliyevin həyatı və döyüş yolundan söhbət açıldı.
Camal Mehman oğlu Əliyev 2000-ci il dekabrın 17-də Cəlilabad şəhərində anadan olub. Azərbaycan Ordusunun əsgəri olan Camal Əliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə vuruşub. Camal Əliyev oktyabrın 14-də Füzuli döyüşləri zamanı qəhrəmancasına şəhid olub və rayonun Pərdi kənd qəbiristanlığında dəfn olunub.
Camal Əliyev Vətən müharibəsindəki xidmətlərinə görə Azərbaycan Prezidenti, Ali Baş Komandan İlham Əliyevin müvafiq sərəncamlarına əsasən ölümündən sonra “Vətən uğrunda”, “İgidliyə görə”, “Cəbrayılın azad olunmasına görə” və “Xocavəndin azad olunmasına görə” medalları ilə təltif edilib.
Şəhidin ailə üzvləri onlara göstərilən diqqət və qayğıya görə ölkə Prezidenti, Ali Baş Komandan İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Ərəstun ABDULOV,
“Respublika”.