Ölkəmizin ərazi bütövlüyünün bərpası, doğma torpaqlarımızın düşməndən təmizlənməsi uğrunda gedən döyüşlərdə canlarını vətən uğrunda fəda edərək xalqımıza qələbə sevinci yaşadan şəhidlərimiz hər zaman minnətdarlıqla anılacaqdır. Biləsuvar rayonunun Ağalıkənd kəndindən Vətən müharibəsində rəşadət və igidlik göstərərək şəhidlik zirvəsinə ucalan Məmmədov Elyar Elbəyi oğlunun xatirəsi ehtiramla anılıb. Qəhrəman şəhidimizin anım mərasimində Biləsuvar Rayon İcra Hakimiyyətinin başçısı Faiq Qürbətov, rayonun hüquq-mühafizə orqanlarının rəhbərləri və ictimaiyyətin nümayəndələri iştirak edirdilər. Tədbir iştirakçıları Elyar Məmmədovun məzarını ziyarət edib, üzərinə gül-çiçək düzüb ona Allahdan rəhmət, valideyninə səbir dilədilər. Mərasim iştirakçıları şəhidin ata ocağında valideynləri ilə görüşüb, qəhrəmanın yaşadığı evə vurulan xatirə lövhəsini açıblar. Anım mərasimində F.Qürbətov qeyd edib ki, Azərbaycan xalqının qüruru, fəxri olan şəhidlərimizin xatirəsi daim əziz tutulacaq. Dövlətimiz tərəfindən hər zaman şəhidlik zirvəsinə ucalan igidlərimizin ailələrinə diqqət və qayğı göstəriləcək. Elyar Elbəyi oğlu Məmmədov --22 avqust 1990-cı ildə Biləsuvar rayonunun Ağalıkənd kəndində anadan olub. Təzəkənd kənd tam orta məktəbində təhsilini başa vurduqdan sonra hərbi xidmətə yollanır. Hərbi xidmətdən sonra Elyar Azərbaycan Silahlı Qüvvələrinin müddətdən artıq həqiqi hərbi xidmət qulluqçusu olaraq çalışıb.
Elyar Məmmədov Vətən müharibəsində Füzuli, Cəbrayıl uğrunda gedən döyüşlərdə vuruşmuş, Füzulinin azad olunması uğrunda gedən döyüşlərdə qəhrəmancasına şəhid olmuşdur. O, 27 oktyabr 2020-ci il tarixində doğulduğu kəndin qəbiristanlığında torpağa tapşırılıb. Azərbaycanın ərazi bütövlüyünün təmin edilməsi əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Prezidenti İlham Əliyevin müvafiq sərəncamları ilə Elyar Elbəyi oğlu Məmmədov ölümündən sonra "Vətən uğrunda", "Füzulinin azad olunmasına görə" və "Cəsur döyüşçü" medalları ilə təltif edilmişdir.
Ərəstun ABDULOV,
“Respublika”.