Heydər Əliyev-100
Masallıda ulu öndər Heydər Əliyevin anadan olmasının 100 illiyinə həsr olunan silsilə tədbirlər ara vermir. Növbəti belə tədbir rayon Tarix-Diyarşünaslıq Muzeyində təşkil olunub. Yeni Azərbaycan Partiyası Masallı rayon təşkilatı, Heydər Əliyev Mərkəzi və Tarix-Diyarşünaslıq Muzeyi ərazi partiya təşkilatlarının dəstəyi sayəsində baş tutan “Heydər Əliyev Masallıda” adlı dəyirmi masada partiya veteranları, gənclər və media nümayəndələri iştirak edib.
Tədbir dahi şəxsiyyət, ümummilli lider Heydər Əliyevin və Azərbaycanın ərazi bütövlüyü uğrunda şəhidlik zirvəsinə ucalan qəhrəman Vətən oğullarının əziz xatirəsi bir dəqiqəlik sükutla yad edilməklə başlanıb.
Muzeyin direktoru, Əməkdar mədəniyyət işçisi, Azərbaycan Jurnalistlər Birliyinin üzvü Əntiqə Tağıyeva, YAP Masallı rayon təşkilatının sədri Seyfəddin Əliyev müstəqil Azərbaycan dövlətinin qurucusu, XX və XXI əsrlərin böyük siyasətçisi Heydər Əliyevin ölkəmizin inkişafı istiqamətində misilsiz xidmətlərindən, gərgin, yorulmaz fəaliyyətindən danışıb, ulu öndərin Masallı və masallılar haqqında söylədiyi dəyərli fikirləri xatırladıblar.
Çıxış edənlər ulu öndərlə bağlı xatirələrini söyləyib, Heydər Əliyevin Masallı ziyalıları və əmək adamları ilə görüş günlərini yaşayanlar kimi, özlərini xoşbəxt insan hesab etməklə qürur duyduğunu deyiblər.
Zəfər ORUCOĞLU,
Azərbaycan Jurnalistlər Birliyinin üzvü.