Tarixi qələbəmizin üstündən artıq iki ildən çox vaxt keçir. Azərbaycan öz gücünü İkinci Qarabağ müharibəsində dünyaya bir daha nümayiş etdirdi. Hazırda həmin bölgədə yenidənqurma işləri sürətlə davam edir. Doğma torpaqlarımız yenidən dirçəlir və yavaş-yavaş öz əzəli sakinlərinə qovuşur. Qarabağ bölgəsindəki tikililər, salınmış yollar regionda ilklərdən olacaq.
Artıq Ağalı kəndinə yüzlərlə həmyerlimiz təhlükəsiz yerləşdirilib. Digər bölgələrimizə, Laçına isə ilin sonuna qədər köçürülmə nəzərdə tutulub. Politoloq Amid Əliyev bildirir ki, hazırda Qarabağda ciddi işlər gedir: "İkinci Qarabağ müharibəsindən sonra Azərbaycan bölgədə irimiqyaslı yenidənqurma və bərpa işlərinə başladı. 30 il ərzində tamamilə dağıdılmış infrastruktur yenidən qurulur. Burada infrastruktur obyektləri və nəqliyyat yollarının çəkilməsi əsas hədəf kimi müəyyən olunub.
Bu işlər bir neçə əsas istiqamət üzrə aparılır. Birincisi, bölgədə müvafiq enerji mənbələrinin bərpası və yenidən qurulması işidir ki, burada sıradan çıxmış Su elektrik stansiyalarının qurulması, enerji mənbələrinin bərpası və yeni elektrik, su və qaz xətlərinin çəkilməsi ehtiva olunur.
Zəngilanda və Laçında yaradılmış yol infrastrukturu və hava limanları daha çox diqqəti cəlb edir. Ümumilikdə bölgədə yeni nəqliyyat mərkəzinin yaradılması ideyası uğurla icra edilir. Belə ki, Füzuli Hava Limanından sonra Laçın Hava Limanının işə salınması planlaşdırılır.
Bu da öz növbəsində Laçının sosial görünüşünü tamamilə dəyişəcək. Laçında hava limanının tikintisi olduqca strateji əhəmiyyət daşıyır. Buradan Türkiyə, Gürcüstan və eləcə də Cənub-Şərqi Avropa ölkələrinə uçuşların həyata keçirilməsi ümumilikdə bölgədə iqtisadi həyatın canlanmasına xidmət edəcək. Bundan əlavə, daşınan yüklərin böyük bir hissəsinin də məhz hava yolu ilə həyata keçirilməsi də məhz Laçın Hava Limanının üzərinə düşəcək. Bu, həm də Laçın rayonu sakinlərinin məşğulluq səviyyəsinə əhəmiyyətli şəkildə təsir etmiş olacaq. Laçının sürətli şəkildə yenidən qurulması və məskunlaşdırılmasının siyasi əhəmiyyəti də vardır.
Laçına yerli əhalinin qaytarılması Ermənistanın bu istiqamətdəki nəzəri iddialarını alt-üst edəcək və sərhədlərin müəyyən olunması məsələsinə də müsbət təsir göstərəcək. Laçın yolu ətrafında yaranmış vəziyyətin keyfiyyətcə yeni mərhələyə keçməsi də rayonun məskunlaşma siyasəti ilə öz həllini tapmış olacaq. Eləcə də Xankəndi və ətraf ərazilərdə yaşayan separatçı meyilli ermənilərin Laçının məskunlaşmasından sonra bölgədə manevr imkanları azalacaq. Çünki rayona əhali ilə yanaşı, dövlət orqanları da köçürüləcək. Bu da gələcəkdə çox asanlıqla Xankəndi və digər ərazilərin sürətli şəkildə Azərbaycan cəmiyyətinə reinteqrasiya prosesinə təsir göstərəcək. Əgər indiyə qədər Xankəndiyə yaxın ərazi kimi Şuşada irimiqyaslı işlər aparılırdısa, Laçının məskunlaşması və tam şəkildə dövlət orqanlarının orada təmin edilməsi ətraf ərazilərin də yaxın gələcəkdə qurulmasına imkan yaradacaq.
Qeyd olunanlarla yanaşı, Laçının yerləşdiyi ərazinin strateji əhəmiyyətini nəzərə alsaq, onda köçürmənin və iri strateji layihələrin burada sürətli şəkildə aparılmasının mahiyyətini anlamaq olur. Ölkə başçısının ötən gün verdiyi müsahibədən də məhz bu məqamları əxz etmək olur. Laçında həyatın bərqərar olması Azərbaycanın siyasi, iqtisadi sosial və hərbi məqsədlərinə tam uyğundur".
Töhfə SƏMƏDOVA,
"Respublika".
