Qardaşın qardaşdan başqa söykənəcəyi, etibar edib güvənəcəyi kimsəsi olmaz. Əgər arxanda dağ kimi dayanıb səni qoruyan qardaşın varsa, demək ki, kənar hücumlar, xəyanətlər elə o dağın kölgəsində də əriyib gedəcək. Biz bu fikirləri təsadüfdən və yaxud da gəldiyimiz qənaətdən söyləmirik. Bu, bizim dövrümüzün, keçmiş və indimizin həyat reallıqlarıdır.
Qloballaşan, çətinləşən mürəkkəb dünya düzənində Azərbaycan-Türkiyə dostluğu təkcə bir millət, iki dövlət məfhumunu ehtiva etmir. Həm də çiyin-çiyinə, Osmanlı türkcəsi ilə desək, omuz-omuza söykənmiş iki qardaşın gücünü, yüksəlişini göstərir. Bizim Türkiyə ilə qardaşlığımız, doğmalığımız dünənin, bu günün məsələsi deyil. Bu, kökümüzün, soyumuzun, sonumuzun birləşib, mükəmməlləşən bir tarixində əks olunur. Ulu öndər Heydər Əliyev bu qardaşlığı təcəssüm etdirən fikrini belə ifadə edirdi: "Bir millət, iki dövlət". Zaman-zaman tarixin kəhkəşanlı, təlatümlü məqamlarında bizləri parçalayıb ayırmağa çalışsalar da daxilimizdəki doğmalıq buna imkan verməyib. Bu bölünmələr, parçalanmalar yalnız ərazi, məsafə üzərində olub. Ürəyimizdəki qardaş sevgisi isə heç zaman itməyib, əksinə, məsafələri, sərhədləri adlayıb, əzib öz ünvanına yetişib. Sevgi ümmanında bir pərvəriş tapıb.
Türkiyə dövlətinin böyük oğlu Mustafa Kamal Atatürk Azərbaycanın kədərini özlərinin kədəri, sevincini isə öz sevincləri hesab etmişdir. Əslində, hər iki şəxsiyyətin, istər Heydər Əliyevin, istərsə də Mustafa Kamal Atatürkün söylədiyi fikirlər gələcək Türk dünyasının, Türk gəncliyinin stimulu, mayakıdır. İndi bizim münasibətlərin fonunda bir çox türkdilli ölkələr hərəkətə, həvəsə gəlib. Onlar da bu dostluğu, qardaşlığı özlərinə nümunə, örnək bilirlər. Artıq bütün Türk dünyası Azərbaycan-Türkiyə qardaşlığından bəhrələnir. Özünün inkişaf, təkamül dövrünü yaşayır. Bu yüksəliş təkcə münasibətlərdə deyil, eyni zamanda sosial-iqtisadi, neft sənayesi, qeyri-neft sektoru, enerji, mədəniyyət sahəsində də özünün yüksək mərhələsindədir.
2020-ci il, 44 günlük Vətən müharibəsi zamanı Türkiyə dövlətinin xalqımıza olan mənəvi və diplomatik dəstəyi hər bir azərbaycanlının yaddaşındadır. Xain, düşmən mövqeyində duran ölkələrin bizə qarşı hücumu zamanı Türkiyə öz qardaşlıq gücünü göstərərək: "Can Azərbaycan tək deyil meydanda. Biz varıq", - dedi.
Bu il fevral ayının 6-da Türkiyədə baş verən zəlzələ zamanı ilk köməyə tələsən, öz maddi-mənəvi köməyini göstərən də Azərbaycan oldu. Xalqımız hamılıqla ayağa qalxdı. Gücü çatan, çatmayan bütün köməklikləri göstərməyə, Türkiyədəki qardaş-bacılarımıza dəstəyə tələsdi. Dərdlərini, ağrılarını özümüzünkü bildik. Ağlayanda ağladıq, güləndə güldük. Şükürlər olsun ki, çətin günləri arxada qoyub yeni, daha gözəl, işıqlı sabahlara birgə addımlayırıq.
May ayının 28-də keçirilən prezident seçkilərində türk milləti öz düzgün seçimini etdi. Ölkənin yaradılmasının 100 illik ildönümünə ən etibarlı töhfə oldu. Ölkə üç aya yaxın bir zamanda davam edən gərgin mübarizənin sonunu qalibiyyətlə başa vurdu. Hər zaman bütün Türk dünyasına arxa olan, Azərbaycanı özünə qardaş bilib öz dəstəyini göstərən Rəcəb Tayyib Ərdoğan seçkilərdə qalib gələrək Türkiyənin 13-cü prezidenti seçildi. Beləcə, qardaş ölkədə yeni yüzilliyin və yeni eranın başlanğıcı qoyuldu.
Bu seçkidə Azərbaycan xalqı və dövləti Rəcəb Tayyib Ərdoğanı dəstəklədi və öz qardaşlıq dəstəyini göstərdi. Ölkə başçımız İlham Əliyev Türkiyə prezidentini qələbə münasibətilə ilk təbrik edən dövlət rəhbəri oldu. Eyni zamanda hər bir Azərbaycan vətəndaşı bu qələbəni öz uğuru hesab etdi. Ölkəmizdə böyük coşqu yaşandı. Paytaxt sakinləri qələbəni qeyd etmək üçün küçələrə axışdı. Bu, həm də bütün Türk dünyasının qələbəsi, gələcək inkişafına böyük təkan idi.
İyunun 3-də Türkiyədə keçirilən andiçmə mərasimində iştirak etmək üçün dünyanın bir çox liderləri və siyasətçiləri gəlmişdi. 21 dövlət başçısı, 13 baş nazir, beynəlxalq təşkilatların nümayəndələri, o cümlədən Türk Dövlətləri Təşkilatı, NATO və İslam Əməkdaşlığı Təşkilatının rəhbərləri qatılmışdı. Böyük izdihamla baş tutan mərasimdə Azərbaycan Respublikasının Prezidenti İlham Əliyev və birinci xanım Mehriban Əliyeva da iştirak edirdi. Belə bir gündə qardaş yanında olub, onun uğuruna sevinmək bizim üçün də şərəf idi. Əlbəttə ki, məclisdə ölkəmizə olan münasibət, ayrıca sevgi və diqqət də nəzərəçarpacaq dərəcədə böyük idi. Mərasimdə ön sıranın mərkəzində Azərbaycan və Türkiyənin birinci xanımları və hər iki dövlətin prezidentləri əyləşmişdi. Prezident Rəcəb Tayyib Ərdoğan mərasimdə çıxışı zamanı Azərbaycan Respublikasının Prezidenti İlham Əliyevə xüsusi minnətdarlığını bildirdi. Hər zaman, istər çətin günlərdə, istərsə də sevincli günlərində ölkəsinin yanında olan, maddi və mənəvi dəstəyini göstərən ölkə başçımıza təşəkkür etdi. Ərdoğan "Dəyərli qardaşım, Azərbaycan Prezidentinə "Xoş gəldin" deyir, təşrif buyurduğu üçün təşəkkür edirəm", - deyə nitqinə davam etdi. Ərdoğanın Azərbaycan Prezidenti İlham Əliyevə qarşı xüsusi münasibəti və səmimi görüşməsi qonaqların alqışına səbəb oldu. Təbii ki, bu, iki qardaş dövlətin rəhbərlərinin bir-birinə qarşı olan doğma, isti münasibətindən irəli gəlir. Hər iki ölkə başçısı yaxşı gündə də, çətin gündə də bir-birinin yanında olmuş, çiyin-çiyinə hər bir çətinliyin öhdəsindən gəlmişdir.
Türkiyədə 13-cü prezident seçkilərinin andiçmə mərasimi həm də bir dostluq, qardaşlıq mərasimi idi. Bu mərasim vasitəsilə Türkiyə və onun başçısı bir çox dövlətlərə öz mesajını ötürmüş oldu. Ərdoğan öz çıxışı ilə bir daha tarix yazdı. Mərasim həm də böyük dövlətlərə yaxşı mənada dərs vermiş oldu. Hər bir dövlət anlamış oldu ki, Azərbaycan-Türkiyə birliyi regional güc mərkəzi olmaqla yanaşı, həm də Türk Dövlətləri Təşkilatının əsas istiqamətləndirici və güc faktoruna çevrilib. Hər iki qardaş dövlət bu gün dünyanın ən mühüm iqtisadi logistik mərkəzinə çevrilmişdir.
Ramidə YAQUBQIZI,
"Respublika".
