Daim xalqına, millətinə bağlı olan, ziyalılara xüsusi məhəbbətlə yanaşan ulu öndər Heydər Əliyevin təşkilatçılığı ilə 1982-ci ildə Azərbaycan ədəbiyyatının filosof şairi, böyük dramaturq Hüseyn Cavidin nəşi Sibirdən Naxçıvana gətirilmiş, evinin qarşısında torpağa tapşırılmış və 1996-cı ildə məzarı üzərində şairə olan ehtiramı əks etdirən məqbərə ucaldılmışdır.

Məqbərənin layihə müəllifi Azərbaycan Respublikasının əməkdar memarı Rasim Əliyev, heykəltəraşı isə xalq rəssamı Ömər Eldarovdur. Hələ o vaxt Cavidsevərlər dahi şairin nəşinin vətənə gətirilməsinə görə Heydər Əliyevə minnətdarlıq etdilər. Bu, xalq qarşısında həqiqətən müqayisəsi, bənzəri olmayan, misilsiz bir xidmət kimi həmişə yüksək dəyərləndirilir.