Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə rəşadətli Azərbaycan Ordusu böyük şücaət və yüksək döyüş hazırlığı göstərərək 27 sentyabr 2020-ci il tarixdən başlayaraq 44 gün müddətində torpaqlarımızı işğaldan, düşmən tapdağından azad etdi. Vətən müharibəsində tarix yazan qəhrəman Ordumuz, əsgər və zabitlərimiz Azərbaycanın haqq uğrunda mübarizə aparmaq əzmini, əsl döyüş ruhunu bütün dünyaya nümayiş etdirdi.
Biləsuvar rayonundan, Vətən müharibəsində böyük rəşadət və igidlik göstərərək şəhidlik zirvəsinə ucalan Məcidzadə Saleh Nəriman oğlunun və Ağayev Saleh Nurəddin oğlunun xatirəsi ehtiramla anıldı.
Qəhrəman şəhidlərimizin anım mərasimlərində iştirak edən Biləsuvar Rayon İcra Hakimiyyətinin başçısı Faiq Qürbətov, rayonun hüquq-mühafizə orqanlarının rəhbərləri və ictimaiyyətin nümayəndələri şəhidlərin məzarlarını ziyarət edib üzərinə tər qərənfillər düzdülər. Ata ocağını ziyarət edib valideynləri ilə görüşdülər. Mərasimlərdə qəhrəmanlarımızın şərəfli döyüş yolundan danışılaraq xatirələri anılaraq, bildirildi ki, Azərbaycan xalqının qüruru, fəxri olan şəhidlərimiz bundan sonra da daim əziz tutulacaq və dövlətimiz hər zaman şəhidlik zirvəsinə ucalan igidlərimizin ailələrinin yanında olacaqdır. Qeyd edək ki, tədbir zamanı şəhidlərin yaşadıqları evlərə vurulan xatirə lövhələrinin açılışı da oldu.
Məcidzadə Saleh Nəriman oğlu 16 iyul 1994-cü ildə Biləsuvar rayonunun Nəsimikənd kəndində anadan olub. 2011-ci ildən universal idman növü ilə məşğul olmağa başlayıb. O, qatıldığı bütün idman yarışlarının qalibləri cərgəsində olub. Ordu idman növləri üzrə keçirilən yarışlarda yüksək nəticələr əldə edib.
2015-ci ildə həqiqi hərbi xidmətə çağırılaraq Qusar rayonunda kəşfiyyat bölməsində xidmət edib. 2017-ci ildən xüsusi təyinatlı qüvvələrdə gizir kimi hərbi xidmətini davam etdirib.
Saleh Mirzəzadə Aprel döyüşlərində və Tovuzda düşmən diversiya qrupunun məhv edilməsində göstərdiyi igidliyə görə komandanlıq tərəfindən təltif edilib.
S.Məcidzadə Azərbaycan Respublikasının ərazi bütövlüyü uğrunda 27 sentyabr 2020-ci il tarixdən Vətən müharibəsinə qatılaraq bir çox döyüşlərdə qəhrəmanlıq göstərib. O, 11 oktyabr 2020-ci ildə Cəbrayıl rayonunun Daş Veysəlli kəndinin düşməndən azad olunması zamanı gedən ağır döyüşlərdə qəhrəmancasına şəhid olub. 12 oktyabr 2020-ci ildə doğulub boya-başa çatdığı Nəsimi kənd kəndində dəfn olunub.
Ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə, şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin Sərəncamları ilə Saleh Nəriman oğlu Məcidzadə ölümündən sonra "Azərbaycan Bayrağı" ordeni, "Vətən uğrunda","Cəbrayılın azad olunmasına görə", "Füzulinin azad olunmasına görə", “Kəlbəcərin azad olunmasına görə" medalları ilə təltif edilmişdir.
Ağayev Saleh Nurəddin oğlu 30 aprel 1992-ci ildə Biləsuvar rayonunun Günəşli kəndində anadan olmuşdu. Azərbaycan Silahlı Qüvvələrinin kiçik giziri Saleh Ağayev Azərbaycan Respublikasının ərazi bütövlüyü uğrunda 27 sentyabr 2020-ci il tarixdən başlayan Vətən müharibəsində, Cəbrayıl rayonu istiqamətində gedən döyüşlərdə vuruşmuş və düşmən hücumunun qarşısını alarkən qəhrəmancasına şəhid olmuşdur. Şəhid Saleh Ağayev 12 oktyabr 2020-ci il tarixdə Biləsuvar rayonunun Günəşli kənd qəbiristanlığında dəfn olunmuşdur.
Azərbaycan Prezidenti İlham Əliyevin müvafiq sərəncamları ilə ölkəmizin ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Saleh Nurəddin oğlu Ağayev ölümündən sonra "Vətən uğrunda", "Cəbrayılın azad olunmasına görə", "Hərbi xidmətlərə görə" və "Xocavəndin azad olunmasına görə" medalları ilə təltif edilmişdir.
Ərəstun ABDULOV,
“Respublika”.
