ABŞ, CƏNUBİ KOREYA VƏ YAPONİYA LİDERLƏRİNİN GÖRÜŞÜ KEÇİRİLƏCƏK

Yaponiyanın baş naziri Fumio Kisida may ayının ikinci yarısında “Yeddilər qrupu”nun (G7) Xirosima şəhərində baş tutacaq sammitində ABŞ prezidenti Cozef Bayden və Cənubi Koreya lideri Yun Sok Yol ilə  görüş keçirməyi planlaşdırır. Bu barədə “TRT” telekanalının məlumatında qeyd olunur.

Eyni zamanda, Yaponiyanın “Kyodo” agentliyinin xəbərinə görə, adının açıqlanmasını istəməyən yüksək səviyyəli ABŞ səlahiyyətlisi üçtərəfli görüşün dəqiq tarixi ilə bağlı məlumat verməyib.

Digər tərəfdən diplomatik mənbələrdən əldə edilən məlumata görə, sammit mayın 21-də, “G7” liderlərinin zirvə toplantısının son günündə keçirilə bilər. Mənbələr həmçinin Cozef Baydenin sammitdən sonra Avstraliyaya səfər edəcəyini bildirib.

Bununla yanaşı, Yaponiya mediasının açıqlamasına əsasən, baş nazir Fumio Kisida “G7” sammitindən əvvəl Cənubi Koreyaya rəsmi səfər təşkil edə bilər, Yun Sok Yol isə “G7” liderlər zirvə toplantısına “müşahidəçi” kimi dəvət oluna bilər.

BMT: 100 MİNDƏN ÇOX İNSAN SUDANI TƏRK EDİB

Sudanda münaqişə başlayandan bəri 100 mindən çox insan ölkəni tərk edərək qonşu dövlətlərə üz tutub. “Trend” agentliyinin Türkiyə mətbuatına istinadən verdiyi xəbərə görə, bunu BMT-nin qaçqınların işləri üzrə nümayəndəsi Olqa Sarrado bəyan edib.

Təşkilat rəsmisi bil

dirib ki, hazırda 24 min qaçqının şəxsiyyəti müəyyən edilib: “Onlara həm sudanlı qaçqınlar, həm də Cənubi Sudandan qayıdan qaçqınlar, eləcə də əcnəbilər daxildir. Qaçqınların əksəriyyəti qadınlar və uşaqlardır”.

Məlumat üçün qeyd edək ki, Suveren Şuraya rəhbərlik edən Sudan ordusunun komandanı Əbdül Fəttah əl-Burhanla həmin şurada onun müavini olan xüsusi təyinatlı qüvvələrin başçısı Məhəmməd Həmdan Daqalo arasında fikir ayrılığı səbəbindən ölkədə vəziyyət gərginləşib.

Xatırladaq ki, aprelin 15-də Merove şəhərindəki hərbi baza yaxınlığında və paytaxt Xartumda iki güc strukturu arasında toqquşmalar başlayıb. Sudan Səhiyyə Nazirliyinin məlumatına görə, ölkədə toqquşmalar nəticəsində ölənlərin sayı 528-ə çatıb, 4600-ə yaxın yaralı var.

CON KİRBİ: ABŞ UKRAYNAYA TƏLƏB OLUNAN YARDIMIN 100 FAİZİNİ TƏHVİL VERİB

“ABŞ Kiyevin Ukraynaya əks-hücum əməliyyatı üçün tələb etdiyi hərbi yardımın demək olar ki, 100 faizini təhvil verib, lakin tədarük davam edəcək”. “Report” agentliyinin məlumatına görə, bunu Ağ Evin Milli Təhlükəsizlik Şurasının sözçüsü Con Kirbi bəyan edib.

“Ukraynalılarla yazda planlaşdırdıqları hücum üçün ehtiyacları barədə apardığımız müzakirələrə əsasən, biz həmin siyahıda olanların demək olar ki, hamısını təhvil vermişik”, - deyə Ağ Ev rəsmisi vurğulayıb.

Con Kirbinin sözlərinə görə, ABŞ Ukraynaya həm maddi yardımı, həm də ukraynalı hərbçilərin hazırlığını davam etdirəcək: “Bu, təkcə silaha malik olmanın deyil, həm də onlardan istifadə etmək bacarığının birləşməsidir”.

Eyni zamanda, Con Kirbi əlavə edib ki, ABŞ administrasiya qarşıdakı günlərdə və həftələrdə Ukraynaya yeni müdafiə yardım paketləri üçün Senatın dəstəyini alacağına ümid edir.

HİNDİSTAN ŞƏKƏR İXRACINI QADAĞAN EDƏ BİLƏR

Hindistan hökuməti gələn il keçiriləcək parlament seçkiləri ərəfəsində şəkərin istehsalının azalması və inflyasiya təzyiqinin qarşısını almaq üçün onun ixracını qadağan etməyi planlaşdırır. “Report” agentliyinin verdiyi xəbərə görə, bu barədə Hindistan hökumətindəki mənbəyə istinadən “Wion” telekanalı məlumat yayıb.

Bildirilir ki, hazırda ölkədə gözlənilən 27,5 milyon ton daxili istehlak tələbini ödəmək üçün kifayət qədər şəkər var, lakin bu il ştat seçkiləri və gələn il Hindistan parlamentinin aşağı palatası üçün seçkilər ərəfəsində hökumət risk etmək istəmir.

Açıqlamaya əsasən, artıq bir qrup nazir dəyirmanlara şəkərin xaricə göndərilməsini dərhal dayandırmağı tövsiyə edib.

Hindistanda şəkərin orta pərakəndə satış qiyməti bir il əvvəl 41,31 rupi olduğu halda, hazırda 42,24 rupidir. 2022-23-cü kənd təsərrüfatı ilində ölkədə əvvəlki kənd təsərrüfatı ilində istehsal edilmiş 35,9 milyon ton şəkərlə müqayisədə 32,7 milyon ton şəkər istehsalı gözlənilir.

Bununla yanaşı, rəsmi məlumatlara görə, cari il üçün müəyyən edilmiş sabit kvotaya uyğun olaraq şəkərin böyük hissəsi artıq daşınsa da, 200 min tona yaxın şəkər hələ də ixrac olunmayıb.

İRANA QARŞI SANKSİYALARIN MÜDDƏTSİZ OLMASI TƏKLİF EDİLİR

İrana qarşı müddətsiz sanksiyaların tətbiqi ilə bağlı ABŞ Konqresində qanun dəyişikliyi ilə bağlı təşəbbüs irəli sürülüb. “Sputnik” informasiya agentliyinin verdiyi xəbərə görə, bu barədə Konqresin Nümayəndələr Palatasının Xarici Əlaqələr Komitəsinin sədri, təşəbbüsün müəllifi Maykl Makkalın mətbuat xidməti məlumat verib.

Açıqlamaya görə, ABŞ prezidentinə İran iqtisadiyyatına qarşı sərt sanksiyalar tətbiq etməyə icazə verən qanunun müddətsiz olması ilə bağlı həm Demokrat, həm də Respublikaçılar partiyalarından olan amerikalı siyasətçilər Konqresin hər iki palatasında təkliflə çıxış ediblər.

Qeyd olunub ki, İrana qarşı sanksiyaları sərtləşdirmək, iqtisadiyyatın bir çox sahələrini əhatə edən sanksiyalar tətbiq etməkdə məqsəd bu ölkənin enerji sektoru ilə yanaşı digər sahələrinə də zərbə vurmaqdır və bunun üçün ABŞ prezidentinin səlahiyyətlərini daha da artırmaq lazımdır.

Xatırladaq ki, əvvəllər də bu kimi təşəbbüslər irəli sürülsə də, Konqresin hər iki palatası tərəfindən qəbul edilməyib.

D.PESKOV: TAXIL SAZİŞİNİN RUSİYA İLƏ BAĞLI ŞƏRTLƏRİ YERİNƏ YETİRİLMƏYİB

Rusiya kənd təsərrüfatı sektorunun bir hissəsinə aid olan taxıl müqaviləsinin şərtləri yerinə yetirilməyib. “Sputnik” informasiya agentliyinin verdiyi xəbərə görə, bunu Kremlin rəsmi nümayəndəsi Dmitri Peskov bəyan edib.

Eyni zamanda, danışıqların həqiqətən də mayın 3-də bütün tərəflərin iştirakı ilə baş tutub-tutmayacağı ilə bağlı suala o dialoqun davam edəcəyini bildirib.

“Müqavilə keçən dəfə 60 günlük uzadılmışdı. Bu, vaxt məhdudiyyətli qərardır, sövdələşmənin əvvəldən müəyyən edilmiş, lakin icra olunmayan elementləri, təəssüf ki, hamıya məlumdur”, - deyə Dmitri Peskov vurğulayıb.

Məlumat üçün qeyd edək ki, taxıl müqaviləsinin müddəti mayın 18-də başa çatır. “Röyters” agentliyi bütün tərəflərin iştirakı ilə bu məsələ ilə bağlı danışıqların mayın 3-də aparılacağını bildirib. Nəşrin açıqlamasına görə, görüş zamanı nəticə əldə etmək mümkün olacaq.

NYU-YORKDA SİLAHLANMAYA QARŞI MÜBARİZƏ KAMPANİYASI BAŞLADILIB

ABŞ-ın Nyu-York ştatında fərdi silahlanmaya qarşı mübarizə kampaniyası başladılıb. “Teleqraf.com”un xəbərinə görə, Nyu-Yorkda başladılan kampaniyada silahlarını təhvil verənlərə 500 dollarlıq hədiyyə sertifikatı təqdim olunur.

Bununla yanaşı, birdən çox silah gətirənlərə əlavə 150 dollarlıq hədiyyə sertifikatı veriləcək. Bildirilir ki, kampaniya başlayandan indiyədək artıq 3000-dən çox silah yığılıb.

Verilən xəbərə əsasən, odlu silahların yığılması üçün ştatda doqquz məntəqə yaradılıb. Məlumata görə, təhvil verilən silahların əksəriyyəti ştatdan kənar əyalətləri əhatə edir.

Hazırladı:

Vamiq ABBASOV,

“Respublika”.