VLADİMİR PUTİN RUSİYANIN  YENİ KONSEPSİYASINI QƏBUL EDİB

Rusiya prezidenti Vladimir Putin martın 31-də Təhlükəsizlik Şurasının daimi üzvləri ilə görüşündə ölkəsinin yeni xarici konsepsiyasını qəbul edib. Bu barədə “Report” agentliyinin məlumatında qeyd olunur.

Vladimir Putin bildirib ki, beynəlxalq aləmdə baş verən köklü dəyişikliklər Rusiyanın xarici siyasət konsepsiyasına ciddi düzəlişlər etməyi tələb edir.

Məlumata əsasən, yeni konsepsiyada ABŞ anti-Rusiya xəttinin əsas təşəbbüskarı kimi təqdim olunub.

Eyni zamanda, sənəddə dövlətlərin suverenlik hüquqlarına hörmət ifadə edilib.

Yeni xarici siyasət konsepsiyası həmçinin Rusiyaya qarşı təhdidlərə simmetrik və asimmetrik reaksiyaları ehtiva edir. Bununla yanaşı qeyd edilir ki, dost olmayan ölkələrin anti-Rusiya addımlarına lazım gələrsə, ciddi cavab veriləcək.

Verilən xəbərə əsasən, sənəddə Çin və Hindistanla strateji tərəfdaşlıq elan edilib.

TÜRKİYƏ TAXIL SAZİŞİNİN EFFEKTİVLİYİNİ TƏMİN ETMƏYƏ DAVAM EDƏCƏK

Türkiyə taxıl sazişinin effektiv şəkildə həyata keçirilməsini təşviq etməyə davam edəcək. “Sputnik” informasiya agentliyinin verdiyi xəbərə görə, bunu Türkiyənin xarici işlər naziri Mövlud Çavuşoğlu bildirib.

Məlumata əsasən, nazir diqqəti Ukraynadakı münaqişə səbəbindən qlobal təchizatla bağlı problemlərin kritik həddə çatdığına yönəldib.

Mövlud Çavuşoğlunun sözlərinə görə, BMT-nin Qara Dəniz Taxıl Təşəbbüsü dünyanın bir çox təsərrüfatlarına yardım edir.

“Biz onun effektiv şəkildə həyata keçirilməsi üçün səylərimizi davam etdirəcəyik”, - deyə Çavuşoğlu vurğulayıb.

Xatırladaq ki, ötən il Rusiya, Türkiyə, Ukrayna və BMT nümayəndələri tərəfindən imzalanan taxıl sazişi Ukrayna taxılının, ərzaq və gübrəsinin Qara dəniz vasitəsilə Odessa da daxil olmaqla üç limandan ixracını nəzərdə tutur. Gəmilərin hərəkətinin koordinasiyasına İstanbulda birgə koordinasiya mərkəzi cavabdehdir.

MACARISTANIN BAŞ NAZİRİNDƏN DÜNYA MÜHARİBƏSİ XƏBƏRDARLIĞI

Macarıstan baş naziri Viktor Orban Ukraynadakı müharibənin narahatedici və təhlükəli olduğuna diqqət çəkib. “Teleqraf.com”un xəbərinə görə, baş nazir yeni və daha güclü silahların istifadəsi ilə bağlı getdikcə daha çox qərarların verildiyini və Qərbin Ukraynaya daha müasir texnika göndərməkdə davam etdiyini bəyan edib.

“ABŞ və Avropa liderləri tərəfindən Ukrayna ətrafında vəziyyət belə davam edərsə, Üçüncü Dünya müharibəsi olacaq kimi bəyanatlar səslənir. İlk baxışdan bu, inandırıcı görünməsə də,  mənə elə gəlir ki, indiki vəziyyət üçün bu real  təhlükədir”, - deyə Orban vurğulayıb.

Macarıstanın baş naziri əlavə edib ki, müharibə getdikcə daha qanlı və amansız xarakter alır, lakin sülhü dəstəkləyən Avropa ölkələrinin və liderlərinin sayı hələ də artmayıb.

Viktor Orban həmçinin qeyd edib ki, Avropa liderləri artıq sakit şəkildə Avropa İttifaqı ölkələrinin Ukraynaya sülhməramlı qüvvələr göndərə biləcəkləri barədə danışırlar. O, xəbərdarlıq edib ki, bu, artıq növbəti mərhələyə keçid olacaq.

“TALİBAN” ORDUSUNUN SAYINI 200 MİN NƏFƏRƏ ÇATDIRMAQ NİYYƏTİNDƏDİR

“Taliban” hərəkatı Əfqanıstan ordusunda əsgər sayını 200 min nəfərə çatdırmaq niyyətindədir. “Report” agentliyinin məlumatına görə, bunu hərəkatın formalaşdırdığı Əfqanıstan Silahlı Qüvvələrinin baş qərargah rəisi Kari Fəsihəddin Fitrət bildirib.

“Biz gələn il orduda əsgər sayını 150 mindən 170 minə, tədricən isə 200 min nəfərə çatdırmaq qərarına gəldik”, - deyə baş qərargah rəisi vurğulayıb.

Bununla yanaşı, ordu rəsmisi ABŞ-ı ölkənin hava məkanını dəfələrlə pozduğuna görə tənqid edib.

Qeyd edilir ki, hazırda “Taliban” ordusunda əsgər sayı təxminən 150 min nəfərdir. Ordunun arsenalı 2021-ci ildə “Taliban” tərəfindən ələ keçirilən Əfqanıstan Milli Ordusunun texnikasından ibarətdir ki, bu da ABŞ tərəfindən Kabilə verilib.

NATO-nun BAŞ KATİBİ TÜRKİYƏNİN QƏRARINI ALQIŞLAYIB

NATO-nun baş katibi Yens Stoltenberq Türkiyə Böyük Millət Məclisinin Finlandiyanın NATO-ya üzvlüyü ilə bağlı qanun layihəsini qəbul etməsini alqışlayıb. “Report” agentliyinin verdiyi xəbərə görə, bu barədə baş katib “Twitter” hesabında qeyd edib.

“Türkiyə Böyük Millət Məclisinin Finlandiyanın NATO-ya üzvlüyünün ratifikasiyasını başa çatdırmaq üçün səsverməsini alqışlayıram. Bu, bütün NATO ailəsini daha güclü və təhlükəsiz edəcək”, - deyə Yens Stoltenberq vurğulayıb.

Məlumat üçün qeyd edək ki, Finlandiyanın NATO-ya üzvlük protokolunun təsdiqi ilə bağlı qanun layihəsi Türkiyə Böyük Millət Məclisinin Baş Assambleyasında qəbul edilib.

Xatırladaq ki, İsveç və Finlandiya bir neçə ay əvvəl NATO-ya üzv olmaq üçün ərizə ilə müraciət edib. Türkiyə onların quruma üzvlüyü üçün terrorçuları dəstəkləməmələri ilə bağlı şərt irəli sürüb.

ABŞ SENATINDAN TÜRKİYƏ VƏ SURİYA İLƏ BAĞLI QƏTNAMƏ LAYİHƏSİ

ABŞ Senatı  Türkiyə və Suriyada fevralın 6-da baş verən zəlzələ ilə bağlı qətnamə layihəsi qəbul edib. Bu barədə “TRT” telekanlı məlumat yayıb.

Verilən xəbərə əsasən, qətnamə layihəsində zəlzələlənin 1939-cu ildən bəri Türkiyədə baş verən ən güclü zəlzələ olduğu, çox sayda insanın həyatını itirdiyi və minlərlə insanın zərər çəkdiyi xatırladılıb.

ABŞ-ın zəlzələlərdən zərər çəkmiş Türkiyə və Suriya xalqlarına dəstəyinin də qeyd edildiyi qətnamədə senatorlar ABŞ hökumətini Türkiyənin yerli hakimiyyət orqanları və Suriyadakı beynəlxalq səviyyədə tanınmış qurumlarla koordinasiyalı şəkildə yenidənqurma səylərini dəstəkləməyə çağırıblar.

ABŞ hökumətinin NATO müttəfiqi Türkiyəyə struktur mühəndisləri, tibb işçiləri və ləvazimatları, eləcə də texniki ekspert dəstəyi verməyə dəvət olunduğu qətnamə layihəsində BMT Təhlükəsizlik Şurasının suriyalılara yardımların çatdırılması üçün alternativ sərhəd keçidlərinin təmin edilməsinə çağırış ünvanlanıb.

İLON MASK: BİR SIRA ÖLKƏLƏR DOLLARDAN İMTİNA ETMƏK İSTƏYİR

Bir sıra ölkələr “ABŞ-ın çox sərt siyasəti” səbəbindən dollardan imtina etmək istəyirlər. “Sputnik” informasiya agentliyinin verdiyi xəbərə görə, bunu amerikalı iş adamı İlon Mask bildirib.

Məlumata görə, “Twitter” istifadəçisinin dolların ehtiyat valyuta statusunu itirməsi ilə bağlı şərhinə cavab olaraq İlon Mask qeyd edib ki, bir sıra ölkələrin ABŞ valyutasından imtina etmək istəyi “ciddi problemdir”.

Qeyd edilir ki, bu ərəfədə ABŞ Konqresində Ukrayna böhranının Amerika iqtisadiyyatı üçün mənfi nəticələrə səbəb ola biləcəyindən narahatlıq ifadə edilib.

Xatırladaq ki, Rusiya Federasiyası Təhlükəsizlik Şurasının katibi Nikolay Patruşev bir müddət öncə ABŞ-ı defolt gözləyə biləcəyini irəli sürmüşdü. Onun sözlərinə görə, bu, 31,5 trilyon dollarlıq xarici borcun olması və Vaşinqtonun bütün iqtisadi problemləri həll etmək üçün “çap dəzgahı”nı işə salması ilə bağlıdır.

Hazırladı:

Vamiq ABBASOV,

“Respublika”.