Konqo Respublikası Afrikanın ən böyük ölkələrindən hesab edilir və indiyə qədər Azərbaycanla Konqo arasındakı münasibətlər elə də yüksək səviyyədə olmamışdır. Lakin BMT-dən sonra ikinci ən böyük beynəlxalq təşkilat olan Qoşulmama Hərəkatına ölkəmizin sədrlik etdiyi dönəmdə Prezident İlham Əliyevin neokolonialzmə, müstəmləkəçiliyə qarşı apardığı mübarizə digər ölkələrlə olduğu kimi, Konqo ilə də münasibətlər yüksək səviyyədə qurulub. Azərbaycana artan maraq bu Afrika ölkəsinin də respublikamızla siyasi, iqtisadi əlaqələr qurmasını vacib edib.

Bu günlərdə ölkəmizdə rəsmi səfərdə olan Konqo Respublikasının Prezidenti Deni Sassu-Nqesso yüksək səviyyədə qəbul olunmuş, ikitərəfli və geniştərkibli görüşlər keçirilmişdir. Görüşlər başa çatdıqdan sonra  hər iki ölkənin dövlət başçıları mətbuata bəyanatla çıxış etmişlər.

Azərbaycanla Konqo arasında imzalanmış əməkdaşlıq haqqında Bəyannaməni  çox mühüm və sanballı sənəd adlandıran Prezident İlham Əliyev çıxışında qeyd etmişdir ki,  bu sənəd bizim əməkdaşlığımızın perspektivlərini müəyyən edəcək, Konqo ilə Azərbaycan arasında güclü dostluq əlaqələri yaradılacaqdır.

Dövlət başçımız qeyd etmişdir ki, bu ilin yanvar ayına qədər 4 il Qoşulmama Hərəkatına uğurla sədrlik etmiş Azərbaycan Konqonun dəstəyini hər zaman hiss etmişdir. Bizim təşəbbüslərimizə Konqo hər zaman öz dəstəyini vermişdir və bunun nəticəsində sədrliyimiz dövründə Qoşulmama Hərəkatının institusional inkişafı da təmin edilmişdir. Parlament şəbəkəsi, gənclər və qadınlar platformaları məhz sədrliyimiz dönəmində yaradılmışdır. Bu gün Qoşulmama Hərəkatı əvvəlki dövrlərə nisbətən daha güclü təşkilatdır. Bu təşkilatın dünya miqyasında və dünyada gedən proseslərdə oynadığı rolunun artırılması hesab edirəm ki, hamımızın marağındadır. Qoşulmama Hərəkatı BMT-dən sonra ikinci böyük təsisatdır, 121 üzvü var. Biz bu təsisatın, bu hərəkatın gələcək inkişafı ilə bağlı geniş fikir mübadiləsi aparmışıq.

Ölkəmizin Konqoda bir çox investisiya layihələrində iştirak etmək fikrində olduğunu qeyd edən ölkə başçısı bildirmişdir ki,  ilk növbədə, kənd təsərrüfatı, bərpaolunan enerji, energetika, mədənçilik və digər sahələrdə əməkdaşlıq üçün çox gözəl perspektivlər var.

Konqo Prezidenti Deni Sassu-Nqessonu COP29 tədbirində iştirak etmək üçün dəvət etdiyini qeyd edən cənab İlham Əliyev  bildirmişdir ki, Azərbaycan COP29-un prezidenti kimi bu tədbirə çox ciddi hazırlaşır və burada Konqo ilə ikitərəfli formatda və çoxtərəfli formatda əməkdaşlıq etmək hesab edirəm ki, məqsədəmüvafiq ola bilər.

Qeyd etmək lazımdır ki, Afrika ölkələrində Azərbaycana marağın yaranması  dövlətimizin və onun başçısının son illər həyata keçirdiyi siyasətin nəticəsidir. Müstəqil iradəyə söykənən bu siyasət müstəmləkəçiliyin və neokolonializmin hər cür təzahürünə qarşı ardıcıl mübarizənin tərkib hissəsidir.                                          

Natiq QULUZADƏ,

YAP Zəngilan rayon

təşkilatının sədri.