Bu ölkənin Bakıda keçirilmiş Mədəniyyət Günləri daha dərin əməkdaşlıq üçün yeni üfüqlər açdı

Azərbaycanla Belarus arasında münasibətlər dərin tarixi köklərə malikdir və hər iki ölkə müstəqilliyi əldə etməsi ilə yeni inkişaf mərhələsinə qədəm qoydu. 1993-cü ildə xalqın təkidli xahişi ilə hakimiyyətə qayıdan ulu öndər Heydər Əliyevin siyasi müdrikliyi və uzaqgörənliyi sayəsində möhkəm ikitərəfli münasibətlər quruldu. Heydər Əliyev beynəlxalq münasibətlərin, o cümlədən Belarusla strateji tərəfdaşlığın inkişafına böyük diqqətlə yanaşırdı. Dahi lider postsovet məkanında qloballaşma şəraitində və dəyişən geosiyasi landşaftda ölkələr arasında qarşılıqlı faydalı əlaqələrin sabitliyin və rifahın təmin edilməsinin açarı olacağını yaxşı bilirdi.

Belarusla ikitərəfli münasibətlərin qurulması istiqamətində Heydər Əliyevin siyasi strategiyası iqtisadiyyat, siyasət, mədəniyyət və təhsil sahələrində əməkdaşlığın genişləndirilməsini nəzərdə tuturdu. Bu səylər Azərbaycan Prezidenti İlham Əliyev tərəfindən uğurla davam və inkişaf etdirilmişdir. Ölkələr arasında strateji tərəfdaşlıq, dövlət başçıları səviyyəsində nümayiş etdirilən qarşılıqlı hörmət və etimad Heydər Əliyev siyasətinin uğurlu davamının parlaq nümunəsidir.

Bu gün ölkə prezidentləri İlham Əliyev və Aleksandr Lukaşenkonun səyləri sayəsində Azərbaycan ilə Belarus arasında münasibətlər keyfiyyətcə yeni səviyyəyə yüksəlib və qarşılıqlı fəaliyyətin geniş spektrini əhatə edir. Qarşılıqlı hörmət və anlaşma prinsipləri əsasında qurulan əlaqələr həm ikitərəfli, həm də daha geniş regional və beynəlxalq gündəlik kontekstində öz bəhrəsini verməkdədir.

Azərbaycan ilə Belarus arasında mədəni mübadilələr ikitərəfli münasibətlərin möhkəmləndirilməsində əsas rol oynayır və əməkdaşlıq əlaqələrinin genişləndirilməsinə, xalqlar arasında dostluq bağlarının möhkəmləndirilməsinə kömək edir.

1993-cü ildə Azərbaycan ilə Belarus arasında diplomatik əlaqələrin qurulmasından bəri mədəni mübadilə ikitərəfli əməkdaşlığın prioritet sahələrindən biri olmuşdur. Rəssamların, musiqiçilərin, yazıçıların və teatr kollektivlərinin nümayəndə heyətlərinin səfərləri gözəl ənənəyə çevrilmişdir.

Aprelin əvvəlində Bakıda keçirilmiş Belarus Mədəniyyət Günləri mədəni mübadilənin parlaq nümunəsi olaraq, Belarus mədəniyyətinin zənginliyini nümayiş etdirməklə yanaşı, həm də Azərbaycan xalqının qonaqpərvərliyini göstərmişdir. Belə tədbirlərin təşkili hər iki ölkənin mədəni əlaqələri inkişaf etdirmək və dərinləşdirmək istəyinin təzahürüdür ki, bu da öz növbəsində, xalqlar arasında ümumi anlaşmanı və dostluğu möhkəmləndirməyə xidmət edir.

Mədəniyyət Günləri və digər birgə mədəni tədbirlərin müsbət təcrübəsi nəzərə alınaraq, Azərbaycan və Belarus qarşısında mədəni dialoqu genişləndirmək üçün yeni üfüqlərin açıldığını qeyd etməliyik. Bu, birgə tədris proqramlarının hazırlanması və həyata keçirilməsi, gənclər və uşaq kollektivləri arasında mədəni mübadilələr, sərgilərin, festival və yaradıcı ustalıq dərslərinin təşkili daxil olmaqla uzunmüddətli və məhsuldar mədəni əməkdaşlığın təməli ola bilər.

Belarus Mədəniyyət Günləri Belarus incəsənəti və mədəniyyəti bayramı olmaqla yanaşı, həmçinin ölkələr arasında dostluq əlaqələrinin möhkəmlənməsinin vacib simvolu və mədəni dialoqun mühüm mərhələsi kimi yadda qalmışdır. Bu tədbirlər Azərbaycan vətəndaşlarına Belarusun zəngin mədəni irsi ilə daha yaxından tanış olmaq imkanı vermiş və strateji tərəfdaşlığımızın və qardaşlıq əlaqələrimizin növbəti təsdiqi olmuşdur.

Belarus Mədəniyyət Günlərinin açılış mərasimi Heydər Əliyev Sarayında baş tutmuş və hər iki ölkənin mədəniyyət xadimləri, ictimaiyyət nümayəndələri bir araya gəlmişlər. Tədbir çərçivəsində təqdim edilən geniş proqramda Belarusun əməkdar artistlərdən ibarət qruplarının və məşhur sənətçilərin çıxışları yer almışdır. Bu, yalnız Belarus sənətçilərinin məharətini nümayiş etdirmək deyil, həm də hər iki ölkənin sənətçiləri və mədəniyyət xadimləri arasında qarşılıqlı təcrübə mübadiləsi və əməkdaşlıq üçün unikal imkan yaratdı.

Mədəni əməkdaşlıq, hər iki ölkənin mədəniyyət nazirlərinin vurğuladıqları kimi, dövlətlərarası münasibətlərin möhkəmləndirilməsində açar rol oynayır. Belarus Mədəniyyət Günləri mədəniyyətin xalqlar arasında dostluğu və qarşılıqlı anlaşmanı necə möhkəmləndirə biləcəyinin parlaq nümunəsinə çevrildi. Mədəniyyət Günlərinin uğuru gələcəkdə oxşar tədbirlərin təşkil edilməsi üçün yeni perspektivlər açır. Nümayəndə heyətlərinin mədəni mübadiləsi, birgə festival və sərgilərin, eləcə də digər mədəni tədbirlərin keçirilməsi, ikitərəfli əlaqələrin gündəliyində önəmli yer tutur və dövlətlərarası anlaşmanın, əməkdaşlığın daha da dərinləşdirilməsinə xidmət edir.

Belarus Mədəniyyət Günləri tədbirləri çərçivəsində görüşlər həm də yeni əlaqələr və əməkdaşlıq üçün əsas yaratmış, mədəni dialoqun tükənməz potensialını nümayiş etdirmişdir. Bu, mədəniyyətin dövlətlərarası münasibətlərin inkişafında güclü bir katalizator olduğunu və gələcək üçün geniş imkanlar açdığını bir daha təsdiqləyir.

Mədəniyyət Günlərinin iştirakçıları sənətçilər və mədəniyyət nümayəndələri bu cür mübadilələrin mədəni dünyalarımızın qarşılıqlı anlaşması və zənginləşməsi üçün əhəmiyyətini vurğulayıblar, tamaşaçılar isə təqdim olunan proqramların yüksək səviyyədə icra olunduğunu və müxtəlifliyini qeyd ediblər. Bu, bir daha sübut edir ki, mədəniyyət insanları birləşdirən universal ünsiyyət vasitəsidir.

Azərbaycan və Belarus rəsmilərinin Mədəniyyət Günləri çərçivəsində verdiyi bəyanatlar mədəni əlaqələrin inkişafı məsələsində dövlətlərin ortaq mövqeyini əks etdirir. Hər iki ölkənin mədəniyyət nazirləri bu cür tədbirlərin təkcə mədəni deyil, həmçinin iqtisadi, sosial və siyasi əlaqələri möhkəmləndirdiyinə əminliklərini ifadə edib, mədəni mübadilələrin davam etdirilməsi və gələcəkdə yeni birgə layihələrin həyata keçirilməsinin vacibliyini vurğulayıblar.

Hər iki ölkə birgə mədəni tədbirlərin təşkil edilməsi üçün geniş imkanlara malikdir. Bu, yalnız ənənəvi mədəniyyət günləri deyil, həmçinin festivallar, sərgilər, kino nümayişləri və digər layihələr çərçivəsində həyata keçirilə bilər. Xüsusilə gənclər və təhsil proqramlarına diqqət yetirmək lazımdır, çünki bu, yaradıcılıq bacarıqlarının və mədəni mübadilənin gənc nəsil arasında inkişafına təsir göstərər.

Qarşılıqlı faydalı əməkdaşlıq layihələrinin inkişafı Azərbaycan və Belarus arasında mədəni əməkdaşlığın ən perspektivli istiqamətlərindən biridir. Birgə mədəni layihələr və proqramlar yalnız təcrübə mübadiləsini təmin etməklə kifayətlənməyəcək, həm də beynəlxalq səviyyədə diqqəti cəlb edə biləcək yeni mədəni əlaqələrin yaradılmasına imkan verəcək.

Müasir texnologiyalar mədəni dialoqun inkişafı üçün unikal imkanlar təqdim edir. Onlayn sərgilərin, virtual muzey turlarının, onlayn konsertlərin və seminarların təşkili mədəni tədbirlərin auditoriyasını xeyli genişləndirə bilər, onları hər iki ölkədə geniş insan kütləsi üçün əlçatan edər.

Azərbaycan və Belarusun fəal əməkdaşlığı, onların dünya mədəni səhnəsində mövqelərinin daha da möhkəmlənməsinə kömək edəcək. Beynəlxalq layihələrdə və təşəbbüslərdə birgə iştirak hər iki ölkənin mədəni irsi və müasir incəsənətini yeni səviyyədə təqdim etməyə imkan verəcək. Azərbaycan və Belarus arasında mədəni dialoqun inkişaf perspektivləri çox ümidvericidir.

Sonda qeyd etmək lazımdır ki, mədəniyyət yalnız keçmişin irsi deyil, həm də gələcəyin inkişafı üçün vacib resursdur. Azərbaycan və Belarusun bu sahədə əməkdaşlığı yalnız ənənələrə, tarixə olan hörməti nümayiş etdirmir, həm də birgə yaradıcılıq axtarışları, yeni ideya və layihələrin həyata keçirilməsinə imkan yaradır ki, bu da hər iki ölkənin rifahına və inkişafına töhfə verir.

Emin QASIMOV,

"Respublika".