ƏRDOĞAN: TÜRKİYƏNİN TERRORLA MÜBARİZƏSİ AVROPANIN DA XEYRİNƏDİR

Türkiyə prezidenti Rəcəb Tayyib Ərdoğan xaricdə yayımlanan bir sıra televiziya kanallarının birgə yayımında jurnalistlərin suallarını cavablandırarkən ölkəsinin terrorla mübarizə məsələsinə diqqət çəkib. Bu barədə “TRT” telekanalı məlumat yayıb.

“Türkiyənin sərhəd daxilində və xaricində təhlükəsizliyi üçün apardığı mübarizə terror təşkilatlarını qorxudur. Terrorçular artıq başlarını qaldıra bilməyəcək və onların təşkilatının nəfəs almasına imkan verməyəcəyik”, - deyə Ərdoğan vurğulayıb.

Dövlət başçısının sözlərinə görə, Türkiyənin terrorla mübarizəsi Avropanın təhlükəsizliyinə də xeyirdir.

Ərdoğan qeyd edib ki, İŞİD, PKK/YPG və FETÖ kimi terror təşkilatları ilə ən səmərəli və təsirli şəkildə mübarizə aparan yeganə NATO ölkəsi məhz Türkiyədir.

Bununla yanaşı, prezidentin açıqlamasına əsasən, son illər İraq və Suriyada fəaliyyət göstərən PKK-nın müxtəlif səviyyəli bir sıra sözdə başçıları Milli Kəşfiyyat Təşkilatı “MİT” tərəfindən zərərsizləşdirilib, həmçinin FETÖ-nün bəzi xarici üzvləri Türkiyəyə gətirilib.

Eyni zamanda, Türkiyə lideri çıxışı zamanı bildirib ki, MİT aprelin 29-da Suriyada keçirdiyi əməliyyat zamanı İŞİD-in sözdə başçısı kod adı “Əbu Hüseyn əl-Qureşi” olan terrorçunu zərərsizləşdirib.

SUDANIN KEÇMİŞ BAŞ NAZİRİNDƏN MÜHARİBƏ XƏBƏRDARLIĞI

Sudan daxilindəki münaqişə vətəndaş müharibəsinə çevrilərsə və vaxtından əvvəl dayandırılmasa, vəziyyət Suriya və Liviyadakından da pis ola bilər. “Teleqraf.com”un verdiyi xəbərə görə, bunu Sudanın keçmiş baş naziri Abdullah Həmduq bildirib.

Siyasətçinin sözlərinə görə, mümkün vətəndaş müharibəsi dayandırılmasa, bu, dünya üçün çox ciddi problemə çevriləcək.

“Sudanda münaqişə tərəfləri olan ordu və qiyamçı qruplaşmanın hər biri həm yaxşı təlim keçmiş, həm də təchiz edilmiş hərbçilərdən ibarətdir”, - deyə sabiq baş nazir əlavə edib.

Sudanın vətəndaş müharibəsi həddinə çatacağı təqdirdə durumun Suriya, Yəmən və Liviyadan daha pis ola biləcəyini iddia edən Abdullah Həmduq heç kimin bu müharibədən qalib çıxa bilməyəcəyini diqqətə çatdırıb.

Eyni zamanda, Sudan Səhiyyə Nazirliyi aprelin ortalarından bəri ordu ilə Çevik Hərəkət Qüvvələri arasında baş verən qarşıdurmalarda həyatını itirənlərin sayının 528-ə, yaralı sayının isə 4599-a yüksəldiyini açıqlayıb.

UDAY KOTAK DOLLARI ƏN BÖYÜK MALİYYƏ TERRORÇUSU ADLANDIRIB

Asiyanın ən zəngin bankiri sayılan Uday Kotak dolları ən böyük maliyyə terrorçusu adlandırıb. Bu barədə “Sputnik” informasiya agentliyi məlumat yayıb.

“Dünyanın ən böyük maliyyə terrorçusu ABŞ dollarıdır. Təsəvvür edin, bütün pulumuz “nostro” hesablardadır və ABŞ-da kimsə deyə bilər ki, sabahdan onu çıxara bilməyəcəksiniz”, - deyə bankir bildirib.

Uday Kotak əlavə edib ki, dünya alternativ valyuta axtarır və Hindistan rupini belə ehtiyat valyutaya çevirə bilər. O, Avropa və ya Yaponiyanın öz valyuta ehtiyatları ilə bunu edəcəyinə şübhə ilə yanaşdığını bəyan edib.

Bundan əvvəl “The Economist” jurnalı dolların qlobal iqtisadiyyata hələ də təsir etdiyini, lakin yuanın gücləndiyini yazmışdı.

Məlumat üçün qeyd edək ki, zaman-zaman alternativ ehtiyat valyutaya tələbat yaranır və bazar dolların qaçılmaz tənəzzülü ilə bağlı proqnozlarla dolur.

TÜRKİYƏNİN “YENİ ALTAY” TANKININ SINAQLARI BAŞLAYIB

Türkiyənin yerli istehsalı olan “Yeni Altay” tankları sınaqlara hazırdır. “Report” agentliyinin verdiyi xəbərə görə, tank kütləvi istehsaldan öncə 6 min dəfə sınaqdan keçiriləcək.

Tankın istehsalı üzərində 250-si mühəndis olmaqla 450 mütəxəssis çalışıb. Onun kütləvi istehsalı isə uğurlu sınaqlardan asılıdır.

Verilən xəbərə əsasən, “Yeni Altay” davamlılıq və təhlükəsizlik baxımından rəqiblərini üstələyir. 120 millimetr və 55 kalibrli topla təchiz edilən müasir tankın atəş sistemi çox güclüdür. Zərbə gücü baxımından böyük tutuma malik yeni hərbi texnika azı 8 kilometr məsafədəki hədəfi vura biləcək.

Eyni zamanda, “Yeni Altay” nisbətən yüngül olması sayəsində yüksək hərəkətliliyə malikdir və buna görə də rəqiblərini geridə qoymağı bacarıb. “Yeni Altay” keyfiyyət baxımından dünyanın ən yaxşısı kimi tanınan “Leopard” tankları ilə müqayisə edilir.

COZEF BAYDENİN ÇİNƏ GÖRƏ UKRAYNAYA MARAĞI AZALIB

ABŞ prezidenti Cozef Baydenin administrasiyası getdikcə daha çox Çinlə mümkün münaqişəyə diqqət yetirir, Ukraynanı daha az müzakirə edir. “Sputnik” informasiya agentliyinin verdiyi xəbərə görə, bu barədə Amerikalı jurnalist Klayton Morrisin “Redacted News” teleproqramında məlumat yayıb.

Bildirilir ki, jurnalist “Politico” nəşrinin məqaləsinə reaksiya verib. Həmin məqalədə qeyd olunub ki, Ağ Ev rəhbərliyi Ukrayna Silahlı Qüvvələrinin əks-hücumunun uğursuzluğundan və sonrakı nəticələrindən narahatdır.

“Amerikalıların burada işi bitdi. Ukrayna prezidenti Volodimir Zelenski ilə hər şey aydındır. Biz yeni səhifəyə başlayırıq və diqqətimizi Çinə yönəldirik”, - deyə Klayton Morris vurğulayıb.

Eyni zamanda, jurnalist əlavə edib ki, Vaşinqtonun maraqlarının Pekinlə qarşıdurmaya doğru dəyişməsini ABŞ qoşunlarının Filippində keçirdiyi təlimləri misal göstərmək olar.

POLŞA RUSİYA İLƏ SƏRHƏDİN TƏHLÜKƏSİZLİYİNİ GÜCLƏNDİRƏCƏK

Rəsmi Varşava Kalininqrad vilayətində Polşa-Rusiya sərhədində təhlükəsizlik tədbirlərini gücləndirəcək. “Report”  agentliyinin verdiyi xəbərə görə, bunu Polşanın baş naziri Mateuş Moravetski bəyan edib.

Məlumata əsasən, baş nazir qeyd edib ki, Rusiya ilə bütün sərhəd zolağı boyunca müvafiq fiziki və elektron təhlükəsizlik tədbirləri həyata keçiriləcək.

“Biz Polşanın şimalındakı Kalininqrad vilayəti ilə bütün Polşa-Rusiya sərhədi boyunca təhlükəsizliyi gücləndiririk. Biz bu təhlükəsizliyi təmin edirik və onu Polşa-Belarus sərhədində olduğu kimi təmin edəcəyik”, - deyə baş nazir vurğulayıb.

Xatırladaq ki, bir müddət öncə Polşanın müdafiə naziri Mariuş Blaşak bildirib ki, Polşa öz hava hücumundan müdafiə sisteminin yaradılmasında Ukraynanın təcrübəsindən istifadə edir.

Aİ ÖZ ÖLKƏLƏRİ ÜÇÜN BÜDCƏ NORMALARINI YÜNGÜLLƏŞDİRƏCƏK

Avropa İttifaqı (Aİ) silah və sursat istehsalına böyük sərmayələr yatıracaqları təqdirdə, büdcə kəsirini ÜDM-in 3 faizinə endirmək üçün ölkələrinə yeddi ilə qədər möhlət vermək istəyir. “Report” xəbər verir ki, bu barədə mənbələrə istinadən “Bloomberg” agentliyi məlumat yayıb.

Məlumata görə, bu üstünlüklər Avropa Komissiyasının (AK) Aİ-nin əsas iqtisadi sənədi - Sabitlik və Artım Paktı ilə bağlı islahatlara dair təkliflər paketinin bir hissəsi olacaq. Paket ittifaq ölkələrinin büdcə kəsirinin ÜDM-in 3 faizindən, dövlət borcunun isə ÜDM-in 60 faizindən çox olmamasını nəzərdə tutur.

Pandemiya zamanı AK bu qaydalara olan tələbləri rəsmi olaraq dayandırmışdı. Tələblər indi əksər Aİ ölkələri tərəfindən pozulur ki, bu da, Rusiyaya qarşı sanksiyaların tətbiqi ilə birlikdə 2022-ci ildə ittifaqda mütləq rekord inflyasiyaya səbəb olub.

Bununla yanaşı, hərbi xərclər, o cümlədən sursat və mərmilər yaşıl enerjinin inkişafı ilə yanaşı, Avropa İttifaqının iqtisadi artımı üçün prioritet sahələrdən birinə dəstək kimi qiymətləndiriləcək. Bu sahələrə sərmayə qoyuluşu ölkələrə makroiqtisadi göstəricilərini İnkişaf Sabitliyi Paktı ilə uyğunlaşdırmaq üçün yeddi ilə qədər güzəşt müddəti verəcək.

Hazırladı:

Vamiq ABBASOV,

“Respublika”.