ƏRDOĞAN GƏLƏCƏK DÖVR ÜÇÜN PRİORİTETLƏRİ AÇIQLAYIB
Türkiyə prezidenti Rəcəb Tayyib Ərdoğan sədri olduğu Ədalət və İnkişaf Partiyasının seçki platforması və millət vəkilliyinə namizədlərinin ictimaiyyətə təqdim olunması mərasimində çıxışı zamanı ölkəsinin gələcəyi üçün prioritetləri açıqlayıb. Bu barədə “Report” agentliyi məlumat yayıb. Dövlət başçısı deyib: “Gələcək dövrdə prioritetimiz fevralın 6-da baş vermiş zəlzələnin nəticələrini aradan qaldırmaq və dağılmış şəhərlərimizi bərpa etməkdir”. Türkiyə liderinin sözlərinə görə, vətəndaşlarının can və mal təhlükəsizliyi hakimiyyət üçün ən vacib məqamdır: “Şəhərlərimizi təbii fəlakətlərə qarşı daha hazırlıqlı vəziyyətə gətirməyə çalışacağıq”.
Bununa yanaşı, Ərdoğan qeyd edib ki, Türkiyə gələcək dövrdə də terrorla mübarizəni davam etdirəcək. “Hüquqi dövlət sistemimizi gücləndirəcəyik. Terror təşkilatlarının siyasətə müdaxiləsinə göz yummayacağıq. Əhalimizin yoxsullaşmasının qarşısını alacağıq. Turizm sahəsinə də əlavə investisiya ayıracağıq”, - deyə Ərdoğan vurğulayıb.
Eyni zamanda, Türkiyə prezidenti yenidən dövlət başçısı seçiləcəyi təqdirdə hazırkı siyasi kursu davam etdirəcəklərini bəyan edib.
BENYAMİN NETANYAHU UKRAYNAYA SİLAH VERİLMƏSİNİ TƏKZİB EDİB
İsrail Ukraynaya yalnız humanitar yardım edir, rəsmi Kiyevə silah tədarükü ilə bağlı heç bir qərar qəbul edilməyib. “Teleqraf.com”un verdiyi xəbərə görə, bu barədə İsrailin baş naziri Benyamin Netanyahu məlumat verib. Bildirilir ki, Pentaqonun məxfi sənədləri internetə sızdıqdan sonra Netanyahu jurnalistlərin suallarını cavablandırmalı olub. Sosial mediada yayılan məxfi sənədlərdən birində İsrailin Ukraynaya silah ötürə biləcəyi barədə məlumatlar yer alır. “Ukrayna üçün ölümcül silahlarla bağlı xəbərlərə gəlincə, bu xəbərlərin nəyə əsaslandığını bilmirəm. Biz onlara humanitar məsələlərdə və mülki müdafiə sahəsində kömək etmək qərarına gəlmişik”, - deyə İsrailin baş naziri vurğulayıb. Eyni zamanda, Benyamin Netanyahu əlavə edib ki, onun və əvvəlki hökumətlərin Ukraynaya öldürücü silahların tədarükü ilə bağlı hər hansı qərarı barədə eşitməyib.
PENTAQONUN SƏNƏDLƏRİNİN MEDİAYA SIZMASI FAKTI İLƏ BAĞLI CİNAYƏT İŞİ AÇILIB
ABŞ-ın Ədliyyə Nazirliyi Pentaqonun onlarca məxfi sənədinin sosial mediaya sızdırılması faktı ilə bağlı cinayət işi açıb. Bu barədə “Report” agentliyi “Financial Times” nəşrinə istinadən xəbər verib.
Pentaqonun mətbuat katibinin müavini Sabrina Sinqh bildirib ki, Müdafiə Nazirliyi sosial mediada yayılan və fotoları çəkilən çox məxfi materialları araşdırmaq və qiymətləndirməkdə davam edir. Eyni zamanda, Sabrina Sinqh əlavə edib ki, Pentaqon sənədlərin ABŞ-ın milli təhlükəsizliyinə, eləcə də müttəfiqlərinə və tərəfdaşlarına təsirini qiymətləndirmək üçün idarələrarası iş təşkil edib.
Nəşr qeyd edib ki, sosial şəbəkələrə sızan sənədlər brifinq slaydlarını ehtiva edir və bəziləri Pentaqonun Birgə Qərargahı tərəfindən xüsusi hazırlanmış, digərləri isə digər milli təhlükəsizlik rəsmiləri üçün gündəlik brifinqlərə daxil edilən kəşfiyyat məhsulları kimi görünür.
Sənədlərdə Ukraynadakı müharibədən əlavə Çin, İran, Cənubi Koreya və İsrailin adı çəkilir. Sənədlər həm Ukrayna, həm də Rusiya üçün vacib məsələlərə işarə edir və hər iki ölkənin qoşunların hazırlanması və təchiz edilməsində çətinliklərlə üzləşdiyini göstərir.
KAMÇATKA VULKANININ KÜLÜ 500 KİLOMETR MƏSAFƏYƏ YAYILIB
Rusiyanın Kamçatka yarımadasındakı ən böyük və ən aktiv vulkanlardan biri olan Şiveluçun püskürməsi ciddi fəsadlara səbəb olub. “Teleqraf.com”un xəbərinə görə, vulkandan çıxan kül buludu 500 kilometr şimal-qərbə yayılıb və kül emissiyasının hündürlüyü 20 kilometr yüksəkliyə qalxıb. Eyni zamanda, püskürmənin təyyarələrin uçuşuna təsiri səbəbindən, bölgədə “qırmızı təhlükə” siqnalı verilib. Hazırda kül buludunun ölçüsü böyüməyə davam edir.
Rusiya mətbuatının məlumatına əsasən, yaxınlıqdakı Klyuçi kəndinə kül yağışı son 60 ilin ən güclüsü olub. Bu səbəbdən yerli adiministrasiya məktəbləri bağlayıb və sakinlərə evlərini tərk etməməyi tövsiyə edib.
Məlumat üçün qeyd edək ki, Şiveluç Kamçatkadakı ən böyük və ən aktiv vulkanlardan biri sayılır. Sonuncu dəfə bu vulkanın 2007-ci ildə püskürdüyü bildirilir.
DONALD TRAMP ÜÇÜNCÜ DÜNYA MÜHARİBƏSİ ANONSUNU VERDİ
“Cozef Baydenin rəhbərlik etdiyi Ağ Evin siyasəti tezliklə ABŞ-ı Üçüncü Dünya müharibəsinə aparacaq”. “Sputnik” informasiya agentliyinin verdiyi xəbərə görə, bu barədə ABŞ-ın sabiq prezidenti Donald Tramp sosial şəbəkələrdə yazıb. “ABŞ-ın getdiyi yol, bizi tezliklə Üçüncü Dünya Müharibəsinə sürükləyəcək və bizi silah-sursatsız qoyacaq”, - deyə ölkənin keçmiş lideri qeyd edib. Donald Tramp həmçinin bildirib ki, ABŞ-ın hər hansı problemini həll etmək üçün “Baydendən qurtulmaq” lazımdır. Xatırladaq ki, bir neçə gün öncə Donald Tramp “Truth Social” sosial şəbəkəsindəki hesabında nə demək istədiyini açıqlamadan “Üçüncü Dünya Müharibəsini” statusu paylaşmışdı.
Eyni zamanda, D.Tramp qlobal müharibənin başlaması təhlükəsi səbəbindən Ukraynada hərbi əməliyyatların davam etdirilməsinə qarşı çıxdığını bəyan etmişdi.
ANKARA VƏ ƏR-RİYAD ARASINDA SİYASİ MƏSLƏHƏTLƏŞMƏLƏR
Ər-Riyadda Səudiyyə Ərəbistanı və Türkiyə xarici işlər nazirlikləri arasında uzun illər ərzində siyasi məsləhətləşmələrin ilk raundu keçirilib. Bu barədə Səudiyyə Ərəbistanının “SPA” xəbər agentliyi məlumat yayıb. Bununla yanaşı, Türkiyənin Səudiyyə Ərəbistanı, Yəmən və Küveytlə siyasi məsləhətləşmələr aparacağı bildirilib. Türkiyə xarici işlər nazirinin müavini Burak Akçapar Krallığın xarici işlər nazirinin müavini Valid Əl-Hereycinin dəvəti ilə Ər-Riyada səfər edib. Məlumata əsasən, tərəflər müxtəlif sahələrdə əməkdaşlığın genişləndirilməsi yollarını müzakirə edərək iki ölkə hökumətləri arasında siyasi məsləhətləşmələrin birinci raundunu keçiriblər.
“Tərəflər həmçinin səylərin artırılması və ikitərəfli koordinasiya məsələlərini müzakirə ediblər. Mövcud beynəlxalq vəziyyət, regional və beynəlxalq arenada əsas çağırışlar və böhranlar müzakirə mövzusu olub. Həmçinin görüş zamanı müxtəlif sahələrdə birgə əməkdaşlığın genişləndirilməsi yolları nəzərdən keçirilib”, - deyə açıqlamada vurğulanıb.
İTALİYADA MİQRANTLARA GÖRƏ FÖVQƏLADƏ VƏZİYYƏT ELAN EDİLİB
İtaliya hökuməti miqrant axını və onları qəbul edərkən yaşadığı çətinliklərlə əlaqədar fövqəladə vəziyyət elan edib. “Report” agentliyinin məlumatına görə, ölkənin mülki müdafiə və dəniz siyasəti naziri Nello Muzumeçinin təklifi ilə Nazirlər Şurasının iclasında 6 ay müddətinə 5 milyon avronun ayrılmasını nəzərdə tutan müvafiq qərar qəbul edilib.
Verilən xəbərə görə, belə bir addım Aralıq dənizi marşrutu üzrə miqrasiya axınının artması ilə əlaqədar təcili tədbirlərin görülməsi zərurəti ilə diktə olunur. Daxili İşlər Nazirliyinin açıqlamasına görə, ilin əvvəlindən dəniz yolu ilə 30 mindən çox miqrant gəlib ki, bu da 2022-ci ilin ilk ayları ilə müqayisədə dörd dəfə çoxdur.
Bildirilir ki, təkcə aprelin 7-dən 10-dək olan müddətdə Aralıq dənizində Kalabriya və Siciliya sahillərində aparılan əməliyyatlar zamanı 3 minə yaxın insan qurtarılıb.
Hazırkı İtaliya hökuməti qarşısına birinci növbədə qanunsuz daşımaların qarşısının alınması vasitəsilə qeyri-qanuni miqrasiyaya qarşı mübarizə vəzifəsi qoyub. Bundan əlavə, rəsmi Roma miqrantların çıxdığı ölkələrlə işləmək niyyətindədir və həmçinin Avropa İttifaqından konkret cavablar gözləyir.
Hazırladı:
Vamiq ABBASOV,
“Respublika”.