DÜNYA XƏBƏRLƏRİ

KREML: MÜHARİBƏNİN DAVAM ETDİRİLMƏSİ QAÇILMAZDIR

“Ukraynada müharibənin sülh yolu ilə həlli perspektivi yoxdur. Rusiyanın yeganə yolu döyüşləri davam etdirməkdir”. “Report” agentliyinin verdiyi xəbərə görə, bunu Kremlin sözçüsü Dmitri Peskov bəyan edib.

Mətbuat katibi Çinin vasitəçilik potensialının mövcud olduğunu, lakin Ukrayna məsələsində vəziyyətin hələ də mürəkkəb olaraq qaldığını diqqətə çatdırıb.

Eyni zamanda, Dmitri Peskov bildi

rib ki, NATO Rusiya sərhədlərinə doğru genişlənməkdədir: “Biz qitədə təhlükəsizlik arxitekturasının balanslaşdırılması üçün tədbirlər görürük. Rusiya Alyansa yaxınlaşmır, əksinə, NATO bizə doğru genişlənir”.

Bununla yanaşı, Dmitri Peskovun sözlərinə görə, ABŞ-ın Avropa bazalarındakı nüvə silahı ciddi narahatlıq yaradır. O əlavə edib ki, bununla bağlı müvafiq addımlar atılacaq.

HULUSİ AKAR ERMƏNİSTANI ARXİVLƏRİ AÇMAĞA ÇAĞIRIB

Türkiyənin müdafiə naziri Hulusi Akar Ermənistanı 1915-ci ildə Osmanlı İmperiyasında baş vermiş hadisələri öyrənmək üçün arxivlərini açmağa və onun nəticələri ilə barışmağa çağırıb. “Sputnik” informasiya agentliyinin verdiyi xəbərə görə, bu barədə “Aydınlık” qəzeti xəbər verib.

“Biz bu məsələ ilə bağlı sərt müraciətimizi bir daha bildiririk. Ermənistan da Türkiyə kimi öz arxivlərini beynəlxalq tarixçilərin üzünə açmalı, nəticələri qəbul etməli və bundan narahat olmamalıdır”, - deyə nazir vurğulayıb.

Eyni zamanda, Türkiyə Müdafiə Nazirliyinin rəhbərinin sözlərinə görə, bu müraciətə hələ cavab verilməyib. Lakin buna baxmayaraq, Ankara türk və erməni xalqlarının dostluq və əməkdaşlıq çərçivəsində əlaqələr qura biləcəyinə ümid edir.

“Türkiyə əsrlər boyu tolerantlıq və sülh şəraitində birgə yaşamış türk və erməni xalqlarının dostluq və əməkdaşlıq münasibətləri qura biləcəyinə inanır”, - deyə Hulusi Akar bildirib.

İSRAİL LİVAN ƏRAZİSİNDƏN KÜTLƏVİ RAKET HÜCUMUNA MƏRUZ QALIB

İsrailin Livanla şimal sərhədinə çoxlu sayda raket zərbələri endirilib. “The Jerusalem Post” qəzetinin verdiyi xəbərə görə, bu barədə İsrail Müdafiə Qüvvələri məlumat yayıb.

Bildirilir ki, Livandan İsrailə atılan 34 raketdən 25-i İsrailin Hava Hücumundan Müdafiə Qüvvələri tərəfindən məhv edilib, 5 raket isə İsrail ərazisinə düşüb. Ölən və xəsarət alanlar barədə məlumat verilmir.

Müdafiə naziri Yoav Gallant İsrailin şimalındakı təhlükəsizlik vəziyyətinin təfərrüatları ilə tanış olduğunu açıqlayaraq əlavə edib ki, cavab üçün ilkin göstərişlər İsrail Müdafiə Qüvvələrinin qərargah rəisinə verilib.

Eyni zamanda, İsrailin xarici işlər naziri Eli Kohenin sözlərinə görə, ölkə cənubdan və şimaldan raket təhlükəsi ilə üz-üzədir: “Beynəlxalq ictimaiyyəti İsrailə qarşı hücumlara görə məsuliyyət daşıyanlara qarşı açıq bəyanat verməyə çağırıram”.

Qeyd edilir ki, 2021-ci ilin avqustundan bəri Livandan bu şəkildə intensiv raket hücumları olmayıb.

SİLVİO BERLUSKONİDƏ QAN XƏRÇƏNGİ AŞKARLANIB

Bir müddət öncə xəstəxanaya yerləşdirilən İtaliyanın keçmiş baş naziri Silvio Berluskoninin qan xərçəngindən əziyyət çəkdiyi məlum olub. “Teleqraf.com”un verdiyi xəbərə görə, bu barədə həkimlər Alberto Zanqrillo və Fabio Ciceri onun vəziyyəti ilə bağlı açıqlamada qeyd ediblər.

Açıqlamaya əsasən, Silvio Berluskoni xroniki qan xərçəngindən əziyyət çəkir və hazırda ağciyər infeksiyası səbəbindən reanimasiyadadır.

Eyni zamanda, həkimlər Silvio Berluskoniyə keçmişdə xroniki miyelomonositik leykemiya diaqnozu qoyulduğunu bildiriblər.

Bununla yanaşı, keçmiş baş nazirdə xərçəng xəstəliyinin ilk dəfə nə vaxt aşkar edildiyini açıqlamayan həkimlər onun kəskin olmadığını vurğulayıblar.

ƏRDOĞANIN VƏD ETDİYİ YENİLİKLƏRİN MAHİYYƏTİ AÇIQLANIB

Türkiyənin hakim Ədalət və İnkişaf Partiyasının sədri, prezidentliyə namizəd və hazırkı dövlət başçısı Rəcəb Tayyib Ərdoğanın vətəndaşlara vəd etdiyi yeniliklərin nədən ibarət olduğu açıqlanıb. “Report” agentliyinin Türkiyə mətbuatına istinadən verdiyi xəbərə görə, hazırda hökumət üç əsas istiqamət üzrə iş aparır.

Məlumata əsasən, bura “Ailə hesabı”nın yaradılması, Vətəndaşlıq Fondunun təsisi və gənclərə bayram bonusunun verilməsi daxildir.

Bildirilir ki, Türkiyədə ailə həyatı qurmaq ərəfəsində olan cütlüklərə 2-3 il müddətində geri qaytarılması nəzərdə tutulmayan 250 min lirə (13 min dollar) vəsait ayırılacaq. Bununla yanaşı, tələbələrə ildə iki dəfə bayram bonusu veriləcək.

Həmçinin təsis edilən Vətəndaşlıq Fonduna əsasən uşaq dünyaya gəldikdən sonra dövlət onlar üçün hər ay 100 və ya 200 lirə vəsait ayıracaq. Uşaqlar 18 yaşına çatdıqdan sonra həmin vəsaitdən istifadə edə biləcəklər.

Eyni zamanda, qeyd olunur ki, Rəcəb Tayyib Ərdoğan bir tərəfdən seçkilərə hazırlaşır, digər tərəfdən qarşıdakı dövr üçün nəzərdə tutulan layihələrin icrasını uğurla davam etdirir.

SƏUDİYYƏ ƏRƏBİSTANI VƏ İRAN 7 İLDİR DAVAM EDƏN GƏRGİNLİYƏ SON QOYDU

İran və Səudiyyə Ərəbistanı arasında illərdir davam edən gərginliyə son qoyulub. Bu barədə “TRT” telekanalı məlumat yayıb.

Verilən xəbərə görə, İran və Səudiyyə Ərəbistanı bir çox məsələlərdə, o cümlədən iki ölkənin səfirliklərinin yenidən açılması, qarşılıqlı uçuşların bərpası və qarşılıqlı vizaların sadələşdirilməsi kimi məsələlərdə razılığa gəliblər.

İranın xarici işlər naziri Hüseyn Əmir Abdullahiyan və Səudiyyə Ərəbistanının xarici işlər naziri Faysal bin Farhan Al-Saud Çinin paytaxtı Pekində görüşüblər. Görüş iki ölkənin xarici işlər nazirləri arasında 7 ildən sonra ilk dəfə baş tutub.

Bununla yanaşı, hər iki ölkə səfirliklərin açılması, uçuşların bərbası və qarşılıqlı vizaların asanlaşdırılması barədə razılığa gəliblər.

Məlumat üçün qeyd edək ki, birgə bəyanatın imzalanması mərasimində Çin xarici işlər naziri Tsin Qan da iştirak edib.

FİNLANDİYANIN BAŞ NAZİRİ İSTEFA VERİB

Finlandiyanın baş naziri Sanna Marin hökumətin istefa ərizəsini prezident Sauli Niinistöyə təqdim edib. “Teleqraf.com”un verdiyi xəbərə görə, dövlət başçısı hökumətin istefa tələbini qəbul edib.

Xəbər verilir ki, Sanna Marin hökuməti parlament seçkilərində məğlub olduqdan sonra istefaya gedib. O, yeni kabinet təyin olunana qədər müvəqqəti hökumətə rəhbərlik edəcək.

Bununla yanaşı, bildirilir ki, seçkilərdə qalib gələn müxalif mühafizəkar Milli Birlik Partiyasının rəhbərliyi gələn həftə yeni hökumətin qurulmasına başlayacaq.

Xatırladaq ki, aprelin 2-də Finlandiya parlamentinə seçkilər keçirilib. S.Marinin Sosial Demokrat Partiyası 19,9 faiz səslə üçüncü olub. Milli Birlik Partiyası 20,8 faiz səslə qalib gəlib. İkinci yeri seçicilərin 20,1 faizinin səs verdiyi “Əsl Finlər” Partiyası tutub. Yeni parlament aprelin 11-də işə başlayacaq.