Rusiya sülhməramlılarının, erməni havadarlarının və Ermənistanın bütün təkidlərinə rəğmən Laçın-Xankəndi yolundakı ekoaksiya 124 gündür davam edir. Azərbaycanın müvafiq orqanlarının faydalı qazıntı yataqlarına, xüsusilə "Qızılbulaq" qızıl və "Dəmirli" mis-molibden yataqlarına yerində baxış və müxtəlif istiqamətlər üzrə monitorinqinə, ətraf mühitə, yeraltı və yerüstü su mənbələrinə, potensial zərərin və risklərin qiymətləndirilməsinə qarşı maneə törədilməsi vətəndaş cəmiyyəti fəallarının haqlı narazılığına səbəb olur.
Ötən ilin 12 dekabr tarixindən başlayan dinc etiraz aksiyası böyük ruh yüksəkliyi ilə davam edir. Azərbaycanlı ekofəalların Laçın-Xankəndi yolunda keçirdiyi aksiya təbii ehtiyatlarımızın qanunsuz istismarına qarşıdır. Beynəlxalq hüququn müvafiq konvensiyaları rəhbər tutularaq ermənilərin Qarabağda ətraf mühitə vurduğu ziyanın qeydə alınması tələb edilir. Gənc ekofəallar bütün dünyanı onların haqlı tələblərinə səs verməyə çağırır və ikili standartlara qarşı olduqlarını bəyan edirlər.
2020-ci il noyabrın 10-da imzalanmış üçtərəfli Bəyanatın müddəalarına zidd olaraq Ermənistan silahlı birləşmələri və xunta rejimi Azərbaycan ərazilərində cinayətlər törədir, yenidən silahlanırlar. Eyni zamanda, üçtərəfli Bəyanata əsasən Laçın yolunun təyinatı humanitar məqsədlə istifadəni özündə ehtiva etsə də, Ermənistan bu yoldan hərbi məqsədlər üçün istifadə edir, silah-sursat, mina daşıyır.
Bəzi kütləvi informasiya vasitələri saxta məlumatlar yayaraq, aksiyaçıların yolu tamamilə bağladıqlarını bildirirlər. Lakin yaxın günlərdə Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşü zamanı media nümayəndələri aksiya keçirilən ərazidə olmuş və gerçəyi şərh etmişdilər. Aksiyanı izləyən bütün yerli və xarici media subyektləri şahidi olmuşlar ki, könüllülərimiz və gənclərimiz sülhməramlılara humanitar yardımlar üçün şərait yaradırlar. Aksiyaçılar humanist davranışları, köməyə ehtiyacı olan şəxslərə həssas münasibətləri ilə yolun təhlükəsizliyini təmin edirlər. Lakin Ermənistan ekofəallarımızın Laçın-Xankəndi yolundakı dinc etiraz aksiyasını beynəlxalq müstəvidə öz məkrli planına uyğun təqdim etməyə cəhd edir. Bəzi qərəzli ölkə və təşkilatlar isə Azərbaycana qarşı həqiqəti əks etdirməyən qətnamələrin qəbulu ilə bu planın icraçısına çevrilirlər. Lakin bu mübarizədə haqq da, hüquq da Azərbaycan vətəndaş cəmiyyətinin tərəfindədir.
Sülhsevər insanlar və dövlətlər bu aksiyanın haqlı olduğunu dəstəkləsələr də, təbii sərvətlərimizi talan etməkdən gözləri doymayan Ruben Vardanyan, Araik Arutyunyan və onların havadarları qarayaxma kampaniyası aparırlar. Azərbaycana qarşı qərəzli mövqe nümayiş etdirən bəzi ölkə və qurumlar əllərinə düşən hər fürsətdə ölkəmizə qarşı anti-Azərbaycan siyasətini sərgiləyirlər. Buna nümunə kimi, yanvarın 18-də Avropa Parlamentinin (AP) Azərbaycana qarşı Laçın yolunun guya "blokada"da olması kimi yalan iddialarla dolu və artıq tətbiq edilməyən "Madrid prinsipləri"nə istinadlar edilmiş bədnam qətnamə qəbul etməsini göstərmək olar. Xüsusilə də, Azərbaycan üçün heç bir əhəmiyyət kəsb etməyən bu kağız parçası azərbaycanlı gənclərin iradəsinə heç bir təzyiq göstərə bilməz. Çünki torpağına, sərvətinə sahib çıxan ekofəallar Vətənin müdafiəçiləridirlər. Məhz buna görə də tələbləri yerinə yetirilənədək aksiyanı davam etdirməkdə qətiyyətlidirlər.
Gənclərimizin bu əzmi Azərbaycan cəmiyyətində müsbət qarşılanır. Onlar əsl vətənpərvərlik nümunəsi göstərirlər. Əldə olunan bu uğur dövlət başçımızın diplomatiyasının və sağlam vətənpərvər Azərbaycan gəncliyinin qələbəsidir.
Nurlan ABDALOV,
"Respublika".