Azərbaycanın İsraildə səfirliyinin açılması ölkələrimizin tarixində əlamətdar hadisədir. Bu, İsrail və Azərbaycan əlaqələrinin daha da dərinləşməsinə xidmət edəcək. Hər iki ölkə arasındakı münasibətlər məhz xalqlarımızın qədim köklərə söykənən tarixi bağlara əsaslanır. Təsadüfi deyil ki‚ İsrail Azərbaycanın müstəqilliyini tanıyan ilk dövlətlərdəndir və ölkəmizlə çox geniş əlaqələrə malikdir. Bu əlaqələr zamanla qardaşlıq müstəvisinə yüksəldi.
Hər bir suveren ölkə kimi‚ Azərbaycan dövləti də öz siyasətini özünün və xalqının milli maraqları üzərində qurur. Azərbaycan müstəqil və suveren ölkədir və kimlə dostluq quracağını da yalnız özü müəyyən edir. Kimsə buna müdaxilə və təzyiq edə, hansısa hədyan səsləndirə bilməz. Azərbaycan xalqı tarix boyu yəhudilərlə dost olub. Azərbaycanda doğulan və xaricə köç edən yəhudilər də hər zaman Azərbaycanı özünə vətən‚ xalqını isə özünə qardaş xalq biliblər. Birinci və İkinci Qarabağ müharibəsində də yəhudilər Azərbaycanın ərazi bütövlüyü uğrunda mətanətlə döyüşüb. Birinci Qarabağ müharibəsində çox sayda yəhudi könüllü döyüşərək şəhid olmuşdur.
Xaricə köç edən yəhudilər daim Azərbaycanla digər dünya ölkələri, xüsusən ABŞ‚ İngiltərə‚ Almaniya‚ İtaliya və s. ölkələr arasında yaxşı münasibətlərin qurulmasına çalışırlar. İsraillə münasibətlərin qurulmasında isə Azərbaycandan köç etmiş yəhudilərin böyük xidmətləri vardır. Hazırda İsraildə 100 min nəfərə yaxın Azərbaycandan köç etmiş yəhudi icması yaşayır.
Azərbaycan və İsraili milli maraqlar birləşdirir. Azərbaycan yəhudilərin dünyada İsraildən sonra ən sıx və kompakt şəkildə yaşadığı ikinci ölkədir.
Azərbaycan və İsrail münasibətlərinin təməlində‚ birmənalı olaraq, məhz xalqların sarsılmaz səmimi dostluğu və qardaşlığı dayanır.
Hazırda qonşu İranın bir çox şəhər və qəsəbələrində‚ bəzi müsəlman ölkələrində qondarma və uydurma erməni soyqırımını əbədiləşdirmək üçün abidələr ucaldılıb. Amma Xocalı soyqırımına aid İranda heç bir abidə yoxdur. İran heç vaxt Azərbaycan xalqı və dövləti ilə həmrəy olmayıb. Amma bütün bunların əksinə olaraq İsrail hökuməti və Parlamenti erməni soyqırımı layihəsini qətiyyətlə rədd edərək‚ Azərbaycan‚ Türkiyə və bütün Türk xalqları ilə həmrəylik nümayiş etdirib. Xocalı soyqırımının günahsız qurbanları da hər il İsraildə anılmaqda və erməni vəhşiliyi dilə gətirilməkdədir.
İsrail və Azərbaycan dostluğu bölgənin‚ İsrail və Türkiyə dostluğu isə dünyanın təhlükəsizliyinə bir töhfədir.
Azərbaycan və İsrail dövlətlərinin rəhbərləri sadəcə öz tarixlərinə‚ ölkələrinin milli maraqlarına və öz xalqlarına sədaqət göstərərək zamanla bu tarixi dostluğu və ənənəni rəsmiyyətə çevirmişlər. Hər hansı bir kənar qüvvə bu dostluğu və qardaşlığı poza bilməz.
Yəhudi xalqı tarixən olduğu kimi‚ bundan sonra da Azərbaycan xalqının və dövlətinin yanındadır. Azərbaycan və İsrail strateji tərəfdaş, siyasi‚ iqtisadi‚ hərbi və təhlükəsizlik sahəsində ən etibarlı müttəfiqdir. Hazırda İsrailin enerji tələbatının çox hissəsini Azərbaycan ödəyir. Ölkəmiz İsraillə hərbi sahədə də əməkdaşlıq edir. İsraildə Azərbaycanın səfirliyinin açılması bu əlaqələrin daha da möhkəmlənməsinə və dərinləşməsinə şərait yaradacaq. Səfirliyin fəaliyyətə başlaması iki ölkə arasındakı dostluğu və müttəfiqliyi‚ hərbi və strateji əməkdaşlığı daha da möhkəmləndirəcək.
Bu dostluq və qardaşlıq bağları daha da möhkəmlənməli və dərinləşməlidir. İnanıram ki, İsraildə Azərbaycanın səfirliyinin açılması hər iki ölkə‚ dövlət və xalq üçün uğurlu olacaq, ölkələrimizin siyasi‚ strateji və təhlükəsizlik maraqlarına xidmət edəcək.
Dr. Mirsamir MƏMMƏDOV,
İsrail Təhlükəsizlik Akademiyasının
Qafqaz üzrə Azərbaycan
Respublikasındakı Regional
Nümayəndəliyinin direktoru.