Azad edilmiş torpaqlarda yaradılan daha çevik strukturlar özünü doğruldur
"Qarabağ və Zəngəzurda tətbiq edilən yanaşma sonra bütün ölkə üzrə də tətbiq olunacaq. İndi yeni idarəetmə modeli üzərində işlər aparılır. Kadr potensialı çox önəmlidir. Azad edilmiş torpaqlarda daha çevik, daha operativ, bürokratiyaya, xoşagəlməz hallara qurşanmamış yeni strukturlar yaradılıb". Bu fikri Prezident İlham Əliyev cari il yanvarın 10-da yerli televiziya kanallarına müsahibəsində kadr islahatlarından, ölkədə tətbiq edilən yeni idarəetmə modelindən danışarkən bildirib.
Vətən müharibəsindən sonra işğaldan azad olunmuş ərazilərdə geniş bərpa-quruculuq işlərinə başlanılıb. Bu işlərin daha effektiv şəkildə aparılması məqsədilə 2021-ci il fevralın 4-də xüsusi nümayəndəliklərin yaradılması ilə bağlı Fərman imzalamış, Fərmana əsasən ilk olaraq Şuşa şəhərində Prezidentin xüsusi nümayəndəsi fəaliyyətə başlamışdır. Onun ardınca Qarabağ və Şərqi Zəngəzur iqtisadi rayonları üzrə xüsusi nümayəndəliklər formalaşdırılmış, yeni yaradılan qurumların rahat işləməsi üçün inzibati binalar tikilib istifadəyə verilmişdir. Bu da xüsusi nümayəndələrin ölkə başçısının qəbul etdiyi qərarların dövlət orqanları tərəfindən müvafiq ərazidə həyata keçirilməsinin vəziyyətini qiymətləndirmək, bununla bağlı aidiyyəti üzrə məlumat vermək və s. işlərin həyata keçirilməsinə imkan verir. Onu da qeyd edək ki, ötən dövrdə Qarabağ və Şərqi Zəngəzurda aparılan quruculuq işləri geniş vüsət almışdır.
Müasir dövrdə dövlətlərin idarəetmə sistemində təzahür edən modernləşmə yeni idarəetmə modellərinin yaradılmasını zərurətə çevirir. Bu gün respublikamızda aparılan ardıcıl islahatlar da idarəetmənin təkmilləşdirilməsinə xidmət edir. Ölkədə ümummilli lider Heydər Əliyevin idarəçilik təliminin siyasi varislik, milli maraqlar, sosial ədalət və demokratiya kimi prinsiplərinə əsasən milli və müasir idarəetmə modelinin qurulması istiqamətində ardıcıl islahatlar aparılır. Bu islahatlar səmərəli və demokratik idarəçiliyin formalaşdırılması, dövlət orqanlarının fəaliyyətində şəffaflığın, operativliyin, çevikliyin artırılması, xidmətlərin daha keyfiyyətli, rahat və müasir innovasiyalarla həyata keçirilməsi və nəticə etibarilə ölkə vətəndaşlarının rifah və məmnunluq səviyyəsinin təmin olunması kimi amillər əsasında reallaşdırılır.
Dövlət başçısının uğurlu və məqsədyönlü siyasəti, ölkəmizin yeni inkişaf mərhələsinə keçməsi, müasir demokratik mexanizmlərin yaradılması və xalqa xidmət müstəvisində səmərəli və şəffaf, müasir idarəetmə modelinin, vətəndaş dövlət qulluqçusu münasibətlərində yeni düşüncə tərzinin, kadr potensialının formalaşdırılması korrupsiya yarada bilən səbəbləri aradan qaldırmaq üçün zəmin olmuşdur. Dövlət başçısının siyasi iradəsilə vətəndaşa, insan faktoruna yönəldilmiş müasir idarəetmə modelinin tətbiqi istiqamətində kompleks tədbirlər görülür. Qurulan yeni modeldə "dövlət qulluqçusu" anlayışı "cəmiyyətə, xalqa qulluq" mənasını ifadə edir, vətəndaşla məmur arasında münasibətlərdə yeni düşüncə tərzi formalaşdırır.
İşğaldan azad olunmuş ərazilərdə Prezidentin nümayəndələrinin fəaliyyətə başlamasından sonra bərpa-quruculuq işlərinin geniş vüsət alması onu göstərir ki, yeni idarəetmə modeli özünü doğruldur. Bu gün Qarabağ və Şərqi Zəngəzurda görülən işlərin həcmini nəzərə alsaq deyə bilərik ki, bu, Azərbaycan dövlətinin, xalqımızın daha bir qələbəsidir, çünki belə qısa zamanda əldə olunan nəticələr dünyanın özünü də təəccübləndirir, dostlarımızı heyran edir. Şuşada, Füzulidə, Zəngilanda, Ağdamda geniş infrastruktur yaradılır, bölgələrimizə tədricən yeni həyat qayıdır. Dövlət başçısının göstərişi ilə su elektrik stansiyaları tikilir, mövcud olanlar bərpa edilir, avtomobil yolları salınır, bu yolların çətin keçilən hissələrində tunellər çəkilir. Onu da qeyd edək ki, Kəlbəcər və Laçının torpaqları olduqca məhsuldardır və tarixən burada kənd təsərrüfatı, heyvandarlıq kimi sahələr inkişaf etdirilib. Bu ərazilərdə də aqrar sahənin inkişaf etdirilməsi məqsədilə işlər görülür. Qızıl, civə kimi yeraltı sərvətlərin, mərmərin çıxarılması və emalı sənayesinin təşkili, xalçaçılığın genişləndirilməsi də ölkə iqtisadiyyatına böyük fayda gətirəcək.
İşğaldan azad olunmuş ərazilərdə yeni hava limanlarının tikintisi də buradakı işlərin həcminin real göstəricisidir. 2021-ci il avqustun 16-da təməli qoyulan Laçın Beynəlxalq Hava Limanının tikintisinin 2024-cü ildə başa çatdırılacağı proqnozlaşdırılır. Bundan əvvəl isə Füzuli və Zəngilan hava limanları istifadəyə verilib.
Bəli, bu gün Qarabağda və Şərqi Zəngəzurda bərpa-quruculuq işləri sürətlə davam etdirilir. Məqsəd o yerlərin əbədi sakinlərinin əzəli torpaqlarına qayıdışını təmin etməkdir. Əsas hədəfə çatmaq üçün Azərbaycan bərpa prosesinin öhdəsindən layiqincə gəlmək iqtidarındadır. Bu işdə indi üzərində işlənilən yeni idarəetmə modeli - Prezidentin xüsusi nümayəndələrinin rolu böyükdür və onlar özlərini doğruldur. Bunu işlərin gedişi və nəticələr də təsdiqləyir.
Zümrüd QURBANQIZI,
"Respublika".