Şəhidlik adi ölüm deyil, Vətən, torpaq, böyük amallar uğrunda candan keçmək, özünü şüurlu şəkildə qurban vermək deməkdir. Bu uca məqama yüksələnlərdən biri də Səddam Həsənov idi. Qorxmaz bir igid idi Səddam.
Şəhidlik elə bir zirvədir ki, ünvanı əbədiyyətdir. Şəhid olmağı özünə şərəf bilən Səddamın daxilində yüksək vətənpərvərlik, cəsurluq, müsbət əxlaq, əqidə var idi. Elə buna görə də o şüurlu şəkildə ölümü gözə ala bildi. Döyüşlərdə yaralanmasına baxmayaraq, yaralı qolunu sarıyıb irəli getdi Xüsusi Təyinatlı Şəhidimiz. Həmin gün Səddam və onun döyüş yoldaşları düşməni bir addım da irəli buraxmamaq üçün son damla qanlarına kimi vuruşdular. Qorxu duymadan, ürəklərində böyük Vətən sevgisi ilə qəhrəmancasına döyüşüb şəhid olan Səddam kimi şəhidlərimiz bir daha sübut etdi ki, bu xalqın qəhrəmanları yüzlərlə, minlərlədir. Onların ömür yolu gənclərimizə nümunədir.
Oktyabrın 15-də Səddamın 29 yaşı tamam oldu. O, 1992-ci il oktyabrın 15-də Beyləqan rayonunun Yeni Mil qəsəbəsində anadan olub. 2010-cu ildə Yeni Mil kənd tam orta məktəbini bitirdikdən sonra hərbi xidmətə yollanan şəhidimiz xidmət müddətində öz vətənpərvərliyi, dözümü və iradəsi ilə fərqlənmişdir. Hərbi xidməti başa vurduqdan sonra Azərbaycan Respublikası Silahlı Qüvvələrinin gizir hazırlıq kursuna daxil olmuş və həmin kursu müvəffəqiyyətlə bitirib, Naxçıvanda yerləşən N saylı hərbi hissənin kəşfiyyat bölüyündə xidmətini davam etdirmişdir. Zəkası və fiziki qabiliyyəti ilə seçilən Səddam daha sonra Xüsusi Təyinatlı Taborun qrup komandirinin müavini vəzifəsinə təyin olunmuşdur. Şəhidimiz 2014-2019-cu illər ərzində müxtəlif vəzifələrdə işləmişdir. Müxtəlif dövrlərdə Türkiyədə təşkil olunan xüsusi təlimlərdə iştirak etmiş, həmin təlimləri uğurla tamamlamışdır. Səddam həmçinin, Naxçıvanda xidmət edərkən Günnüt əməliyyatında iştirak etmiş, Günnüt kəndinin işğaldan azad edilməsində böyük şücaət göstərmişdir. Beləliklə, ömrünü Vətənə xidmətə həsr edən Səddamın son döyüşü və ən böyük qalibiyyəti İkinci Qarabağ müharibəsinə təsadüf etdi.
Xüsusi Təyinatlı Qüvvələrin giziri olan qəhrəmanımız cənub istiqamətindəki döyüşlərdə iştirak edən xüsusi dəstə qruplarından birini təmsil edirdi. Ona verilən ən çətin tapşırıqların öhdəsindən şərəflə gəlib. Murovdağ zirvəsinin alınmasında, Füzuli rayonunun azad edilməsində xüsusi qəhrəmanlıq göstərib. Həmişə öndə gedən, saysız igidliyə imza atan Səddam Həsənov 17 oktyabr tarixində Vətən müharibəsinin Hadrut cəbhəsində qəhrəmancasına vuruşaraq Şəhidlik zirvəsinə yüksəlib.
Şəhidin doğum günü ilə əlaqədar onun xatirəsinə həsr edilmiş tədbirdə Beyləqan Rayon İcra Hakimiyyətinin başçısı Asif Ağayev aparatın məsul nümayəndələri, hüquq-mühafizə orqanlarının rəhbərləri, şəhid ailələri, media və ictimaiyyət nümayəndələri, şəhidimizin orta məktəb müəllimləri və şagirdlər iştirak etdilər. Şəhidin məzarı önünə gül düzülüb, ruhuna dualar oxundu. Sonra tədbir doğulub boya-başa çatdığı evində davam etdirildi.
Ruhu şad olsun!
Ərəstun ABDULOV,
“Respublika”.