ABŞ-ın Dallas şəhərində Azərbaycandakı mina problemi ilə bağlı “Texaslılar minasız dünya üçün – Azərbaycan” adlı layihəyə start verilib.

"Respublika" xəbər verir ki, bu barədə Diasporla İş üzrə Dövlət Komitəsi məlumat yayıb.

Bildirilib ki, Azərbaycan-Amerika Musiqi Fondunun rəhbəri, tanınmış musiqiçi Cəmilə Cavadova-Şpitsberqin təşəbbüsü ilə həyata keçirilən layihədə əsas məqsəd beynəlxalq ictimaiyyətin diqqətini Azərbaycanın işğaldan azad edilmiş rayonlarındakı mina probleminə cəlb etmək, minaaxtaran itlərin alınaraq ölkəmizə göndərilməsi ilə torpaqlarımızın minadan təmizləmə prosesinə kömək etməkdir.

Amerika Azərbaycan Koordinasiya Şurasının (AAKŞ) üzvü olan təşkilatın çağırışına digər Şura üzvləri və ABŞ-da fəaliyyət göstərən təşkilatlar da qoşulur.

Azərbaycan-Amerika Musiqi Fondunun rəhbəri adından Texasdakı bütün icmalara ünvanlanan müraciətdə bildirilib ki, Azərbaycan əsilli amerikalıların tarixi vətəni olan Azərbaycan 30 illik işğal müddətində çətin sınaqlardan keçib və indiyədək həmin dövrün ağır yükünü daşımaqdadır.

Qeyd edilib ki, bu çətinliklərdən biri Ermənistan silahlı qüvvələrinin Azərbaycan ərazilərində kütləvi şəkildə basdırdığı mina təhlükəsi ilə bağlıdır. Bu minaların Azərbaycanın ətraf mühitini çirkləndirdiyi və öz doğma yurduna qayıtmaq istəyən dinc azərbaycanlıların həyatını ölümlə təhdid etdiyi diqqətə çatdırılıb.

“Marshal Legacy Instute” (MLI) qeyri-kommersiya təşkilatının mina axtaran itlər proqramını (The Mine Detec.on Dog Partnership Program) xatırladan Fond rəhbəri vurğulayıb ki, xüsusi təlim görmüş bu itlərin alınması və Azərbaycana göndərilməsi məqsədilə tələb olunan vəsaitin toplanması üçün sentyabrın 29-da Dallasda mədəni tədbir keçiriləcək. Müxtəlif icmaların rəhbərlərinin və rəsmi şəxslərin dəvət olunduğu tədbirdən əldə olunacaq bütün vəsait MLI-nin hesabına köçürüləcək.

Fond rəhbəri amerikalıları vəziyyəti yaxşılığa doğru dəyişmək naminə bu kampaniyaya qoşulmağa çağırıb.

Qeyd edək ki, hər kəs bu xeyirxah aksiyaya qoşularaq minaaxtaran itlərin alınmasına kömək edə bilər. Vəsaitin toplanmasına dəstək məqsədilə QR-koddan istifadə etmək mümkündür.