ZELENSKİ: UKRAYNANIN 200 MİN KVADRATKİLOMETR ƏRAZİSİ MİNALANIB
Rusiya Ukraynanın 200 min kvadratkilometrlik ərazisini minalayıb. “Report” agentliyinin xəbərinə görə, bunu Ukrayna prezidenti Volodimir Zelenski bəyan edib.
Prezident bildirib ki, Ukrayna ordusunun cəbhədə yavaş irəliləməsinin əsas səbəblərindən biri məhz budur. “Bəziləri düşünür ki, gedən döyüşlər bir Hollivud filmidir və tez bir zamanda nəticələr gözləyirlər. Bu heç də belə deyil”, - deyə Zelenski əlavə edib.
Dövlət başçısçı həmçinin qeyd edib ki, NATO-nun təhlükəsizlik zəmanəti rəsmi Kiyev üçün olduqca vacibdir: “Lakin Alyansa üzvlük bizim üçün son məqsəddir”.
Bununla yanaşı, Zelenskinin sözlərinə görə, qələbə Ukrayna üçün zəruridir: “İşğalçılıq siyasəti davam edərsə, Rusiyada hakimiyyətdə kimin olmasından asılı olmayaraq, biz danışıqlar masasına oturmayacağıq. Biz müharibənin dondurulmasına razı olmayacağıq”.
Məlumat üçün qeyd edək ki, Rusiya ilə Ukrayna arasında genişmiqyaslı müharibə ötən il fevralın 24-də başlayıb.
TÜRKİYƏ YENİ AES-lərin TİKİNTİSİ İLƏ BAĞLI DANIŞIQLAR APARIR
Türkiyə Sinop vilayətində tikiləcək ikinci atom elektrik stansiyası üçün Rusiya və Cənubi Koreya ilə, Trakya vilayətində tikiləcək üçüncü atom elektrik stansiyası üçün Çinlə danışıqlar aparır. “Trend” agentliyinin məlumatına görə, bu barədə Türkiyənin Nüvə Enerjisi və Beynəlxalq Layihələr Baş İdarəsinin rəhbəri Salih Sarı məlumat verib.
Eyni zamanda, idarə rəhbərinin sözlərinə görə, dördüncü atom elektrik stansiyası üçün tədqiqatlar davam edir.
Bununla yanaşı, Salih Sarı Türkiyənin Akkuyu Atom Elektrik Stansiyasının birinci blokundakı işlərin tamamlanmaq üzrə olduğunu qeyd edib. Qeyd edək ki, Akkuyu Atom Elektrik Stansiyası 2010-cu il mayın 12-də Türkiyə və Rusiya prezidentləri arasında imzalanmış müqavilə çərçivəsində Türkiyənin Mersin vilayətinin Büyükeceli bölgəsində tikilib.
2018-ci ilin aprel ayında birinci reaktorun, 2020-ci ilin iyun ayında ikinci reaktorun, 2021-ci ilin mart ayında üçüncü reaktorun, 2022-ci ilin iyun ayında isə sonuncu reaktorun təməli qoyulub. Aprelin 27-də Atom Elektrik Stansiyasına ilk yanacaq yüklənib.
ÇİN HÖKUMƏTİ ENTONİ BLİNKENİ SOYUQ QARŞILAYIB
Çin hökuməti ABŞ dövlət katibi Entoni Blinkeni qəsdən soyuq qarşılayıb. Bu barədə Yaponiyanın “The Nihon Keizai Shimbun” nəşri məlumat yayıb. Nəşrin yazdığına görə, Entoni Blinken səfər zamanı Çin hökumətini ölkələrin hərbi rəhbərliyi arasında dialoqun bərpasına razılaşdıra bilməyib.
Bununla yanaşı qəzet qeyd edib ki, 19 iyunda təşkil edilən görüşdə iştirakçıların masa ətrafında yerləşdirilməsi Çin liderinin malik olduğu gücü nümayiş etdirmək məqsədi daşıyırdı.
Belə ki, Çin Sədri Si Cinpin oval masanın başında, Çin və ABŞ nümayəndə heyətlərinin üzvləri isə onun sağ və sol tərəfində yerləşdirilmişdi.
Məqalədə həmçinin o da əlavə olunub ki, ABŞ dövlət katiblərinin Pekinə əvvəlki səfərləri zamanı iclas iştirakçılarının yerləşdirilməsi tamamilə fərqli idi. Məsələn 2018-ci ildə baş tutan görüş zamanı ABŞ-ın sabiq dövlət katibi Maykl Pompeo və Si Cinpin yan-yana əyləşmişdi.
TÜRKİYƏDƏ “TİKTOK”DAKI CİNAYƏTKAR DƏSTƏYƏ QARŞI ƏMƏLİYYAT KEÇİRİLİB
Türkiyənin Daxili İşlər Nazirliyinin Baş Təhlükəsizlik İdarəsi “TikTok” sosial şəbəkəsində oğurlanmış kredit kartlarından əldə edilən gəlirləri yuyan cinayətkar şəbəkəyə qarşı əməliyyat keçirib. “Sputnik” informasiya agentliyinin verdiyi xəbərə görə, 120 şübhəlinin tutulduğu əməliyyatda 1,2 milyard lirənin yuyulduğu müəyyən edilib.
Türkiyə Daxili İşlər Nazirliyindən verilən açıqlamaya əsasən, vətəndaşların kredit kartı məlumatlarını ələ keçirən fırıldaqçılar bu kartlarla “TikTok”da jeton alıb, müxtəlif “TikTok” fenomenləri ilə əməkdaşlıq edərək pulları yuyublar. Məlumat üçün qeyd edək ki, “TikTok” canlı yayımlarında izləyicilər jeton göndərməklə yayımcıya maddi dəstək verə bilirlər.
Fırıldaqçıların oğurlanmış kredit kartlarından jeton aldıqları və bu jetonları əməkdaşlıq etdikləri fenomenal hesablara göndərdikləri və jetondan əldə edilən gəliri paylaşdıqları müəyyən edilib.
Əməliyyat zamanı fırıldaqçılar və müxtəlif fenomenlər saxlanılıb. 4 mindən çox bank hesabı araşdırılıb və onlar arasında 1,2 milyard lirə pul axını olduğu müəyyən edilib.
ASTANADA SURİYA ÜZRƏ DANIŞIQLARIN NÖVBƏTİ RAUNDU KEÇİRİLİB
Qazaxıstanın paytaxtı Astanada Suriya üzrə danışıqların növbəti raundu baş tutub. “Report” agentliyinin xəbərinə görə, bu barədə İran, Rusiya və Türkiyə nümayəndələrinin Suriya üzrə 20-ci beynəlxalq görüşünün yekunlarına dair birgə bəyanatında qeyd olunur.
Məlumata görə, tərəflər Astanada Rusiya, İran, Suriya və Türkiyənin xarici işlər nazirlərinin müavinləri arasında keçirilmiş məsləhətləşmələrin konstruktiv xarakter daşıdığını qeyd ediblər. Bununla yanaşı, Türkiyə ilə Suriya arasında münasibətlərin bərpası üçün “yol xəritəsi”nin hazırlanmasının gedişatı müzakirə edilib.
Qeyd edək ki, bu ölkələrin xarici işlər nazirlərinin 2023-cü il mayın 10-da Moskvada və müdafiə nazirlərinin 2023-cü il aprelin 25-də keçirilmiş dördtərəfli görüşlərdə əldə olunmuş razılaşmaların icrası istiqamətində fəal səylərin davam etdirilməsinin vacibliyi vurğulanıb.
Eyni zamanda, tərəflər Suriya üzrə 21-ci beynəlxalq toplantının 2023-cü ilin ikinci yarısında keçirilməsi barədə razılığa gəliblər.
UKRAYNA VƏ NATO-nun MÜDAFİƏ SAHƏSİNDƏ MƏSLƏHƏTLƏŞMƏLƏRİ
İyun ayının 20-dən etibarən Ukrayna və NATO ekspertlərinin müdafiə planlaması üzrə müntəzəm məsləhətləşmələri başlayıb. “Report” agentliyinin xəbərinə görə, bu barədə Ukrayna Müdafiə Nazirliyi məlumat yayıb. İclasda Ukrayna müdafiə nazirinin birinci müavini general-leytenant Aleksandr Pavlyuk və NATO baş katibinin əməliyyatlar üzrə köməkçisi Tomas Qoffus iştirak ediblər.
Verilən xəbərə görə, müttəfiq dövlətlər 2022-ci ildə NATO-nun Madrid Sammitinin qərarı kontekstində alyans standartlarına keçid üçün öz “yol xəritəsini” hazırlamaqda Ukraynaya kömək edəcək.
Görüşdə həmçinin Ukrayna Müdafiə Nazirliyinin, Baş Qərargahın və müdafiə qüvvələrinin digər hissələrinin nümayəndələri və NATO Beynəlxalq Katibliyinin müdafiə planlaması üzrə ixtisaslaşmış ekspertləri iştirak ediblər.
COZEF BAYDENİN OĞLU İKİ İTTİHAM ÜZRƏ GÜNAHINI ETİRAF EDİB
ABŞ prezidenti Cozef Baydenin oğlu Hanter Bayden vergi pozuntusu ilə bağlı iki ittiham üzrə günahını etiraf edib. “Teleqraf.com”un verdiyi xəbərə görə, bunu Ədliyyə Nazirliyinin Delaver ştat məhkəməsinə göndərdiyi və məhkəmə məlumat bazasında dərc olunmuş məktubdan görmək mümkündür.
“Təqsirləndirilən şəxs vergi məlumatı ilə bağlı iki epizod üzrə özünü təqsirli bilməyə razılaşıb”, - deyə Ədliyyə Nazirliyinin sənədində qeyd olunur. Dərc edilmiş materiallardan məlum olur ki, Hanter Bayden iki halda qəsdən vergi ödəməməkdə ittiham olunur.
Üçüncü ittihama əsasən, prezident oğlu oktyabrın ortalarında qanunsuz narkotik vasitələrdən istifadə edib, həmçinin üzərində “Colt” markalı tapança daşıyıb ki, bu da qanun pozuntusu sayılır. Qeyd edək ki, Amerika qanunvericiliyi narkotik vasitə saxlayan və ya ondan istifadə edən şəxslərə silah gəzdirməyi qadağan edir. Bununla yanaşı, Ağ Evin açıqlamasında qeyd edilir ki, Hanterin valideynləri “həyatını yenidən qurması prosesində onu dəstəkləyirlər”.
Hazırladı:
Vamiq ABBASOV,
“Respublika”.