BMT-DƏN RUSİYAYA UKRAYNA İLƏ BAĞLI ÇAĞIRIŞ
Birləşmiş Millətlər Təşkilatı (BMT) “Kaxovka” su elektrik stansiyasında bəndin dağılmasından sonra lazımi humanitar yardımın bölgəyə çatdırılması üçün Rusiyaya nəzarəti altında olan ərazilərə giriş icazəsi verməsi ilə əlaqədar çağırış edib. Bu barədə “TRT” telekanalı məlumat yayıb.
BMT-nin Ukraynadakı humanitar məsələlər üzrə koordinatoru Denis Braun Ukraynadakı “Kaxovka” SES-də baş verən fəlakətdən sonra bölgəyə humanitar yardımın çatdırılması mövzusunda Ukrayna və Rusiya hökumətləri ilə əməkdaşlıq etdiklərini bildirib.
“Rusiya Federasiyası indiyədək onun müvəqqəti hərbi nəzarəti altında olan ərazilərə giriş xahişimizi rədd edib”, - deyən Denis Braun BMT-nin bölgəyə humanitar yardım çatdırmaq üçün səylərini davam etdirəcəyini diqqətə çatdırıb.
“Biz Rusiya hakimiyyətini beynəlxalq humanitar hüquq çərçivəsində öz öhdəliklərinə uyğun hərəkət etməyə çağırırıq”, - deyə Denis Braun bəyan edib.
SERBİYA HƏRBİ PLANLARINI BEYNƏLXALQ İCTİMAİYYƏTLƏ BÖLÜŞMƏYƏCƏK
Serbiya döyüşə hazırlıq statusunun dəyişməsi barədə beynəlxalq ictimaiyyəti məlumatlandırmağı dayandıracaq. “Sputnik” informasiya agentliyinin verdiyi xəbərə görə, bu barədə Serbiya prezidenti Aleksandar Vuçiçin xalqa müraciətində qeyd edilib.
“Biz NATO istisna olmaqla, döyüş hazırlığımızın dərəcəsinin artırılması və ya azalması ilə bağlı heç kimə məlumat verməyəcəyik”, - deyə Vuçiç vurğulayıb.
Eyni zamanda, Serbiya dövlət başçısı əlavə edib ki, BMT Təhlükəsizlik Şurasının 1244 saylı qətnaməsinə əsasən öhdəliklərin mövcudluğuna görə, yalnız Şimali Atlantika Alyansı aktual məlumatlarla təmin olunacaq.
Verilən xəbərə görə, Serbiyadakı vəziyyət və Vuçiçin qərarları ilə bağlı digər təfərrüatlar açıqlanmır.
MİQRANT GƏMİSİNİN BATMASI NƏTİCƏSİNDƏ AZI 300 PAKİSTANLI HƏLAK OLUB
Liviyadan İtaliyaya qeyri-qanuni mühacirlər daşıyan gəminin Yunanıstan sularında batması nəticəsində 300-ə yaxın pakistanlı həlak olub. “Report” agentliyinin məlumatına görə, bu barədə Pakistan Senatının sədri Sadiq Sancraninin ofisi məlumat yayıb.
“Senat sədri Sadiq Sancrani Yunanıstan sahillərində gəminin qəzaya uğraması nəticəsində 300-ə yaxın pakistanlının faciəvi şəkildə həlak olmasına görə dərin hüzn keçirir”, - deyə Sancraninin ofisinin “Twitter” səhifəsində qeyd olunur.
Eyni zamanda, Pakistanın baş naziri Şahbaz Şərif batmış qayıqla bağlı insidentin başvermə şəraitini aydınlaşdırmaq üçün yüksək səviyyəli təhqiqat aparılmasına dair göstəriş verib.
Bununla yanaşı, yunan mətbuatı yazır ki, Yunanıstan rəsmiləri ölənlərin sayını hələ ki təsdiqləməyib.
Məlumata əsasən qayıq iyunun 14-də batıb. BMT-nin miqrasiya agentliyi onun göyərtəsində təxminən 750 nəfərin olduğunu bildirib. Avropa Komissiyasının daxili işlər üzrə üzvü İlva Yohanssonun sözlərinə görə, faciə Aralıq dənizində baş vermiş ən dəhşətli faciələrdən biridir.
ÇİNDƏ NİKAH VƏ DOĞUM SAYINDA KƏSKİN AZALMA QEYDƏ ALINIB
Çində ötən il nikahların və doğumların sayında ən aşağı göstərici qeydə alınıb. “Sputnik” informasiya agentliyinin xəbərinə görə, ölkədə demoqrafik böhran hökumətin ciddi narahatlığına səbəb olub.
Çinin Vətəndaş İşləri üzrə Nazirliyinin məlumatına görə, 2022-ci ildə ölkədə 6,83 milyon cütlük evlənib ki, bu da 2021-ci ildə qeydə alınan 7,63 milyonluq göstəricidən 10,5 faiz az olmaqla, nikah statistikasının aparıldığı 1986-cı ildən bəri rekord azalmadır.
Eyni zamanda, ötən il Çin əhalisi 60 ildə ilk dəfə azalmağa başlayıb və min nəfərə 6,77 doğuş düşüb. Bu, ÇXR-də Kommunist partiyasının hakimiyyətə gəldiyi 1949-cu ildən bəri ən aşağı göstəricidir.
Qeyd edək ki, uşaqların sayına nəzarət siyasətini yüngülləşdirən, nikah və doğumu stimullaşdırmaq üçün yeni üsullar axtaran Çin hakimiyyətinin son illər bu tendensiyasını geri döndərmək üzrə cəhdləri hələlik nəticə vermir.
KXDR NÜVƏ QÜVVƏLƏRİ YARATMAQ NİYYƏTİNDƏDİR
KXDR öz nüvə potensialını artırmaq üçün səylərini davam etdirmək, təhdid yaranacağı təqdirdə isə “nüvə silahına nüvə silahı ilə cavab vermək” niyyətindədir. “TASS” agentliyinin verdiyi xəbərə görə, bu barədə Koreya Əmək Partiyası Mərkəzi Komitəsinin Siyasi Bürosunun təşəbbüsü ilə keçirilən səkkizinci genişləndirilmiş plenar iclasın yekunlarına dair məlumatda qeyd olunub.
Bildirilir ki, plenar iclas iyunun 16-18-də ölkənin lideri Kim Çen Inın iştirakı ilə keçirilib.
Açıqlamaya əsasən, dövlətin müdafiə sənayesi Mərkəzi Komitənin nüvə silahlarının inkişaf etdirilməsi və nüvə qüvvələrinin yaradılmasına dair müəyyənləşdirdiyi istiqaməti saxlamalıdır.
Plenumda 2023-cü ilin birinci yarısı üçün bütün sahələrdə, o cümlədən iqtisadi sahədə görülmüş işlərə yekun vurulub. İclas iştirakçıları dəyişmiş beynəlxalq şəraitdə partiya, diplomatiya və müdafiə sahəsində strategiyanın gücləndirilməsi ilə bağlı məsələləri müzakirə ediblər.
TÜRKİYƏDƏ ƏYALƏTLƏRİN SAYI 100-ə ÇATA BİLƏR
Türkiyədə vilayətlərin sayı kurort bölgələri də daxil olmaqla 81-dən 100-ə qədər arta bilər. “Sputnik” informasiya agentliyinin verdiyi xəbərə görə, bu barədə “Hürriyet” qəzeti məlumat yayıb.
Qəzetin açıqlamasına görə, Aralıq dənizi kurortları, xüsusən də Alanya, Manavqat, Fethiye və Tarsus yeni əyalətlərə çevrilə bilərlər.
Bildirilir ki, yeni inzibati-ərazi birləşmələrinin yaradılması üçün parlamentin qərarı və onların müəyyən meyarlara uyğunluğu zəruridir. Xüsusilə, bölgənin əhalisi ən azı 100 min nəfər, mənzil və nəqliyyat infrastrukturu, iqtisadiyyat, təhsil və səhiyyə inkişaf etmiş vəziyyətdə olmalıdır.
Qeyd edilir ki, yeni əyalətlərin yaradılması məsələsinin 2024-cü ilin martına planlaşdırılan bələdiyyə seçkilərindən sonra Türkiyə parlamentinin gündəliyinə gətirilməsi gözlənilir.
Eyni zamanda, nəşrin məlumatına əsasən, hakim “Xalq Alyansı” 600 yerlik qanunvericilik məclisində çoxluğa malikdir və ekspertlərin fikrincə, buna görə də belə qanunun qəbul edilməsi rəsmiləşdiriləcək.
İNSANLAR YER KÜRƏSİNİ FƏLAKƏTƏ SÜRÜKLƏYİR
Yerin alt qatlarından böyük həcmdə suyun çəkilməsinin planetimizin fırlanma oxunu dəyişdirdiyi üzə çıxıb. “Teleqraf.com” xəbər verir ki, yeni araşdırmada dəyişikliyin arxasında insan faktorunun olması diqqət çəkib.
Araşdırmaya əsasən, insanlar yerin altından o qədər çox su çəkiblər ki, Yer kürəsinin fırlanma oxu 20 il ərzində təxminən 80 santimetr şərqə doğru dəyişib.
Eyni zamanda, Yerin coğrafi qütbünün yerdəyişməsini tədqiq edən elm adamlarının sözlərinə görə, yeraltı suların təsiri olmadan belə bir yerdəyişmə mümkün olmazdı.
Alimlər qeyd edirlər ki, Yerin ətrafında fırlandığı ox sabit və statik deyil. Yer kürəsi Şimal və Cənub qütblərindən keçən xəyali xətt - öz oxu ətrafında fırlandıqca sürüşür və yırğalanır. Fırlanma oxundakı bu hərəkətlərə “qütb gəzintisi” deyilir. Şimal qütbünün hər il eni 10 metr olan dairə çəkdiyi məlumdur.
Hazırladı:
Vamiq ABBASOV,
“Respublika”.