Müdafiə Nazirliyinin təşkilatçılığı ilə Tovuz döyüşlərinin üçüncü ildönümü ərəfəsində media nümayəndələri üçün əməliyyatların həyata keçirildiyi ərazilərdə media-tur təşkil olunub.

“Respublika” xəbər verir ki, bu barədə nazirliyin mətbuat xidməti məlumat yayımlanıb. Media nümayəndələri Tovuz döyüşlərinin iştirakçısı olan, eləcə də bu ərazilərdə dislokasiya olunan hərbi hissədə xidmət edən hərbi qulluqçulardan müsahibələr götürüb və çəkilişlər aparıblar.

Hərbi qulluqçular 2020-ci ilin iyul ayının 12-dən 17-dək dövlət sərhədinin Tovuz rayonu istiqamətində atəşkəs rejiminin kobud şəkildə pozulması nəticəsində gedən döyüş əməliyyatlarından xatirələrini bölüşüblər.

Media-tur çərçivəsində media nümayəndələri şəxsi heyətin xidməti və döyüş fəaliyyətinin təşkili, eləcə də məişət şəraitinin təmin edilməsi məqsədilə hərbi hissədə yaradılan şəraitlə də yaxından tanış olublar.

Yaradılan şəraitdən məmnunluqlarını ifadə edən hərbi qulluqçular Vətənə xidmət etməkdən qürur duyduqlarını bildiriblər.