Ötən əsrin 90-cı illərinin ortalarında ümummilli lider Heydər Əliyevin təşəbbüsü ilə və rəhbərliyi altında MDB məkanında ilk dəfə olaraq Azərbaycanda torpaq islahatları uğurla həyata keçirildi. Bu, çox mütərəqqi hadisə idi, çünki torpaq ilk dəfə idi ki, kəndliyə - öz sahibinə verilirdi.
Torpaq islahatı ölkədə məhsul bolluğu yaratdı. Amma təəssüf ki, heç də bütün insanlar bunun tarixi əhəmiyyətini lazımınca dərk etmirlər. Hələ də pay torpaqlarında ev, ferma tikənlər, balıq hovuzu yaradanlar var. Halbuki pay torpaqları kəndliyə əkin üçün verilib, bu torpaqların təyinatı məhsul bolluğu yaratmaqdır.
Təbi pay torpaqlarından öz təyinatına uyğun istifadə məsələsi müvafiq dövlət qurumlarının diqqət mərkəzindədir. İqtisadiyyat Nazirliyi yanında Əmlak Məsələləri Dövlət Xidməti tərəfindən ölkə ərazisində torpaqlardan qanunvericiliyə zidd istifadə halları ilə bağlı monitorinqlər və torpaq reydləri keçirilir. Dövlət Xidməti bildirir ki, monitorinqlərin məqsədi torpaqların təyinatından kənar istifadə edilməsi, özbaşına zəbt olunması və qanunsuz tikintilərin aparılması hallarını müəyyən etməkdir.
Cari ilin yanvar-iyun ayları ərzində müfəttişləri tərəfindən torpaq qanunvericiliyi tələblərinin pozulması ilə bağlı ölkə ərazisində monitorinqlər keçirilib, 10328 hal üzrə qanun pozuntuları aşkar edilib və bu barədə aidiyyəti orqanlara məktub ünvanlanıb. Aşkar edilən qanun pozuntuları ilə bağlı 1221 inzibati protokol tərtib edilib. Bu ilin ilk 6 ayı ərzində aparılan monitorinqlərin nəticəsinə görə, ən çox torpaq qanunvericiliyinin tələblərinin pozulması halları Bakı şəhərində, Abşeron, Şəmkir, Bərdə, Beyləqan rayonlarında olub.
Torpaqlar üzərində monitorinqlər davam edir.
Nəriman CAVADOV,
“Respublika”.