Ümummilli Lider Heydər Əliyevin müdrik siyasətinə uyğun olaraq, ölkəmizdə əlilliyi olan şəxslərə hərtərəfli qayğının göstərilməsi üçün qəbul olunan genişmiqyaslı proqramlar respublika Prezidenti İlham Əliyevin rəhbərliyi sayəsində uğurla həyata keçirilir. Həmin proqramda əlilliyin qarşısının alınması, əlillərin reabilitasiyası və sosial müdafiəsi haqqında qanunun bütün müddəaları öz əksini tapıb və əlillərin sosial müdafiəsi, onların cəmiyyətə inteqrasiyası ildən-ilə gücləndirilib. Bu məqsədlə respublikamızın bir çox bölgələrində olduğu kimi, Şəkidə də reabilitasiya mərkəzi fəaliyyət göstərir.
Qeyd etmək istərdik ki, əvvəllər mərkəzə yalnız şimal-qərb rayonlarından əlilliyi olan şəxslər gəlirdisə, indi respublikanın bütün bölgələrindən, o cümlədən Ağstafa, Qazax, Şəmkir, Gəncə, Goranboy, Yevlax, Ağdaş, Göyçay, Ucar, Kürdəmir, Bakı, Sumqayıt və digər ərazilərdən olan əlilləri də qəbul edirik. Belə ki, mərkəzdə əlillərin reabilitasiyası fərdi reabilitasiya proqramına uyğun olaraq həyata keçirilir.
Reabilitasiya mərkəzində müalicəvi bədən tərbiyəsi MBT, elektroterapiya, amplipuls terapiya, elektroyuxu, dərman elektroforezi, elektrostimulyasiya, diadinamoterapiya, yüksəkgərginlikli elektrik cərəyanı - darsonvalizasiya, optik diapazonlu elektromaqnit rəqsləri - infraqırmızı şüalarla, maqnit və elektromaqnit sahəsi ilə, maqnitoterapiya, santimetr diapazonlu elektromaqnit dalğaları, yüksəktezlikli səs dalğaları - dərman fonoforezi, alçaqtezlikli səs dalğaları ilə müalicə, zərbə dalğa terapiyası, masaj, su masajı üzərindən istifadə olunur. Bir sözlə, müalicələr müştərək şəkildə aparılır.
Səhiyyə İşçilərinin Peşə Bayramı Günü ilə bağlı Prezident İlham Əliyevin sərəncamına əsasən təltif olunan tibb işçilərinin arasında mənim də adımın olması və "Tərəqqi" medalı ilə mükafatlandırılmağımı kollektivimizin hər bir üzvünün əməyinə verilən yüksək dəyər kimi qiymətləndirirəm. Çünki səhiyyədə qazanılan uğur kollektiv əməyin bəhrəsidir.
Tərlan QURBANOV,
Şəki Reabilitasiya Mərkəzi PHŞ-nin
direktoru, "Tərəqqi" medallı.