Ermənistan siyasi elitasının hərbçiləri haqqında formalaşdırdığı məğlubedilməzlik mifi və düşmən ordusu daxilində hökm sürən xaosla bağlı məsələləri şərh edən Sosial Tədqiqatlar Mərkəzinin sektor müdiri, politoloq Tural İsmayılov bildirir ki, Ermənistan ordusu haqqında uzun illərdir yanlış mif formalaşdıranlar Ermənistan hakimiyyətində təmsil olunan qüvvələr idi. Bu siyasi qüvvələr bir-birini əvəzləsələr də, real islahatlardan qaçıb ölkə daxilindəki xaosu, ağır durumu aradan qaldırmaq yerinə, xalqı saxta vətənpərvərlik şousuna cəlb edirlər.
Əslində, Ermənistanda aparılan yanl
ış siyasi təbliğat konkret olaraq bir hakimiyyətin adı ilə bağlı deyil. Robert Koçaryanın hakimiyyəti dövründə başlanılan bu siyasi xətt Serj Sarkisyanın prezident olduğu illərdə kulminasiya nöqtəsinə çatdı. Müxalifətdə olarkən hakim rejimin bu saxta vətənpərvərlik şoularını daim tənqid edən Nikol Paşinyan özü siyasi iqtidara gəldikdən sonra eyni formada onların yolunu davam etdirirdi. Nəticədə böyük Ermənistan ordusu mifi ətrafında aldadılan bir xalq formalaşdı. Lakin Azərbaycan ordusunun 44 günlük Vətən müharibəsində düşmənə vurduğu sarsıdıcı zərbə təkcə ermənilərin hərbi və diplomatik mənada məğlubiyyətə düçar olması ilə nəticələnmədi. Bizim qazandığımız qələbə Ermənistan ordusu haqqında uydurulmuş miflərin darmadağın edilməsinə səbəb oldu. Bu gün nizamnamədən kənar davranışlara görə ən çox əsgər ölümlərinin qeydə alındığı orduların başında Ermənistan dayanır. Həm Ermənistanın özünün açıqladığı rəsmi statistikalar, həm də dünyada hərbi sahə üzrə araşdırma aparan tədqiqat mərkəzlərinin gəldiyi nəticələrdən aydın olur ki, Ermənistan əsgər ölümlərinin sayına (əsgərlərlə-əsgərlər, əsgərlərlə-zabitlər və zabitlərlə-zabitlər) görə liderdir. Eyni zamanda Ermənistandakı kütləvi sayda əsgər ölümləri gizlədilir və guya hərbçilərin avtomobil qəzalarında, digər bədbəxt hadisələrdə dünyasını dəyişdikləri bildirilir. Əlbəttə ki, bütün bunlar rəsmi hakimiyyət qurumları tərəfindən saxta şəkildə dərc edilmiş "hesabatlardır". Əsgər ölümləri və qarşıdurmalar böyük problemlər və eyni zamanda ordu daxilindəki nizamnamədən kənar davranışlar nəticəsində formalaşıb.
"Nikol Paşinyanın həyat yoldaşının 44 günlük Vətən müharibəsində Ermənistan ordusunda 11 min fərarinin olmağı ilə bağlı verdiyi açıqlama da ordularındakı rəzil durumu göstərir. Həmçinin Ermənistanda ordunun maddi-texniki təminatı da çox aşağı səviyyədədir. Bu gün Ermənistan Rusiyadan aldığı pulsuz yararsız silahların ümidinə qalıbdır. Eyni zamanda erməni hərbçiləri NATO standartlarına uyğun hər hansı bir təlim görməyiblər. Ölkənin KTMT üzvlüyü isə Ermənistan ordusuna əlavə bir təsir etməyib. Ermənistan ordusunda casus şəbəkələri də geniş yayılıb. Necə ki, siyasi idarəetmədə vahid bir mərkəz yoxdur, eləcə də hərbi komandanlıqda da idarəetmə xaosu yaşanır. Ümumiyyətlə, bu ölkədə Ali Baş Komandan anlayışı mövcud deyil. Nikol Paşinyana Ali Baş Komandan kimi hörmət etmirlər və komandirlər arasında ikili fikirlər mövcuddur. Zabitlər Rusiyadan təlimat alsa da bəziləri birbaşa Sorosçular və Ermənistanda siyasi hakimiyyəti qəsb etmiş qərb imperialistlərinin oyuncağına çevriliblər. Bu baş verən hadisələr düşmən ordusunda mənəvi-psixoloji durumu aşağıya salır. İnsanlar övladlarını orduya göndərmək istəmir, hər gün əsgər valideynləri müxtəlif hərbi və siyasi institutların binaları qarşısında etiraz aksiyaları keçirirlər. Proseslər cəmiyyətlə ordu arasındakı uçurumun nə qədər kəskin olduğunu bir daha sübut edir", - deyə ekspert vurğulayıb.
Musa BAĞIRLI,
"Respublika".
