“Applied and Computational Mathematics (Tətbiqi və Hesablama Riyaziyyatı)” beynəlxalq elmi jurnalının təsir əmsalı (Impact Factor) 4.771-dən 10-a qalxıb. 5 illik təsir əmsalı isə 3.172-dən 5.2-yə yüksəlib.

Rəqəmsal İnkişaf və Nəqliyyat Nazirliyindən (RİNN) bildirilir ki, jurnal RİNN, Bakı Dövlət Universitetinin (BDU) nəzdində olan Tətbiqi Riyaziyyat Elmi-Tədqiqat İnstitutu və AMEA-nın təsisçiliyi, Elm və Təhsil Nazirliyinin (ETN) İdarəetmə Sistemləri İnstitutunun dəstəyi ilə dərc edilir.

Jurnal dünyada riyaziyyat, tətbiqi riyaziyyat kateqoriyası üzrə “Web of Science Core Collection” siyahısında olan 267 jurnal arasında 2-ci, Avropa İttifaqında isə 1-ci yerdə qərarlaşıb. Əvvəlki illərdə olduğu kimi, MDB ölkələri sırasında öz liderliyini qoruyub saxlayır. Həmçinin bildirək ki, 267 jurnal arasında 1-ci yerdə olan “SIAM REVIEW” jurnalının (ABŞ) təsir əmsalı 10.2-dir.

Qeyd edək ki, 2008-ci ildə jurnal “Thomson Reuters (indiki Clarivate Analytics)” agentliyinin “Science Citation Index Expanded” siyahısına daxil edilib. Bu təşkilatın illik hesabatına əsasən (2009 Journal Citation Reports) 2010-cu ildə jurnal Azərbaycan elm tarixində ilk dəfə olaraq 0.633 təsir əmsalına layiq görülüb.

Jurnalın fəxri redaktoru İllinoys Universitetinin (ABŞ) professoru Tamer Başar, baş redaktorları BDU-nun Tətbiqi Riyaziyyat Elmi-Tədqiqat İnstitutunun direktoru, akademik Fikrət Əliyev, ETN-in İdarəetmə Sistemləri İnstitutunun baş direktoru, akademik Əli Abbasov, baş redaktor müavinləri AMEA-nın müxbir üzvü Vaqif Quliyev, Doğu Akdeniz Universitetinin (KKTC) professoru Nazim Mahmudov, BDU-nun Tətbiqi Riyaziyyat Elmi-Tədqiqat İnstitutunun elmi katibi dosent Nərgiz Səfərova, icraçı redaktoru isə BDU-nun Tətbiqi Riyaziyyat Elmi-Tədqiqat İnstitutunun aparıcı elmi işçisi Nazilə Hacıyevadır. Redaksiya heyətinə dünyanın 20-yə yaxın ölkəsini təmsil edən tanınmış alimlər cəlb olunublar.

Jurnalın bu günə qədər 57 sayı çapdan çıxıb. Bu nömrələrdə dünyanın 50-dən artıq ölkəsini təmsil edən müəlliflərin 600-dək məqaləsi dərc olunub. İldə dörd nömrə olmaqla, jurnalda müasir tətbiqi və hesablama riyaziyyatının aktual istiqamətlərində əldə edilən yüksək səviyyəli, əsaslı rəydən keçmiş ən son elmi nəticələr çap olunur. Hazırda jurnalın 500-dən çox tanınmış rəyçisi var. Nəşr olunduğu 22 il müddətində jurnal 50-dən artıq ölkədən 200 beynəlxalq müəssisə ilə elmi mübadilə aparıb.