25 mindən artıq pay torpağı dövlət vəsaiti hesabına sənədləşdirilib
İQTİSADİYYAT

25 mindən artıq pay torpağı dövlət vəsaiti hesabına sənədləşdirilib

Ötən əsrin 90-cı illərinin ortalarında ümummilli lider Heydər Əliyevin təşəbbüsü və rəhbərliyi ilə MDB məkanında ilk dəfə olaraq Azərbaycanda torpaq islahatları uğurla həyata keçirildi. Torpaq pulsuz olaraq öz sahibinə - kəndlilərə verildi. Aradan 30 il keçməsinə rəğmən, bəzi şəxslər səhlənkarlıq edərək hələ də öz pay torpaqlarını özəlləşdirməyiblər. Ötən il Prezident İlham Əliyev məhsul istehsalçılarına qayğı məqsədilə pay torpaqlarının özəlləşdirilməsini dövlətin maliyyə dəstəyi hesabına təmin etmək barədə müvafiq sərəncam imzaladı.

 İqtisadiyyat Nazirliyi yanında Əmlak Məsələləri Dövlət Xidməti bidirir ki, qurum tərəfindən ötən ilin dekabr ayından hazırkı dövrədək mülkiyyət sənədləri ilə təmin edilməmiş pay torpaqlarına sahib olan 34 minə yaxın şəxsin ərizəsi qəbul olunub. 25 mindən artıq torpaq sahəsi üzərində vətəndaşların mülkiyyət hüququ daşınmaz əmlakın dövlət reyestrində qeydiyyata alınıb. Xidmət tərəfindən ərizəsi qəbul edilən digər vətəndaşların mülkiyyət sənədləri qanunvericiliklə müəyyən olunmuş müddətdə təqdim ediləcək.

Xatırladaq ki, görülən işlər Azərbaycan Respublikası Prezidentinin "Torpaq münasibətlərinin tənzimlənməsi ilə bağlı bəzi məsələlər haqqında" 7 oktyabr 2021-ci il tarixli Fərmanına uyğun olaraq həyata keçirilir. Yəni xərci dövlət ödəyir.

Məqsəd əhalinin sosial rifahının yaxşılaşdırılması, kənd təsərrüfatının inkişafı və fermerlərin subsidiyalardan faydalanmasının təmin edilməsidir. Qeydiyyat xidmətlərinin birbaşa yerlərdə göstərilməsi vətəndaşların əmlak hüquqlarından və xidmətlərdən daha operativ və rahat şəkildə yararlanmasına imkan yaradır.

Pay torpaqlarının dövlət vəsaiti hesabına sənədləşdirilməsi ilə bağlı ümumilikdə müsbət dinamika müşahidə edilsə də, bəzi ərazilərdə bu istiqamətdə aparılan işlər zamanı bir sıra çətinliklərə rast gəlinir. Belə ki, torpaq islahatı zamanı pay torpağı alan vətəndaşların ailə tərkibinin və şəxsi məlumatların düzgün yazılmaması, vətəndaşlardan bəzilərinin uzun illər torpaq payından istifadə etməməsi, verilən torpaqlardan əlavə sahənin qanunsuz istifadəsi mülkiyyət hüquqlarının qeydiyyatını ləngidir.

Yuxarıda qeyd olunan məsələlər araşdırılır və qanunvericiliyə uyğun olaraq həlli istiqamətində tədbirlər görülür.

Nəriman CAVADOV,

"Respublika".