Ali Məhkəmə tərəfindən həyata keçirilən "Femida Dialoq Platforması" çərçivəsində növbəti görüş sahibkarlarla keçirilib.
Görüşdə çıxış edən Ali Məhkəmənin və Məhkəmə-Hüquq Şurasının sədri İnam Kərimov layihənin məqsədi barədə tədbir iştirakçılarına məlumat verib. Diqqətə çatdırılıb ki, "Femida Dialoq Platforması"nda hüquqşünaslar, vətəndaş cəmiyyəti institutları, sahibkarlar, eləcə də digər sahələrdə fəaliyyət göstərən təşkilatlarla məhkəmə-hüquq sistemində qanunvericiliyin təkmilləşdirilməsi, ortaya çıxan problemlərin həlli istiqamətində müzakirələr təşkil edilir. Üçüncü görüşün sahibkarlarla keçirilməsinin təsadüfi olmadığını vurğulayan sədr qeyd edib ki, sahibkarlığın inkişafı dövlətimizin iqtisadi inkişaf siyasətinin əsasını təşkil edir.
Bildirilib ki, Ulu Öndər Heydər Əliyevin ölkəmizdə yaratdığı dinamik iqtisadi inkişaf mühiti sonrakı illərdə dövlətimizin başçısı Prezident İlham Əliyev tərəfindən uğurla davam etdirilib. Azərbaycanda yeni kommersiya məhkəmələrinin fəaliyyətə başlamasının sahibkarlıq fəaliyyəti ilə bağlı mübahisələrin həllində hüquqi müəyyənliyin təmin edilməsi, sahibkarların hüquqlarının müdafiəsinin daha da gücləndirilməsi və biznes mühitinin yaxşılaşdırılması istiqamətində atılmış mühüm addım olduğu vurğulanıb.
Məlumat verilib ki, dövlət və məhkəmə hakimiyyəti vahid məhkəmə təcrübəsinin formalaşdırılması, məhkəmə orqanlarının səmərəliliyin gücləndirilməsi, mübahisələrin alternativ həlli institutlarının yaradılması və digər fundamental əhəmiyyət daşıyan məsələlərdə öz üzərinə düşəni həyata keçirir. Lakin sürətlə inkişaf edən dünyada yeni hüquq münasibətləri meydana çıxır, biznes mühitində rəqabətə davamlılıq getdikcə çətinləşir. Mövcud problemlərin əvvəlkindən daha çevik həlli tələb olunur, həm dövlətlər, həm də sahibkarlar yeni çağırışlarla üzləşirlər. Bu çağırışlara cavab vermək üçün ən uğurlu yol isə birgə əməkdaşlıq və dialoqdur. Ali Məhkəmənin də hər zaman dialoqa və sahibkarların məhkəmə sahəsində üzləşdiyi problemlərin həlli istiqamətində səy göstərməyə hazır olduğu xüsusi qeyd edilib.
Azərbaycan Sahibkarlar Konfederasiyasının prezidenti Məmməd Musayev çıxışında Ali Məhkəmə tərəfindən sahibkarlarla görüşün keçirilməsini yüksək qiymətləndirib və aparılan müzakirələrin məhkəmə mübahisələrində çevik qərarların qəbul edilməsinə təsir göstərəcəyini bildirib. Diqqətə çatdırılıb ki, ölkəmizdə biznes mühitinin yaxşılaşdırılması istiqamətində atılan addımların tərkib hissəsi kimi məhkəmə-hüquq sistemində aparılan islahatlar sahibkarlığın inkişafı baxımından kifayət qədər önəmlidir.
İnsan Hüquqları üzrə müvəkkil (ombudsman) Səbinə Əliyeva, İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov və digər tədbir iştirakçıları çıxışlarında "Femida Dialoq Platforması" çərçivəsində keçirilən görüşün sahibkar-məhkəmə münasibətlərinin inkişafına, ölkəmizdə sahibkarlıq mühitinin daha da yaxşılaşdırılmasına önəmli töhfə verəcəyini vurğulayıblar.
Sonra tədbirdə qarşılıqlı maraq doğuran məsələlər müzakirə olunub, həmçinin təkliflər səsləndirilib.
Ülvi QARAYEV,
“Respublika”.
