Qərbi Azərbaycan tarixinin öyrənilməsi, unudulmuş bir tarixin yaddaşlarda bərpası, həqiqət məqamının oyanışı və gerçək tariximizin təbliği, yeni haqq davamızda milli oyanışın ən vacib sütunlarından və dayaqlarından birinə çevrilməlidir.
Qısa bir zaman kəsiyində, dörd dəfə deportasiya və soyqırıma məruz qalan bir cəmiyyətin, tarixi-mədəni, pedaqoji-psixoloji irsinin öyrənilməsi, tədqiqi, təbliği və tədrisi, tarixi yaddaşla möhkəmləndirilmiş genetik qanunauyğunluğu və milli varlığımızın acı gerçəkliyinə həkk olunmuş, şüuraltı faciənin keçmiş gerçəkliyini gələcək nəsillərə çatdırmaqla, bu yolda usanmadan çalışmalıyıq.
Bu gün tarixi faciələrlə dolu olan xalqımızın öz əzəli yurdlarına dönüşü üçün ziyalılarımızın alim və söz sahiblərimizin üzərinə, çox müqəddəs və vacib bir yük düşür.
Belə ki, böyük elm-maarif, mədəniyyət mərkəzlərində, elm-təhsil ocaqlarında, özəl sektorda özünü təstiq edən Qərbi azərbaycanlılar, deportasiya həyatının canlı şahidi olan insanlarımız və onların varisləri, ata-babalarımızın yaratdıqları tarixi abidələrin, zəngin ədəbi-mədəni mühitin, milli-mənəvi dəyərlərin formalaşmasına xidmət edən təhsil ocaqlarımızı, adət-ənənələrin və bədii-estetik gözəlliyin öyrənilməsini və gələcək nəsillərə çatdırılmasını təşviq etməklə, xalqımızın tarixi yaddaşının zənginləşməsinə xidmət edib, ulu öndər Heydər Əliyevin dediyi kimi, "Biz nadir mənəvi irsin varisləriyik" prinsipini əldə əsas tutmaqla, Azərbaycan gerçəkliyi uğrunda canından və qanından keçməyə hazır olmalıdırlar.
Hər bir vətəndaşımız bu ənənəvi irsə layiq olmağa çalışmaqla, böyük bir tarixi keçmişi, zəngin mədəniyyəti və yüksək mənəviyyatı olan əcdadlarımızın, həm dünəninə, həm bu gününə, həm də sabahına dərin bir məsuliyyət hissi ilə yanaşmalıdırlar.
Tarix elə bir şahiddir ki, onun gördüklərini nə qədər gizlətməyə çalışsalar da, məqam çatanda özünü göstərir və öz sözünü deyir. Azərbaycan xalqının şərəfli tarixinə və keçmişinə, erməni vandalları və havadarları zaman-zaman nə qədər kölgə salıb unutdurmağa çalışsalar da, ancaq ilahi ədalət və haqq bizimlə olduğundan, qurtuluşumuz və nicatımız üçün, tarixi şəxsiyyətləri və sərkərdəlik fəhmi olan milli düşüncə sahiblərini genefondumuza bəxş etməklə, xalqımızı və tariximizi yox olmaqdan qorumuşdur. Zaman-zaman gizli və ya aşkar olaraq, bu haqsızlıqlara qarşı milli dirəniş göstərməklə, faciələrimizin unutdurulmasına imkan verilməmişdir.
Ulu öndər Heydər Əliyevin ikinci dəfə hakimiyyətə qayıdışı ilə soyqırımı və deportasiya aktı öz hüquqi qiymətini aldıqdan sonra, tarixi yurdlarımıza qayıdış uğrunda mübarizə yeni mərhələyə qədəm qoymuşdur. Qərbi Azərbaycan türkləri, qayıdış hərəkatına start verməklə, müxtəlif ictimai təşkilatlarda birləşərək, yeni və qətiyyətli mübarizə yoluna qədəm qoymaqla, tarixi yurdlarımıza dönüşün axtarışındadır. Təbii ki, bu hərəkat müxtəlif təşkilatlarda cərəyan etsə də, məqsəd, amal və şüar eyni idi: YURDA DÖNÜŞ, VƏTƏNDƏ GÖRÜŞ!
Qeyd edim ki, Azərbaycanın indiki hüquqi və siyasi sərhədlərindən kənarda qalan, İrəvanda, Göyçədə, Zəngəzurda, Dərələyəzdə, Ağbaba və digər tarixi yurdlarımızda əsrlər boyu yaşayan ata-babalarımız, bizlərə zəngin maddi və mənəvi mədəniyyət nümunələri, qəhrəmanlıq ənənələri qoyub getmişlər.
Azərbaycan Türklərinin ən sıx şəkildə məskunlaşdığı İrəvan quberniyası tarixən soydaşlarımızın yaşadığı və yaratdığı böyük milli-mənəvi maddi dəyərlərə, məişət, ədəbiyyat, incəsənət, dini etiqad, mətbuat, maarifçilik və çoxşaxəli sənətşünaslıq irsinə, öz mətbəx ənənələrinə və zəngin kulinariya mədəniyyətinə, Azərbaycan tarixinin və milli məfkurəsinin ayrılmaz tərkib hissəsi olmaqla yanaşı, həm də siyasi-fəlsəfi bu məkan xanlıqlar dövründə Azərbaycan dövlətçilik tarixinin ayrılmaz bir hissəsi idi.
Çox təəssüflər olsun ki, mədəniyyət və mənəviyyət paytaxtımız olan İrəvan şəhəri və ətraf bölgələri, müxtəlif imperiya güclərinin təzyiqi ilə heç bir ədalətə və hüquqi normalara uyğun gəlməyən əsaslarla, 1918-ci ildə Azərbaycan torpaqlarında yaradılan bic Ermənistan Respublikasına, paytaxt olaraq güzəştə gedilmişdir.
Bu barədə çox haqlı irad bildirən möhtərəm Prezident İlham Əliyev İrəvan şəhərinin ermənilərə paytaxt olaraq verilməsini tarixi ədalətsizlik kimi dəyərləndirməklə bunu Azərbaycan Xalq Cümhuriyyətinin tarixi səhvi və əzəli yurdlarımızda yaşayan azərbaycanlılara qarşı xəyanət aktı kimi dəyərləndirmişdir.
Çox qürurverici bir tarixə şahidlik etdik ki, Azərbaycan tarixinə zəfər imzası atmış Ali Baş Komandan, dövlətimizin və dövlətçiliyimizin ləyaqətli qarantı olan Prezident İlham Əliyev Qərbi Azərbaycan İcmasının inzibati binasının açılışında etdiyi tarixi çıxışı milli mücadilə yolumuza elmi-fəlsəfi baxışı, yurda qayıdış konsepsiyasının hazırlanması tapşırığı və Böyük Azərbaycan məfkurəsinin mübarizə taktikası, bütün xalqımız kimi, çoxsaylı Qərbi Azərbaycan toplumunda da böyük ruh yüksəkliyi yaratmışdır.
Prezidentimiz İlham Əliyevi əmin edirik ki, Qərbi Azərbaycan torpaqlarının və tarixi ərazi bütövlüyümüzün bərpası üçün həmişə öndə olmağa hazırıq, bu haqq savaşında ön sıralarda olanlardan və həmişə bir çağırışınızla, səsinizə səs verənlərdən olacağıq.
Namiq ASLANOV.