Vətəni canından üstün tutub onun yolunda şəhidliyi özünə şərəf bilən qəhrəman oğullardan biri Zabil İbadzadədir. O, xalqımıza zəfər sevinci yaşadan 44 günlük Qarabağ müharibəsində döyüş meydanında qanı bahasına yaşına uyuşmayan bir tarix yazdı. Bununla da 24 yaşında müqəddəs ruhu ən uca zirvələrdə dolaşan Vətən oğlu qəlblərdə yaşamaqla öz milləti üçün qəhrəmanlıq simvoluna çevrildi. İndi hər dəfə Zabilin adı çəkiləndə ürəkləri qürur, iftixar hissi alır. Layiq görüldüyü, şərəf rəmzi olan “Vətən uğrunda”, Cəbrayılın, Qubadlının azad olunmasına görə medallar da onun Vətənə halal sevgisindən gələn nəsillərə bir nişanə qaldı.
Zabil Fikrət oğlu İbadzadənin dünyaya göz açdığı Lənkəran rayonunun Gəgiran kəndi həmişə özünün halal çörəkli, yurd qeyrətli, Vətən sevdalı insanları hesabına tanınıb. Zabil də orta məktəbi bitirib başqasına işıq olmaqla özünə xoşbəxtlik çələngi hörmək məqsədilə müstəqil həyata qədəm qoyur. Erməni qəsbkarları tərəfindən təcavüzə məruz qalan Qarabağın taleyini düşünən gənc 2015-ci ildə Azərbaycan Silahlı Qüvvələrinin sıralarına yola düşəndə deyir:- Vətən borcunu şərəflə ödəmək hər bir qeyrətli oğlun ən böyük amalıdır. Mən də belə.
Bəli, Zabil İbadzadə xidmət etdiyi Qazax rayonunda yerləşən “N” saylı hərbi hissəsinin nümunəvi əsgəri olaraq böyük hörmət qazanır. Vətəninə, torpağına ürəkdən bağlılığı hərbi təlimlərdə göstərdiyi əla döyüş keyfiyyətlərində aydın bilinir. Azərbaycanın müqəddəs parçası olan Qarabağın azadlığı uğrunda hər şeyi mükəmməl öyrənməyə çalışır. Zabitlərə, əsgər yoldaşlarına bildirir ki, erməni dığalarının Qarabağımızın işğalda saxlaması bizə yaraşmır. Bu yolda ölüm olsa belə, düşməndən tezliklə qisası alınmalıdır. Həm də Zabilin əsgərlik həyatı başa çatanda keçirilən təlimlərdən yaxşı öyrəndiyi üçün düşmənlə mübarizə aparmaqdan ötrü özündə tükənməz qüvvə hiss edir.
Zabil əsgəri xidmətdən sonra gördüyü yaxşı işləri ilə insanlarda özünə qarşı səmimi hisslər oyadır. Ağıllı, işgüzar, humanist təbiətli bu gənc ömür yolunu ləyaqətlə gedir. Qaldı ki, Qarabağı unuda bilmir, xəyalı gecə-gündüz döyüş bölgələrində dolanır. İşğalçı erməni dığalarla bağlı bəd xəbərlər içində bir qəzəb tufanı yaradır. Vətən torpaqlarını yağı tapdağından qurtulması üçün silaha sarılıb meydan istəyir. Məhz buna görə Zabil İbadzadə 2020-ci il sentyabrın 27-də başlanan Vətən müharibəsinə könüllü qoşulur. Noyabrın 5-nə qədər Vətən, torpaq naminə min əzablı-əziyyətli yollar keçir. Cəbrayılın və Qubadlının azadlığı uğrunda gedən döyüşlərdə isə əsl tarix yazır. Zabil düşmənə qan uddurur, onlarla erməni əsgərini, zabitini, saysız-hesabsız döyüş texnikasını məhv edir. İgid əsgər şəhidlik zirvəsinə ucaldığı günü də qeyri-bərabər döyüşdə Vətənə can borcunu şərəflə ödəyir.
Zəfər ORUCOĞLU.
