Paytaxt Bakı daha bir beynəlxalq tədbirə, Formula 1 Qran-Prisinə evsahibliyi edir. Dünyaca məşhur yarışın ölkəmizə hansı üstünlükləri qazandıracağını qeyd edən politoloq Tural İsmayılov məsələyə bu cür münasibət bildirib:
- Formula 1 yarışlarının ölkəmiz üçün çox böyük əhəmiyyəti var. Əvvəla, nəzərə almaq lazımdır ki, bu yarış dünyanın ən çox maraq cəlb edən idman tədbirlərindən biridir. Həm maddi dividendlər gətirməsi, həm də dünya idmanında səs-küyə səbəb olması baxımından, səviyyəsinə görə Formula 1 ən vacib yarışlardan biridir və dünya idman arenasında çox böyük azarkeş kütləsi var. Həmçinin investisiya xarakterli yarış olduğundan reklam gəlirləri kifayət qədərdir. Təəccüblü deyil ki, xarici ölkələrin qabaqcıl avtomobil şirkətləri Formula 1 ilə əməkdaşlıq edir və bu, həm də yarışların reklam və piyar komponentləri baxımından da çox zəngindir. Ona görə də biz bu mövzuya ənənəvi idman yarışları səviyyəsində baxmamalıyıq. Çünki bu tədbir digərlərindən üstündür və siyasi əhəmiyyətə malikdir.
Ekspert əlavə edib ki, Formula 1-in keçirildiyi ölkələrə dünyanın ən bahalı avtomobil şirkətlərinin sahibləri, böyük investorlar səfərlər edirlər. Yarışın keçirildiyi məkan haqqında ayrı-ayrı reportajlar dünyanın nüfuzlu kütləvi informasiya agentliklərində dərc edilir. Ona görə də Azərbaycanın informasiya savaşında da qalib gəlməsinə müsbət töhfələr verəcək. Yarışların keçirildiyi müddətdə Azərbaycana bir çox xarici media nümayəndələrinin qurumları gəlir və ölkəmiz haqqında müxtəlif süjetlər, reportajlar hazırlayır, məlumatlar verirlər. Hesab edirəm ki, turizmin inkişafı ilə yanaşı, ölkəmizin siyasi maraqlarının dünya mətbuatında nümayiş etdirilməsi baxımından da əhəmiyyəti böyükdür.
Musa BAĞIRLI,
"Respublika".