Qeyri-neft sənayesinin davamlı inkişafında, regionlarda sahibkarlıq fəaliyyətinin genişləndirilməsində, məşğulluğun təmin edilməsində sənaye parkları və məhəllələri önəmli mexanizmlərdir.
Hacıqabul Sənaye Məhəlləsi Azərbaycan Respublikası Prezidentinin 25 iyul 2017-ci il tarixli Sərəncamı ilə yaradılıb. 100 nəfərdən çox işçinin daimi işlə təmin edildiyi Sənaye Məhəlləsində ümumi investisiya həcmi 51 milyon manatdan artıq olan 13 sahibkarlıq subyekti rezident kimi qeydiyyatdan keçib və bunlardan 8-i fəaliyyət göstərir. Sənaye Məhəlləsinin rezidentləri minik avtomobilləri, müxtəlif növ və ölçüdə polad şuruplar, taxta məhsulları, plastik qablar və taralar, tikinti materialları, gübrə istehsalı və s. sahələr üzrə ixtisaslaşıb. Rezidentlər tərəfindən indiyədək təxminən 44 milyon dəyərində məhsul istehsal edilib. İndiyədək Hacıqabul Sənaye Məhəlləsinə 25,3 milyon manat investisiya qoyulub, mövcud layihələr üzrə əlavə olaraq 25,8 milyon manatadək investisiyanın yatırılması, 400 nəfərə yaxın iş yerinin yaradılması nəzərdə tutulur.
Yeni fəaliyyətə başlamış "Provive" MMC-nin gübrə istehsalı müəssisəsində innovativ texnologiyaya əsaslanaraq "Black soldier fly" milçəyinin sürfələrindən istifadə olunmaqla qida tullantılarından zülal (heyvan mənşəli) və "Zoohumus" üzvi gübrəsi istehsal olunur. İnvestisiya həcmi 2,3 milyon manata yaxın olan müəssisədə 20-yə yaxın daimi iş yeri yaradılıb. Hazırda müəssisənin aylıq istehsal gücü 15 tondur və yaxın vaxtlarda bunun 30 tona çatdırılması planlaşdırılır.
Tikinti materialları üçün avadanlıqlar istehsal edən "Elberg" MMC-yə indiyədək 3,5 milyon manat investisiya yatırılıb və 40 nəfərdən çox iş yeri yaradılıb. İqtisadiyyat Nazirliyi tərəfindən investisiya təşviqi sənədi verilmiş müəssisədə Türkiyə, Yaponiya və Finlandiya texnologiyalarından istifadə edilir. İstehsal olunan məhsullar daxili bazarın tələbatının ödənilməsinə yönəldilib.
Sənaye Məhəlləsində fəaliyyət göstərən daha bir müəssisə plastik su qabları istehsal edən "Uysal Ambalaj" MMC-dir. İl ərzində 350 min ədəd plastik su qabı istehsal etmək gücündə olan müəssisənin qurulmasına 1,84 milyon manat investisiya yatırılıb, 10 daimi iş yeri yaradılıb.
"Az Agromila" MMC-nin maye, toz, gel, yarpaq gübrələri istehsalı müəssisəsi illik 6 min ton gübrə istehsal edir. Zavodun investisiya dəyəri 1,5 milyon manatdır. Müəssisədə 12 işçi çalışır.
Sənaye müəssisəsində plastik tara istehsalını həyata keçirən "Plasttech" MMC-nin qurduğu müəssisəyə 1,2 milyon manat investisiya yatırılıb və 5 iş yeri yaradılıb. Zavod ildə 600-900 ton plastik tara istehsal etmək gücündədir.
Beləliklə, Hacıqabul Sənaye Məhəlləsi qısa müddət ərzində istər məhsul istehsalı, istər yeni iş yerlərinin açılması sahəsində əldə qazanılan uğurları davam etdirməkdədir.
Tofiq HÜSEYN,
"Respublika".
