"Mən işğal dövründə dəfələrlə ictimaiyyət və beynəlxalq təşkilatlar qarşısında Ermənistana qarşı sanksiyaların tətbiq olunmasının vacibliyini bildirmişəm və bu da sözsüz ki, beynəlxalq təşkilatların bəyannamələrinə və qərarlarına əsaslanırdı. BMT Təhlükəsizlik Şurasının qətnamələri, Avropa Şurasının, həmçinin Avropa Şurası Parlament Assambleyasının qərarları, hətta Avropa Parlamentinin, - baxmayaraq ki, hazırda kifayət qədər ermənipərəst mövqedədir, onun da qəbul etdiyi qətnamə var idi ki, reallığı əks etdirirdi, - lakin bu sanksiyalar baş vermədi, bunlar Ermənistana qarşı tətbiq olunmadı. Çünki geosiyasi gündəlik tamamilə fərqli idi".
Bu sözləri iyulun 21-də "4-cü Sənaye İnqilabı dövründə Yeni Media" mövzusunda Şuşa Qlobal Media Forumunun açılış mərasimində Prezident İlham Əliyev deyib. Həmçinin ölkə başçımız qeyd edib ki, BMT Təhlükəsizlik Şurasının qəbul etdiyi qətnamələri döyüş meydanında icra etdik. Prezident İlham Əliyev bildirib ki, həmin dövrlərdə beynəlxalq aktorların heç biri, yəni bu gün "Qarabağ Azərbaycandır!" deyən beynəlxalq aktorlar heç vaxt bu ifadəni dilə gətirməyiblər. Lakin artıq dövr tamamilə dəyişib və onların hər biri Qarabağın Azərbaycan torpağı olduğunu qəbul etməyə məcburdur.
İkinci Qarabağ müharibəsindən sonra regionda bir çox yeni məsələlər ortaya çıxıb. Ölkəmizin bölgədə enerji, logistika baxımından baş aktor olması onun gücünü daha da artırır. Ölkəmizin bu mənada lider olmasının digər bir səbəbi də xarici siyasətində milli maraqlar və beynəlxalq hüquq normaları ilə yanaşı, sülh, sabitlik, inkişaf, qarşılıqlı faydalı əməkdaşlıq kimi meyarları da əsas götürməsidir. Şübhəsiz ki, Azərbaycan beynəlxalq münasibətlər sisteminə yeni və daha mütərəqqi dəyərlər təqdim edir. Həmçinin ölkəmizin həm ikitərəfli, həm də beynəlxalq təşkilatlar çərçivəsində səmərəli və qarşılıqlı faydalı əməkdaşlıq əlaqələrini uğurla davam etdirməsi, hakimiyyətin siyasi gücündən xəbər verir. Lakin Qərb qonşumuz bundan tamamilə uzaqdır. Ermənistanda daxili xaos yüksək səviyyədədir. İqtisadiyyatın getdikcə zəifləməsi nəticəsində bu gün ölkədə minlərlə işsiz, ac insan var. Xüsusilə də İkinci Qarabağ müharibəsindən sonra ölkədə baş verən qarşıdurmalar vəziyyəti daha da gərginləşdirib. Ermənistanın gah sülhə doğru addım atıb, gah da təxribatlar törətməsi isə Paşinyan hakimiyyətinin öz ölkəsinin və xalqının rifahının düşünmədiyinin digər bir nümunəsidir.
44 günlük Vətən müharibəsində parlaq qələbə qazanan Azərbaycan Cənubi Qafqaz regionunda sülh, təhlükəsizlik və əməkdaşlıq məkanına çevrilməsi istiqamətində yeni reallıqlar yaradıb. Məhz buna görə də müharibədə Ermənistanı ağır məğlubiyyətə uğratmasına baxmayaraq, ölkəmiz bölgənin gələcəyi naminə qarşı tərəfə beynəlxalq hüquq normalarına əsaslanan sülh sazişini imzalamağı təklif edib. Azərbaycanın sülhlə bağlı mövqeyi konkret, qəti və birmənalıdır. Bunun belə olduğunu ölkə başçımız öz çıxışlarında dəfələrlə bəyan edib. Həmçinin Şuşa Qlobal Media Forumunda da ölkə başçımız regionda mövcud olan vəziyyətin müsbətə doğru getməsinin əsas amilinin Azərbaycanla Ermənistan arasında münasibətlərin yaxşılaşmasından asılı olduğunu bildirib: "Hazırda bir sıra beynəlxalq təşkilatlar bizə qarşılıqlı qəbul olunacaq həlli tapmaqda yardım etməyə çalışırlar. Bu günə kimi gördüklərimiz odur ki, bütün beynəlxalq təşkilatlar başa düşür ki, bu həllər beynəlxalq hüquqa əsaslanmalıdır". Dövlətimizin başçısı deyib ki, öz müqəddəratının təyin olunması ərazi bütövlüyü prinsipini kölgədə qoymur. "Ermənistan artıq müstəqil dövlət kimi mövcuddur. Biz BMT Təhlükəsizlik Şurasının qəbul etdiyi qətnamələri döyüş meydanında icra etməli olduq. Beynəlxalq hüququn fundamental prinsipləri var və onlara riayət olunmalıdır".
Ümumilikdə, ölkəmizin Cənubi Qafqazın gələcəyi ilə bağlı mövqeyi aydındır və beynəlxalq hüquq norma və prinsiplərinə əsaslanır. Şübhəsiz ki, Prezident İlham Əliyevin siyasi-strateji gücü bu ilin sonuna qədər sülhün reallaşacağı həqiqətini qaçılmaz edir. Hazırda sülh danışıqlarında müəyyən irəliləyişlər mövcuddur. Hayastan tərəfi Azərbaycanın 86,6 min kvadratkilometr və Ermənistanın 29,8 min kvadratkilometrlik ərazi bütövlüyünə sadiqliyini təsdiqləyib. Bu o deməkdir ki, Paşinyan hakimiyyəti Azərbaycanın ən azı 86.6 min kvadratkilometr ərazisini tanımaqla Qarabağın Azərbaycan ərazisi olduğunu rəsmən və açıq şəkildə qəbul edib. Bir sözlə, bölgədə proseslər ölkəmizin müəyyən etdiyi prinsiplərə əsasən irəliləyir. Burada əsas hədəfin Cənubi Qafqazın sülh və əməkdaşlıq məkanına çevrilməsi olduğunu nəzərə alsaq, bu amil regionun inkişaf düsturunu təşkil edir.
Töhfə SƏMƏDOVA,
"Respublika".
