Konqo münbit torpağı və əlverişli iqlimi sayəsində əhəmiyyətli kənd təsərrüfatı potensialına malikdir. Burada qəhvə, kakao, palma yağı, kauçuk, həmçinin müxtəlif meyvə və tərəvəzlər daxil olmaqla geniş çeşiddə məhsul istehsal etmək mümkündür. Bununla belə, kənd təsərrüfatının məhsuldarlığına müasir əkinçilik texnikasına çıxışın məhdudluğu, daşınma və saxlama üçün qeyri-adekvat infrastrukturun olmaması və müəyyən ərazilərdə davam edən münaqişələr mənfi təsir göstərir.

"Bərpaolunan enerji sahəsində, energetika sahəsində, mədənçilik və digər sahələrdə əməkdaşlıq üçün çox gözəl perspektivlər var. Bu gün müzakirə aparıldı, müvafiq göstərişlər verildi və əminəm ki, gələcək aylar ərzində bizim nümayəndələrimiz bir-biri ilə sıx təmasda olacaqlar". Bu fikirləri Prezident İlham Əliyev Konqo Respublikasının Prezidenti Deni Sassu-Nqesso ilə mətbuata bəyanatında səsləndirib.

Ölkə başçısı qeyd edib ki, Azərbaycan Konqoda bir çox investisiya layihələrində iştirak etmək fikrindədir, ilk növbədə, kənd təsərrüfatı sahəsində. Öz növbəsində Sassu-Nqesso da ölkəsinin kənd təsərrüfatı sahəsində çox böyük potensiala malik olduğunu bildirib. O deyib ki, Konqo becərilən torpaqların bəlkə də yalnız 3 faizindən istifadə edir, bu isə o deməkdir ki, qalanları istifadəyə hazırdır. Azərbaycana üçgünlük rəsmi səfərə gəlmiş Sassu-Nqessonun Prezident İlham Əliyevlə apardığı danışıqlardan sonra "Azərbaycan Respublikası və Konqo Respublikası arasında əməkdaşlıq haqqında Bəyannamə", həmçinin Azərbaycan Dövlət Neft Şirkəti ilə Konqo Milli Neft Korporasiyası arasında müqavilə imzalanıb.

Prezident İlham Əliyevin iqtisadi əməkdaşlığın genişləndirilməsinə xüsusi önəm verməsi ikitərəfli əlaqələri dərinləşdirmək niyyətini göstərir. Azərbaycanın investisiya layihələrində iştirak etməkdə maraqlı olması ölkəmizin Konqonun iqtisadi potensialını dəstəklədiyini əks etdirir. Ölkə başçımız mətbuata birgə bəyanatla çıxışı zamanı qeyd edib ki, ölkələr arasında imzalanan Bəyannamə çox önəmli və sanballı bir sənəddir və bu sənəd əməkdaşlığın perspektivlərini müəyyən edəcək. Konqo ilə Azərbaycan arasında güclü dostluq əlaqələrinin yaradılacağını bildirən Prezident İlham Əliyev imzalanmış əməkdaşlıq haqqında Bəyannaməyə istinad edərək siyasi əlaqələrimizin də bundan sonra uğurla inkişaf edəcəyinə heç kimdə şübhə olmadığını deyib. 

Azərbaycan ilə Konqo arasında münasibətlər qarşılıqlı dəstək və müxtəlif sahələrdə inkişaf edən əməkdaşlığa söykənir. İki ölkə arasında əlaqələr beynəlxalq forum və ikitərəfli iqtisadi əməkdaşlıq çərçivəsində ortaq öhdəliklərə sadiqliyi, diplomatik əlaqələrin perspektivli trayektoriyasını ifadə edir. "Biz bundan sonra da beynəlxalq təşkilatlar çərçivəsində qarşılıqlı dəstək əsasında qarşılıqlı fəaliyyətimizi davam etdirəcəyik, xüsusilə BMT-də və Qoşulmama Hərəkatı çərçivəsində. Qoşulmama Hərəkatına bu ilin yanvar ayına qədər dörd il uğurla sədrlik etmiş Azərbaycan Konqonun dəstəyini hər zaman hiss edib. Bizim təşəbbüslərimizə Konqo hər zaman öz dəstəyini verib və bunun nəticəsində sədrliyimiz dövründə Qoşulmama Hərəkatının institusional inkişafı da təmin edilib", - deyə Prezident İlham Əliyev bildirib.

Azərbaycan-Konqo əlaqələrinin əsas sütunu onların beynəlxalq təşkilatlar, xüsusilə Birləşmiş Millətlər Təşkilatı (BMT) və Qoşulmama Hərəkatı çərçivəsində birgə səyləri zamanı formalaşıb. Azərbaycanın Qoşulmama Hərəkatına uğurlu sədrliyi Konqo tərəfindən davamlı dəstək qazanaraq iki ölkənin qarşılıqlı etimad və əməkdaşlığını göstərir. Bu dəstək və həmrəylik Qoşulmama Hərəkatının inkişafına töhfə verib, qlobal müstəvidə birgə təşəbbüslər, ortaq məqsədlər fonunda platformanı gücləndirib.

Azərbaycanın Qoşulmama Hərəkatı çərçivəsindəki uğurlu fəaliyyəti Konqo kimi bir çox ölkə ilə diplomatik münasibətlərin dərinləşməsində əsas amil olub. İki ölkə arasında artan əməkdaşlıq və sıx işbirliyi bunun göstəricisidir. Bu səfər həm də Azərbaycanın Qoşulmama Hərəkatının rəhbəri kimi beynəlxalq arenada uğurlu fəaliyyətinin təsdiqidir. Ölkəmizin mövcud potensialdan istifadə edərək dünya siyasətində aktiv rol oynamasını nümayiş etdirir. Bunun nəticəsi olaraq, respublikamız regional təşkilatlarda, beynəlxalq arenada uğurla təmsil olunub və tərəfdaşları tərəfindən dəstəklənib.

Prezident Deni Sassu-Nqesso bəyanatında bildirib ki, Konqo Azərbaycanın bu yaxınlarda digər qlobal mübarizə sahəsində - iqlim dəyişmələri sahəsində oynayacağı rolu alqışlayır, çünki Azərbaycan COP29-a ev sahibliyi edəcək: "Biz Azərbaycan rəsmilərini dəvət etdik ki, iqlim dəyişikliklərinə qarşı mübarizədə ölkəmizin yanında olsunlar. Biz Prezidentə Konqoda, Brazzavildə təşkil etdiyimiz dünyanın ən böyük üç tropik meşə hövzəsi - Amazoniya, Cənub-Şərqi Asiyada Borneo Mekonq və Konqo hövzəsi sammitində güddüyümüz məqsədlər barəsində məlumat verdik. Bu sammit ötən ilin oktyabrında keçirilib və biz Prezidentə yalnız bu sammitin uğuru barəsində məlumat verə bilərik. Ondan sammitin nəticələrini nəzərə almasını ancaq xahiş edə bilərik, çünki bu il Azərbaycan COP29-a ev sahibliyi edəcək", - deyə Konqo prezidenti bildirib.

Konqo çayı və onun qolları su elektrik enerjisi istehsalı üçün əhəmiyyətli potensial təklif edir. Konqo çayı üzərindəki İnqa bəndləri böyük həcmdə elektrik enerjisi istehsal etmək gücünə malikdir ki, bu da ölkənin daxili enerji ehtiyaclarını ödəməklə yanaşı, həm də regiondakı qonşu ölkələri potensial olaraq enerji ilə təmin edə bilər. Bu da Konqonun Azərbaycanla bərpaolunan enerji sahəsində əməkdaşlıq üçün imkanlarını artırır.

Konqo hövzəsinin ekoloji əhəmiyyətini nəzərə alaraq, regionun biomüxtəlifliyini və ekosistemi qoruyan iqtisadi inkişafı davam etdirmək vacibdir. Buraya meşələrin qırılmasını azaltmaq, məsuliyyətli mədənçilik təcrübələrini təşviq etmək və davamlı kənd təsərrüfatını dəstəkləmək üçün tədbirlərin həyata keçirilməsi daxildir. Ümumilikdə, Konqo böyük iqtisadi potensiala malik olsa da, bu potensialın reallaşdırılması əsas problemlərin həlli və davamlı inkişaf strategiyalarının təşviqi üçün birgə səylər tələb edir. Siyasi sabitlik, təkmilləşdirilmiş idarəetmə, infrastrukturun inkişafı və davamlı resursların idarə edilməsi Konqonun iqtisadi gələcəyini müəyyənləşdirmək üçün əsas amillər olacaq.

SSRİ dövründən etibarən Azərbaycan, Afrika ölkələrinə olan yaxın münasibəti ilə tanınır. Bir çox Afrika ölkəsindən gələn tələbələr Azərbaycanın ali təhsil müəssisələrində təhsil alıb. Bu, insanlar arasında mübadilənin bir nümunəsidir və münasibətlərin inkişafını təmin edir. Azərbaycanın pandemiya dövründə Afrika ölkələrinə dəstək göstərməsi ikitərəfli münasibətlərin sürətlə inkişaf etdirilməsində vacib rol oynamışdır. Bu yardımlar, Azərbaycanın regional məsələlərə olan diqqətini və qlobal sahədə humanitar yardım fəaliyyətlərinin artmasını sübut edir.

Konqo ilə Azərbaycan arasındakı əlaqələrin, münasibətlərin daha da inkişaf etdirilməsi üçün böyük imkanlar var. Bu, iki ölkə arasında daha sıx əməkdaşlıq və işbirliyi üçün yeni imkanların açılmasını təmin edəcək və həm Konqo, həm də Azərbaycanın regionlararası və beynəlxalq arenadakı rolunu və nüfuzunu artıracaq.

Nurcan SÜLEYMANOVA,

"Respublika".