Sentyabrın 18-də 2022-ci il üçün "İlin peşəkar gənci" adına layiq görülmüş gənclərə diplom, döş nişanı və vəsiqələrin təqdim edilməsi mərasimi keçirilib. Tədbirdə Azərbaycan Həmkarlar İttifaqları Konfederasiyasının (AHİK) rəhbərliyi və kollektivi, üzv təşkilatların sədrləri və məsul əməkdaşları, həmçinin KİV nümayəndələri iştirak ediblər.
"İlin peşəkar gənci" adına layiq görülmüş gəncləri təbrik edən AHİK sədri, Milli Məclisin deputatı Səttar Möhbalıyev dövlətimizin gənclər siyasətindən danışıb, ölkəmizdə gənclərin inkişafı üçün yaradılmış şəraitdən bəhs edib. Millət vəkili ulu öndər Heydər Əliyevin gənclərə xüsusi diqqət yetirdiyini, onların sağlam mühitdə böyüməsi və tərbiyə alması, müasir elmi biliklərə yiyələnməsi, peşəkar kadr kimi yetişməsi üçün dövlət səviyyəsində hərtərəfli şərait yaradıldığını bildirib.
Qeyd edib ki, Ulu Öndərin əsasını qoyduğu gənclər siyasəti dövlətimizin başçısı cənab İlham Əliyev tərəfindən uğurla davam etdirilir. Gənclərin rifahına xidmət edən Dövlət proqramlarının icrası gənclərin potensialının inkişafına, məşğulluğunun təmin olunmasına mühüm töhfələr verib. Dövlət quruculuğu prosesində və ölkənin ictimai-siyasi həyatında gənclərin fəaliyyəti təmin olunur, onların yaradıcı potensialı, bilik və bacarığı yüksək qiymətləndirilir. Vətən müharibəsində Müzəffər Ali Baş Komandanın ətrafında dəmir yumruq kimi birləşən gənclərimiz böyük birlik nümayiş etdirdilər və Vətənin müdafiəsinə qalxdılar. Məhz onların vətənpərvərlik hissi, yüksək döyüş ruhu ilə 30 ilə yaxın işğal altında olan torpaqlarımız 44 günə azad edildi.
AHİK sədri vurğulayıb ki, həmkarlar ittifaqları dövlətimizin gənclər siyasətinə fəal dəstək verir: "İttifaqımızın 22,2 faizini 29 yaşadək gənclər təşkil edir. AHİK müxtəlif vaxtlarda "Gənclər siyasəti konsepsiyası", "Azərbaycan həmkarlar ittifaqlarının gənclər siyasətinin həyata keçirilməsi", "Azərbaycan həmkarlar ittifaqlarının gənclər siyasəti üzrə fəaliyyətinin əsas istiqamətləri" və digər qərar və sənədlər qəbul edərək həyata keçirib. Hər il yay aylarında həmkarlar ittifaqlarının gənc liderlərinin forumları keçirilir, maarifləndirmə kursları təşkil olunur. Əlaçı tələbələr üçün təqaüdlər təsis edilir. İndiyədək 3000 nəfərə qədər gənc bu təqaüdə layiq görülüb".
Tədbirin sonunda 2022-ci ilin nəticələrinə görə "İlin peşəkar gənci" fəxri adına layiq görülmüş 64 nəfər istedadlı gəncə AHİK-in fəxri diplomu, döş nişanı və vəsiqəsi təqdim edilib. Onların 42 nəfəri kişi, 22 nəfəri isə qadındır və ən azı 3 il və daha çox əmək stajına sahibdirlər. Həmin gənclərin arasında 44 günlük Vətən müharibəsində qəhrəmanlıqlar göstərərək orden və medallarla təltif edilmiş qazi və veteranlar da var.
Qeyd edək ki, gənc nəslin müxtəlif sənət növlərinə, peşə sahələrinə və əmək fəaliyyətinə marağının artırılması, bacarıqlarının respublikamızın sosial-iqtisadi inkişafına yönəldilməsi və həmkarlar ittifaqı üzvlüyünə motivasiyasının gücləndirilməsi məqsədilə AHİK tərəfindən 2015-ci ildə "İlin peşəkar gənci" fəxri adı təsis edilib. İndiyədək 27 sahə həmkarlar ittifaqı təşkilatından 400 nəfərə yaxın gənc əməkdə, təhsildə və ictimai fəaliyyətdə xüsusi nailiyyətlər əldə edərək bu fəxri ada layiq görülüb.
"Respublika".
