İşlər başa çatdıqdan sonra ətraf rayonlarda 150 min hektar əkin sahələrini suvarmaq mümkün olacaq
Suvarma mövsümü yaxınlaşdıqca ölkədəki meliorasiya, irriqasiya, suvarma obyektləri bir daha nəzərdən keçirilir, ehtiyac varsa, təmir edilir. Azərbaycan Meliorasiya və Su Təsərrüfatı Açıq Səhmdar Cəmiyyəti bildirir ki, 1958-ci ildə istismara verilən Yuxarı Şirvan Kanalı respublikanın ikinci ən böyük magistral suvarma kanalıdır. 1961-ci ildə kanalın ikinci hissəsi də istismara verilib. Uzunluğu 122 kilometr olan kanalın maksimum su sərfi saniyədə 78 kubmetrdir. Mənbəyini Mingəçevir Su Anbarından götürən kanal Kür çayının sol sahilindən keçir. Kanalın istismara verilməsi Şirvan düzündə öz axını ilə suvarılan sahələrin su ilə təmin olunmasına şərait yaradır. Kanaldan su ilə təmin olunan Yevlax, Ağdaş, Göyçay, Ucar, Kürdəmir, Ağsu, Zərdab, İsmayıllı, Hacıqabul və Şamaxı rayonlarının 150 min hektar torpaq sahələri suvarma suyu ilə təmin edilir. Kanalın istismarını həyata keçirən Yuxarı Şirvan Kanalı İstismarı İdarəsi tərəfindən hər il olduğu kimi, bu il də təmir-bərpa işləri aparılır. Hazırda görülən işlər sel sularının ötürülməsinə xidmət edir.
Yuxarı Şirvan Kanalı İstismarı İdarəsi tərəfindən bu ilin əvvəlindən etibarən torpaq məcrada 25 min kubmetr lildən təmizləmə işləri, çay məcralarında isə 30 min kubmetrə yaxın tənzimləmə işləri aparılıb. İdarənin balansında olan 52 ədəd selötürücü və 36 ədəd suburaxıcının giriş və çıxış hissələrində əl ilə lildən təmizləmə işləri yerinə yetirilib. Hərəkəti boyu səkkiz çay üzərindən keçən kanalın hazırda Türyançayla kəsişməsində növbəti işlər həyata keçirilir. Belə ki, idarənin texnikaları vasitəsilə kanalın Ağdaş rayonu ərazisindən keçən hissəsində, torpaq bəndlərdə mühafizə tədbirləri aparılır.
Qeyd edək ki, Yuxarı Şirvan Kanalının üzərində Əliciançay, Türyançay, Göyçay, Girdimançay, Ağsuçay, Dəvəbətançay və Nəzriçayla kəsişdiyi yerlərdə mürəkkəb konsturuksiyalı 6 ədəd dükerlər və 2 ədəd akveduk tikilib. Ümumiyyətlə, kanal üzərində sadə və mürəkkəb konstruksiyalı 129 ədəd qurğu tikilib. Hazırda kanala saniyədə 62 kubmetr su götürülür və limit əsasında yuxarıda adıçəkilən rayonların suvarma sistemləri idarələrinə çatdırılır.
Nəriman CAVADOV,
“Respublika”.