44 günlük Vətən müharibəsində Azərbaycan öz əzəli və əbədi torpaqlarını geri qaytardı. İki ildir ki, xalqımız müharibənin yaralarını sağaltmağa, 30 illik işğalın nəticələrini aradan qaldırmağa çalışır. Azərbaycan xalqı son bir əsrdə hərbi və diplomatik sahədə ən böyük zəfərə nail olub.
Öz doğma torpaqlarından köçkün düşən insanların Böyük Qayıdışı onların işğaldan azad edilmiş ərazilərdə dayanıqlı məskunlaşmasında və bu ərazilərin ölkənin iqtisadi fəaliyyətinə qoşulmasında mühüm vasitə olacaq. Həm qələbəmizin siyasi cəhətdən möhkəmləndirilməsi, həm də işğaldan azad edilmiş ərazilərdə bərpa işlərinin aparılması müvəffəqiyyətlə davam etdirilir. Qarabağda aparılan quruculuq işləri ölkəmizin həyatına çoxsaylı yeniliklər gətirəcək. Azərbaycan Respublikasının Prezidenti İlham Əliyevin 4 yanvar 2021-ci il tarixli Fərmanı ilə işğaldan azad edilmiş ərazilərdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması, habelə təhlükəsiz yaşayışın, səmərəli fəaliyyətin və rifahın davamlı artmasının dəstəklənməsi məqsədilə Qarabağ Dirçəliş Fondu yaradılıb. Bu fond Azərbaycan Respublikasının işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə maliyyə dəstəyi göstərilməsini və sərmayələrin cəlb edilməsini, bu sahədə dövlət-özəl tərəfdaşlığın inkişafını təmin edən, eləcə də ölkə daxilində və xaricində zəruri təşviqat işlərini həyata keçirən publik hüquqi şəxsdir.
30 illik həsrətdən sonra Qarabağ və Şərqi Zəngəzurda bərpa-quruculuq işlərinə başlamaq üçün ilk növbədə yol infrastrukturu lazım idi. Füzulidən Şuşaya çəkilən ilk yol uğurlu start götürdü. Bundan sonra qısa zaman kəsiyində Tuğ-Hadrut, Hadrut-Cəbrayıl-Şükürbəyli, Füzuli-Hadrut yollarında tikinti işləri də davam etdirildi. Avtomobil yolu Hadrut qəsəbəsi və Cəbrayıl şəhəri də daxil olmaqla, sözügedən rayonların 20-yə yaxın yaşayış məntəqəsini əhatə edəcək. Hazırda Zəngilandan Qubadlı və Laçına dördzolaqlı yol çəkilir. Yol infrastrukturu uğurla davam etdirilərkən, bununla yanaşı "Qarabağın hava qapısı" adlandırılan Füzuli və Zəngilan Beynəlxalq Hava limanları açıldı. Həmçinin işğaldan azad edilən ərazilərimizdə su, qaz və elektrik enerjisinin təminatı da görülən əhəmiyyətli işlər sırasındadır. Qeyd etmək lazımdır ki, bütün bunlar 2022-ci ilin göstəriciləridir. Dövlət Proqramının qarşıdakı illər üçün icrasında bu istiqamətdə sistemli işlər görüləcək.
Bölgə üçün digər strateji istiqamət iqtisadiyyatın yenidən qurulmasıdır. Torpaq sahələrinin kənd təsərrüfatı dövriyyəsinə cəlb olunması, əkilib-becərilməsi, heyvandarlıq təsərrüfatlarının bərpa olunması üçüncü hədəfdir. 4-cü istiqamət rayonların turizm potensialının artırılması ilə bağlıdır. Bölgələrin əlverişli təbiətinin, coğrafiyasının turizm sektoru üçün münasibliyi və bu baxımdan doğru qiymətləndirilməsi mühüm əhəmiyyət kəsb edir. Turizm potensialı ərazinin inkişafına, əhalinin məşğulluğuna mühüm fayda verəcək. Təhsil, səhiyyə və sosial xidmətlərin qurulması isə beşinci hədəfdir. Postmüharibə dövrünün statistikasına nəzər salsaq görərik ki, ilkin addımlar heç də məhdud deyil. Ağdamda 140 illik tarixi olan Ağdam şəhər 1 saylı məktəbin yeni binasının, Füzulidə Peşə Liseyinin təməli qoyulub. Bununla yanaşı, Zəngilan şəhərinin mərkəzində 960 şagird üçün nəzərdə tutulan məktəbin, Füzulidə 180 çarpayılıq xəstəxananın və s. təhsil, səhiyyə obyektlərinin bünövrəsi atılıb. Onu da qeyd etmək lazımdır ki, sakinlərin yaşayışı üçün rahat şəraiti olan çoxmənzilli binaların inşası da aparılır. Ağdamda inşa olunacaq ilk yaşayış binası, Füzulidə çoxmənzilli yaşayış məhəlləsi, Zəngilanda 6 ikimərtəbəli, 4 üçmərtəbəli binaların tikintisinə start verilib. Bakıda və digər iri şəhərlərdə qurulan əlverişli xidmət sektoru - ASAN xidmət və "DOST" mərkəzlərinin işğaldan azad edilən ərazilərdə də yaradılması Dövlət Proqramında öz əksini tapıb. Bu, məskunlaşacaq əhalinin sosial xidmətlərə çıxışını asanlaşdırmaq məqsədi daşıyır.
Qeyd etmək zəruridir ki, bu ilin yay aylarında 700-dən çox ailənin Laçına köçürülməsi planlaşdırılır. Zabux və Sus kəndlərində artıq bu istiqamətdə işlər görülür. Bir daha aydın olur ki, əbədi, əzəli, tarixi Azərbaycan torpağı olan Qarabağ və Şərqi Zəngəzur epoxal inkişaf edir.
Nuranə DAXİLQIZI,
"Respublika".
