Məğlub edilmiş, Qarabağdakı bütün dayaqları sarsıdılmış, gündə bir havaya oynayan Ermənistan iqtidarının müstəqil qərar qəbul etməyə ixtiyarı çatmır, bir neçə iri şəhərdən gələn təlimatlar əsasında erməni xalqını yola verir, siyasi ikiüzlülük və oyunbazlıq edir, danışıqlar masasında bir, arxada isə başqa mövqe nümayiş etdirir. Görünən budur. Uzun illərdir ki, yalan, böhtan, iftira, hoqqabazlıq Ermənistan iqtidarında və cəmiyyətində çox dərin kök salıb, onlarda sağlam düşüncə qıtlığı hökm sürür, sülhə, anlaşmaya, qonşuluğa, əməkdaşlığa arxa çevirən, "ağa"larının diktəsi ilə suyu bulandıran, sərhəddə təxribat törədən ermənilər gələcəyə nikbin baxa bilmirlər.
İki il yarım bundan əvvəl torpaqlarımızda təxribatlar törədən, əraziləri minalayan, işğal altındakı yurd yerlərini xarabalığa çevirən ermənilərin puç olmuş xəyalları daşa dəyəndən sonra əllərindəki silahların səsi artıq Ermənistan ərazisindən gəlir. Və bu silahların səsi qəhrəman ordu bölmələrimizin peşəkarlığı və qətiyyəti sayəsində Ermənistanın lap içərisində boğula bilər. Nəhayət erməni toplumu anlamalıdır ki, rəsmi Bakının müstəqil siyasəti və iradəsi əksinə gedə bilməyəcəklər, hazırda əllərində olanları da itirə bilərlər. Ermənistanın baş naziri N.Paşinyanın havadarlarından aldığı ev tapşırığının sədası sərhəddən eşidildi. Silahlı qüvvələrimizin mövqelərini artilleriya atəşinə tutaraq təxribat törədən erməni hərbçilərinin hücum cəhdlərinin qarşısı qətiyyətlə alınıb, düşmən itki verərək geri çəkilib. Mayın 10-da axşam saatlarında Ermənistan silahlı qüvvələrinin bölmələri Basarkeçər rayonunun Zod istiqamətindəki mövqelərindən ordumuzun üzbəüz mövqelərini müxtəlif növ atıcı silahlardan intensiv atəşə tutması nəticəsində Azərbaycan Ordusunun hərbi qulluqçuları - Novruzəlizadə Orxan Elxan oğlu həlak olub, Mahmudlu Müslüm Vidadi oğlu ağır yaralanıb. Düşmən tərəfi 4 hərbçisinin yaralandığını bildirib. Regionda sülh quruculuğu prosesində maraqlı olmayan, öz işğalçı siyasətini davam etdirən, insan hüquqlarını kobud şəkildə pozan Ermənistanın hərbi təxribatı Avropa İttifaqı və digər dövlətlər tərəfindən kəskin pislənməli və təxribatçı cəzalandırılmalıdır. Çünki Ermənistan məqsədli şəkildə regionda vəziyyəti gərginləşdirir, beynəlxalq hüququn və beynəlxalq humanitar hüququn norma və prinsiplərini kobud şəkildə pozur, yeni münaqişə ocaqlarının yaranması üçün təxribatlar törədir.
Qədim tarixi olan Basarkeçər və digər yaşayış məntəqələri, hadisənin baş verdiyi Zod kəndi də tarixi Azərbaycan torpağıdır. Ermənilər tərəfindən kəndin adı bir neçə dəfə dəyişdirilsə də, burada həmişə azərbaycanlılar yaşayıb. XIX əsrin əvvəllərində İrəvan xanlığı Rusiya tərəfindən tamam işğal ediləndən sonra xanlığın ərazisi Ermənistan vilayəti adlandırılıb və bu yerlər tamam erməniləşdirilib. Lakin rusların köçürülmə, ermənilərin soyqırımı siyasəti nə qədər geniş vüsət alsa da, azərbaycanlılar bu ərazilərdə ötən əsrin 80-ci illərinəcən yaşayıblar. Axar-baxarlı, gözəl təbiətə və zəngin təbii sərvətə malik Zod kəndində vaxtilə 3 min nəfərə yaxın azərbaycanlı yaşayıb və kənd 1987-ci ildə ermənilər tərəfindən tamamilə dağıdılıb. Zod həm də özünün qızıl mədənləri ilə məşhurdur. Həmin mədənlərin əsas hissəsi Kəlbəcər rayonunun ərazisinə düşür. Kəlbəcərlə Göyçəni birləşdirən magistral yol da Zod aşırımından keçir. Onu demək istəyirəm ki, indi ermənilərin bizim mövqelərə atəş açdıqları Zod kəndi, Basarkeçər, Göyçə, bir sözlə, Ermənistan adlanan ərazilər tarixi, əzəli Azərbaycan torpaqlarıdır. Nə qədər həyasız olmalısan ki, başqasının torpağında yaşayasan və həmin millətə güllə atasan, ona qarşı deportasiya, soyqırımı törədəsən, bu, yalnız erməni xisləti, erməni eybəcərliyidir.
Silahlı qüvvələrimizin Qalib Ali Baş Komandanı İlham Əliyevin adı torpaqları işğaldan xilas edən, ərazi bütövlüyünü bərpa edən dövlət başçısı kimi tarixin səhifələrinə həkk edilib. Yaxşı deyiblər ki, tarix ən yaxşı bələdçidir, onun məhvərini heç bir qüvvə dəyişə bilməz. Tarixin ibrət dərsləri isə müharibəyə və işğala cəhd edən dövlətləri həmişə ağır məğlubiyyət, məhrumiyyət, faciələr və insan qırğınları ilə üz-üzə qoyub. İki ilə yaxındır ki, Ermənistan bu ağrıları yaşamağa məcburdur, işğalçı xisləti minlərlə ailəni faciələrə, göz yaşlarına, kədərə qərq edir. Qədim şəhərimiz İrəvanın küçələrində demək olar ki, hər gün etiraz mitinqləri keçirilir, sadə ermənilər Paşinyan iqtidarından itkin düşən və nəşi tapılmayan övladlarını tələb edir, erməni polisi isə adamları küçələrdə sürüyür, döyür, təzyiq göstərir. Qərbin gözündə budurmu erməni demokratiyası?! Gözlənilən odur ki, daxili gərginliyi azaltmağa və aldığı tapşırıqları icra etməyə cəhd edən Ermənistanı və erməniləri çox ciddi fəlakət gözləyir. Çünki Azərbaycan öz övladlarının qisasını alır və alacaqdır. Müdafiə Nazirliyinin son məlumatları xalqımızda narahatlıq doğurur, düşmən ölkənin təxribatları səbrimizi daşırır. Açıq-aşkar Ermənistan üçtərəfli Bəyanatın müddəalarına əməl etməkdən boyun qaçırır, sülh sazişini imzalamaqdan hər vasitə ilə yayınır, verdiyi sözə əməl etmir, əksinə erməni tərəfi sərhəddə alçaq təxribatlara əl atır. Son günlər Azərbaycan Müdafiə Nazirliyinin yaydığı məlumatlar onu göstərir ki, düşmənin öz mənfur və çirkin əməllərindən əl çəkmək fikri yoxdur. Məlumatda bildirilir ki, ötən sutka ərzində Ermənistan silahlı qüvvələri tərəfindən digər istiqamətlərdə yerləşən mövqelərimiz ümumilikdə 17 dəfə atəşə tutulub. Ermənistan silahlı qüvvələrinin Tovuzqala rayonunun Güləli, Basarkeçər rayonunun Əzizli və Qarakilsə rayonunun Saybalı yaşayış məntəqələri istiqamətlərində yerləşən mövqelərindən Ordumuzun Tovuz rayonunun Qoşa, Kəlbəcər rayonunun Yellicə və Laçın rayonunun Minkənd yaşayış məntəqələri istiqamətlərində yerləşən mövqeləri minaatanlardan və müxtəlif çaplı atıcı silahlardan fasilələrlə 8 dəfə atəşə tutulub. Bundan başqa, Rusiya sülhməramlı qüvvələrinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Tərtər, Xocalı, Şuşa və Laçın rayonları istiqamətlərində yerləşən mövqeləri müxtəlif çaplı atıcı silahlardan fasilələrlə 9 dəfə atəşə tutulub. Ordumuzun şəxsi heyəti və texnikasında itki yoxdur. Bütün istiqamətlərdə bölmələrimiz tərəfindən adekvat cavab tədbirləri görülüb, əməliyyat şəraiti nəzarət altındadır.
Rəsmi Bakı öz ərazisində qanunsuz erməni silahlı dəstələrinin təxribat törətməsinə imkan verməyəcəyini dəfələrlə bəyan edib. Yəqin ki, Xankəndidə və ətraf ərazilərdə keçiriləcək antiteror əməliyyatları torpaqlarımızda qanunsuz yaşayan erməni terrorçularının cinayətlərinə son qoyacaq, bu qədim yurd yerlərimizdə sabitlik, əmin-amanlıq yaradılacaq.
Salman ALIOĞLU,
"Respublika".
