Qax rayonunun Turaclı kəndi doğma torpaqlarından didərgin düşən soydaşlarımızın yeni yaşayış məskəni kimi tanınır. Çünki ata-baba yurdu olan Qərbi Azərbaycan torpaqlarından didərgin salınan qardaş-bacılarımızın bir hissəsi xeyli müddətdir ki, bu kənddə yaşayaraq təsərrüfatla geniş məşğul olurlar. Normal yaşayış üçün hərtərəfli şəraitlərinin olmasına baxmayaraq, torpaq həsrəti ilə yaşayırlar. Məhz bu səbəbdən də Prezident İlham Əliyevin ötən il dekabrın 24-də doğum günündə Qərbi Azərbaycan İcması ilə görüşündə səsləndirdiyi dəyərli fikirlər yurd həsrəti ilə yaşayan bütün insanlar kimi, kənd sakinlərinin də ürəyinə məlhəm olub. Dövlət başçısının dünyaya ismarışını ikinci həyat kimi dəyərləndirən sakinlər tezliklə əzəli torpaqları olan yurdlarına qayıdacaqları anı səbirsizliklə gözləyirlər. Həmsöhbət olduğum sakinlər bu fikirlərini sevinc hissi ilə ifadə etdilər.
Nəcəf Mirzəyev:
- 1963-cü ildə Dərələyəz mahalında anadan olmuşam. Didərgin düşdüyümüz vaxt indi də yadımdadı. Soyuq hava idi, ermənilərin işğalı nəticəsində yurdumuzu tərk etməyə məcbur olduq. Olmazın müsibətlərlə qarşılaşsaq da, yurdumuzu bir an belə unutmurduq. Rəhmətlik İsaq dayım həmişə deyirdi ki, narahat olmayın, zaman yetişəcək, yurdumuza qayıdacağıq. Möhtərəm Prezidentimizin rəhbərliyi ilə İkinci Qarabağ müharibəsində qazandığımız Zəfər qələbəsi bizi xeyli sevindirdi. Bundan sonra Qərbi Azərbaycan ərazisində olan torpaqlarımızın da tezliklə azad ediləcəyinə olan əminliyimiz çox yüksəldi. Cənab Prezidentimizin yeritdiyi siyasət, həyata keçirdiyi məqsədyönlü işlər və icmamızın üzvləri ilə görüşündə dediyi sözlər bizləri sonsuz dərəcədə sevindirdi, yurdumuza qayıdacağımıza əminliyimizi artırdı. Artıq indi biz ailədə və yaxınlarla bu barədə mütəmadi söhbət edir, qayıdış üçün planlarımızı müəyyənləşdiririk.
Nəzifə Cabbarova:
- Qərbi Azərbaycanın Arazdəyən mahalında yaşayırdıq. Zaman-zaman ermənilərin düşmən münasibətinin şahidi olurduq. Normal yaşamağımıza imkan vermirdilər, məqam düşən kimi azərbaycanlıları sıxışdırırdılar. Körpə uşaqlarımla birlikdə qışın şərt vaxtı torpaqlarımızdan didərgin düşdük, sağlamlığımızı və bütün təsərrüfatımızı itirdik. Dünyasını dəyişən valideynlərimiz və əzizlərimiz də son ana qədər bu anın reallaşacağını vurğulayırdılar. Şükürlər olsun bu günümüzə, respublika Prezidentinin Qərbi Azərbaycan İcması ilə görüşündə səsləndirdiyi fikirlər arzularımızı çin etdi. Biz tam əminik ki, əzəli torpaqlarımıza qayıdacağımıza lap az qalıb. Sevinirəm ki, bizdə olan bu əminlik tezliklə reallaşacaq və yurdumuza qayıdaraq o yerlərin havasını udacaq, suyunu içəcək və əvəzsiz nemətlərindən bəhrələnəcəyik.
Əlisahib Mirzəyev:
- Qərbi Azərbaycanın Dərələyəz mahalında yaşayırdıq. Valideynlərimizin taleyinə iki dəfə didərginlik ömrü yaşamaq qismət olub. 1948-ci ildən 1953-cü ilə qədər Salyan rayonunda məskunlaşıblar. Ancaq dağdan arana gələn insanların çoxu iqlim dəyişikliyi ilə əlaqədar qısa zamanda dünyasını dəyişib. Təsərrüfatları məhv olub. Yaşamaq üçün yurdlarına qayıtsalar da yenidən didərgin düşüblər. Çünki insanlığa qənim kəsilən erməni silahlı qüvvələri azərbaycanlıların doğma torpaqları olan bu ərazilərdə yaşamalarına imkan verməyiblər. Növbəti dəfə isə böyüklərimiz Qax rayonunda məskən salmaq qərarına gəliblər. Ulu öndər Heydər Əliyevin siyasəti və yüksək qayğısı sayəsində yaşamaq üçün özümüzə və yaxınlarımıza normal şərait yarada bilmişik. Bu gün isə Prezident İlham Əliyevin rəhbərliyi sayəsində doğma ocaqlarımıza qayıdış anını səbirsizliklə gözləyirik.
Hamımızın böyük təsərrüfatı var. Amma torpaqlarımızdan ötrü burnumuzun ucu göynəyir. Yurdumuza qayıtmaq, dədə-babalarımızın məzarını ziyarət etmək, ruhlarını şad etmək, bulaqlarımızdan doyunca su içmək arzusundayıq.
Prezidentin Qərbi Azərbaycan İcması ilə görüşünü hamımız sevinc hissilə qarşıladıq. Çünki qüdrətli rəhbərimizin olduğuna görə çox xoşbəxtik. Prezidentimiz ulu öndərimizin ideyalarına uyğun olaraq torpaqlarımızı azad edərək qürurumuzu yüksəldib. Yurdumuza qayıdış isə haqqımızdır. Bunu dünya ictimaiyyəti də bilməlidir.
M.NƏRİMANOĞLU,
"Respublika".