GƏNCƏ
Baharın gəlişini tərənnüm edən, birlik, bərabərlik və qardaşlıq bayramı olan Novruz Nizami yurdunda böyük coşqu və təntənə ilə qeyd olunub.
Gəncə Şəhər İcra Hakimiyyətinin təşkilatçılığı, Gəncə-Daşkəsən Regional Gənclər və İdman, Mədəniyyət və Təhsil idarələrinin dəstəyi ilə Heydər Əliyev adına Meydanında "Xarıbülbül ətirli Bahar Bayramı" adlı ümumşəhər tədbiri keçirilib. Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Gürcüstanın Gəncədəki Baş konsulu Nikoloz İaşvili, hüquq-mühafizə orqanlarının, eyni zamanda idarə, müəssisə və təşkilatların rəhbərləri, bələdiyyə sədrləri, ictimaiyyət nümayəndələri və şəhər sakinləri iştirak ediblər. Əvvəlcə qonaqları elimizin qədim adəti ilə əllərində şərbət olan milli geyimli qızlar qarşılayıblar. Sonra tədbir iştirakçıları "Gəncəsənət" - incəsənət, sənətkarlıq və yaradıcılıq sərgisinə baxış keçiriblər. Ümumşəhər tədbirində, körpələr evi-uşaq bağçaları kollektivlərinin, Gəncə pəhləvanları, həmçinin idmançıların güləş, taekvando, bədii gimnastika və şahmat üzrə nümunəvi çıxışları izlənilib. Gəncə Uşaq Evinin, Gəncə Şəhər Uşaq İncəsənət Məktəbinin "Xəmsə" nağaraçalanlar ansamblının çıxışları, həmçinin "Aşıq deyişmələri" maraqla qarşılanıb.
Hazırlanan "Novruz süfrəsi"ndə bayram təamları və atributları nümayiş olunub.
Gəncə Dövlət Dram Teatrı kollektivinin Üzeyir Hacıbəylinin "O olmasın, bu olsun" operettasının motivləri əsasında hazırladığı "Bazar meydanı" tamaşası, hər kəsin ovqatına xoş təsir bağışlayıb. Gəncə Dövlət Kukla Teatrının nəhəng kuklalarının, həmçinin Novruzun əvəzolunmaz atributları olan Keçəl və Kosanın maraqlı çıxışları izlənilib. Konsert proqramında Gəncə Dövlət Filarmoniyası solistlərinin milli ruhda təqdim etdikləri mahnılar və "Xəmsə" mahnı və rəqs ansamblı alqışlarla qarşılanıb.
Zabit XƏLİLOV,
"Respublika".
LERİK
Novruz bayramı ərəfəsində Lerik Rayon İcra Hakimiyyətinin təşəbbüsü ilə şəhər mərkəzində bayram yarmarkası təşkil olunmuşdur. Yarmarkaya əsasən ət və süd məhsulları, balıq, quş əti, yumurta, meyvə-tərəvəz, bayram çərəzləri çıxarılmışdır.
Rayon icra hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri Habil Məlikovun məlumatına görə, əziz bayramla əlaqədar əhalinin ərzaq və kənd təsərrüfatı məhsulları ilə təmin olunması və süni qiymət artımının qarşısının alınması məqsədilə Lerik şəhərində yarmarka fəaliyyət göstərir.
***
Birlik, bərabərlik, həmrəylik, qardaşlıq bayramı olan Novruz rayonda yüksək əhvali-ruhiyyə və təmtəraqla qeyd olundu. Bayramsayağı bəzədilmiş şəhərin mərkəzi meydanında keçirilən Novruz şənliyində Lerik Rayon İcra Hakimiyyətinin nümayəndələri, şəhid ailələrinin üzvləri, qazilər, Bakıdan və respublikamızın digər bölgələrindən gələn qonaqlar, rayon ictimaiyyətinin nümayəndələri, şəhər sakinləri iştirak edirdi.
Vətən Müharibəsi Qəhrəmanı, şəhid Amid Heydərovun atası Rəbbil Heydərov və ağsaqqal ziyalı Hidayət Bəşirov bayram tonqalını alovlandırdı.
Lerik Rayon İcra Hakimiyyətinin başçısı Əkbər Abbasov milli birlik və həmrəylik rəmzi olan Novruz bayramı münasibətilə rayon sakinlərini və qonaqları təbrik edərək hər bir ailəyə bol ruzi, xoşbəxtlik və səadət arzuladı.
Meydanda milli mətbəximizin dadlı-ləzzətli təamları, müxtəlif növ şirniyyatlar nümayiş olundu. Novruzun atributları olan Bahar qız, Kosa və Keçəlin şən zarafatları, ifa etdikləri rəqslər, səhnəciklər, gənc idmançıların bir-birindən maraqlı çıxışları alqışlarla qarşılandı.
Görkəmli muğam ifaçısı, respublikanın Xalq artisti Mələkxanım Əyyubova, Əməkdar artist İlkin Əhmədov, istedadlı sənətçilərdən Mirələm Mirələmov, Aysel Əlizadə, Valid Abdullayev, Aynur Dadaşova və Fatimə Fətəliyevanın təqdim etdikləri rəngarəng konsert proqramı hamıya xoş ovqat, bayram sevincləri bəxş etdi.
Əlisəfa HƏSƏNOV,
"Respublika".
