Dünyadakı iqlim dəyişikliyi, quraqlıq və şirin su çatışmazlığı Azərbaycan iqtisadiyyatına da təsirsiz ötüşmür. Suvarma mövsümü zamanı əkin sahələrini normal su ilə təmin etmək problemə çevrilir. Vəziyyətdən çıxış yolu əlavə su anbarları, dəryaçalar tikməkdir ki, qışda, erkən yazda oraya su toplamaq mümkün olsun. Ehtiyat su mənbələri qar, yağış, selsuları hesabına doldurulur və bütün yay mövsümü əkin sahələrinin suvarılması məqsədilə istifadə olunur.
Meliorasiya və Su Təsərrüfatı Açıq Səhmdar Cəmiyyəti noyabrın 24-nə olan məlumatda bildirir ki, Yengicə Su Anbarının tikintisinə həsr olunan imzalanma mərasimində ASC sədri Zaur Mikayılov, sədr müavini Rafiq Aslanov, sədrin müşaviri Əsəd Şirinov və cəmiyyətin digər nümayəndələri iştirak ediblər.
Bu münasibətlə keçirilən tədbirdə çıxış edən Azərbaycan Meliorasiya və Su Təsərrüfatı ASC-nin sədri Zaur Mikayılov Yengicə Su Anbarının tikintisinin əhəmiyyətindən danışıb, yeni su anbarının Qəbələ rayonunda kənd təsərrüfatının, turizmin, ümumiyyətlə, rayon iqtisadiyyatının inkişafına böyük təkan verəcəyini bildirib.
Müzəffər Ali Baş Komandan İlham Əliyevin rəhbərliyi ilə İkinci Qarabağ müharibəsində qazanılan şanlı Qələbədən də danışan Z.Mikayılov Azərbaycan dövlətinin azad olunan ərazilərdə böyük quruculuq, tikinti-bərpa işləri apardığını diqqətə çatdırıb və bu işlərdə Türkiyə şirkətlərinin mühüm rol oynadığını vurğulayıb.
“SURYAPI AZ” MMC-nin direktoru Cem Hakan Elmas çıxış edərək, Vətən müharibəsində qazanılan Qələbə münasibətilə bir daha təbriklərini çatdırıb və bu gün Qarabağda, Şərqi Zəngəzurda aparılan genişmiqyaslı quruculuq işlərinin onda yüksək təəssürat doğurduğunu deyib.
Cem Hakan Elmas YengicəSu Anbarının tikintisinin uğurla həyata keçiriləcəyinə və əməkdaşlığın bundan sonra da davam edəcəyinə əminliyini bildirib. Sonra Yengicə Su Anbarının tikintisi ilə bağlı müqavilə imzalanıb.
Qeyd edək ki, Azərbaycan Respublikası Prezidentinin “Su ehtiyatlarından səmərəli istifadənin təmin edilməsiilə bağlı əlavə tədbirlər haqqında” 2020-ci il 27 iyul tarixli Sərəncamı ilə təsdiq edilmiş Tədbirlər Planına Əlavə 2-də Yengicə Su Anbarının tikintisi də nəzərdə tutulub.
Yengicə Su Anbarının tikinti işləri ilə bağlı “Dövlət satınalmaları haqqında" Azərbaycan Respublikası Qanununa uyğun tender keçirilib və tenderin nəticəsi olaraq qalib şirkət “SURYAPI AZ” MMC və “Sur Yapı Endüstri Sanayi ve Ticaret Anonim” şirkətinin ölkəmizdəki nümayəndəliyinin birgə müəssisəsi müəyyən olunub.
Yengicə Su Anbarının tikintisi işləri 2022-2024-cü illərdə həyata keçiriləcək. Anbarın tikintisinə başlanılması üçün Səhmdar Cəmiyyəti ilə “SURYAPI AZ” MMC və “Sur Yapı Endüstri Sanayi və Ticaret Anonim” şirkətinin ölkəmizdəki nümayəndəliyi arasında podrat müqaviləsi bağlanılıb.
Yeni su anbarının ümumi sututumu 17,5 milyon kubmetr, istifadə olunacaq həcmi isə 12,4 milyon kubmetr nəzərdə tutulub. Su anbarı tikildikdən sonra Qəbələnin aran hissəsində 10 min hektar əkin sahəsinin su təminatı yaxşılaşacaq. Bu isə həmin torpaqlarda məhsuldarlığı artırmaqla yanaşı, həm də ildə 2-3 dəfə əkin aparmağa imkan verəcək.
Nəriman CAVADOV,
“Respublika”.