Mayın 10-da müasir və müstəqil Azərbaycanın memarı və qurucusu, xalqımızın ümummilli lideri Heydər Əliyevin anadan olmasının 99-cu ildönümü ilə əlaqədar Yeni Azərbaycan Partiyasının nümayəndələri və ölkəmizdə səfərdə olan Makedoniya Türk Demokratik Partiyasının nümayəndə heyəti Fəxri xiyabana gələrək Ulu Öndərin xatirəsini yad edib, məzarı önünə əklil və gül dəstələri qoyublar.

AZƏRTAC xəbər verir ki, görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.

Daha sonra Şəhidlər xiyabanına gələn Yeni Azərbaycan Partiyasının üzvləri və Makedoniya Türk Demokratik Partiyasının nümayəndə heyəti tərəfindən Azərbaycanın müstəqilliyi və ərazi bütövlüyü uğrunda mübarizədə canlarından keçən qəhrəman Vətən övladlarının xatirəsinə ehtiram ifadə edilib, məzarları üzərinə güllər düzülüb, "Əbədi məşəl" abidəsinin önünə əklil qoyulub.

Həmçinin "Türk şəhidliyi" abidəsi də ziyarət olunub, abidənin önünə gül dəstələri düzülüb.

AZƏRTAC